Бир қараганда, ҳар йилги каби финал, лекин чуқурроқ қараганда, бугунги ўйинда мухлисларни ўзига жалб қилиши керак бўлган бир қанча сабаблар бор. Нафақат “Реал” ва “Ювентус” мухлисларини, балки барча футбол мухлисларини.
Биринчидан, икки финалчи бошқа бошқа лигаларда тўп сурадилар. Сўнгги тўрт йилда уч марта финал бир давлат вакиллари иштирокида ўтганини эътиборга олсак, бугунги ўйиннинг аҳамияти янада ошади. Ҳар холда, бу жамоалар ҳар доим ҳам бир-бирларига қарши майдонга тушавермайдилар, турли мактаб, турли услуб – қизиқ бўлиши шубҳасиз.
Иккинчидан. Очиғи, охирги марта қачон икки финалчи бу қадар бир-бирига мос бўлганини эслай олмайман. Менимча, 2009 йилги финалда ("МЮ" – "Барселона") шундай бўлганди. Тўғри, кейинги ҳар бир финал ўзига хос тарзда тенг курашларга бой ўтган, нолиш керак эмас, аммо ўйиндан олдинги мақомдан келиб чиқсак, барибир жамоалардан бири фаворитроқ бўлган. Испан финалларида ҳам, Бундеслига курашида ҳам. Ҳозир эса, ҳар икки жамоанинг имконияти деярли тенг кўрилмоқда.
Учинчидан, эътиборга арзирли хос ҳолатлар етарлича кўп. Зидан собиқ жамоаси “Ювентус”га қарши. Игуаинми ёки Бензема? Буффон ниҳоят ҳеч қачон юта олмаган мана шу совринини юта оладими? “Ювентус”нинг сўнгги 4 финални бой бергани, “Реал”нинг эса, ҳеч қачон финалларда мағлубиятга учрамагани – хўш, бу анъана давом этадими? Биттадан ортиқ жамоа билан тўрт марта ЕЧЛ ғолиблиги биринчи марта кимга насиб этади – Роналдугами ёки Дани Алвешгами? Бундай саволлар албатта, ҳар қандай футбол мухлисини қизиқтириши табиий.
Тўртинчидан, бугун бир қатор анъаналар бузилиши. рекордлар қайд этилиши мумкин. Агар “Реал” бугун ғалаба қозонса, ЕЧЛ ни қаторасига икки йил ютган илк жамоа бўлиб тарихга киради. Бундан олдин, ўз вақтида, “Милан”, “Аякс”, “Ювентус”, ҳамда “Манчестер Юнайтед” жамоалари бундай натижага яқин келишган, аммо иккинчи финални бой бергандилар. Биз ниҳоят мана шу анъананинг бузилишини кўра оламизми ёки ростан ҳам жуда оғир вазифаси бу? Яна бир эътиборли жиҳат, агар бугун Криштиану Роналду гол урса, ЕЧЛ нинг уч финалида гол урган илк футболчига айланади. Бу ҳам ажойиб кўрсаткич.
Бешинчидан, олтинчидан, еттинчидан…Саккизинчидан… Аслини олганда, сиз мана шу сайтда мана шу фикрларни ўқиб ўтирибсизми, футбол мухлисисиз, сизга бундай ўйинни алоҳида реклама қилиш ҳам шарт эмас. Ахир бу финал, ахир бу Европа Чемпионлар лигаси! Мусобақанинг мусиқасининг ўзиёқ сизни телевизор қаршисига михлайди, бунга аминман.
Қаҳрамон Асланов
Матнда хатолик топсангиз, ўша хатони белгилаб, бизга жўнатинг (Ctrl + Enter).
Сўғдиёна
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
