Янги мавсумда Суперлига номи остида старт оладиган чемпионатимиз жамоалари «қишки уйқу»дан уйғонишни бошлашди.
Мамлакатимиздаги об-ҳаво шароитидан келиб чиқиб айтишимиз мумкинки, декабрь бизда ҳақиқий сарҳисоб ойидир. Қолаверса, клублар ҳам кейинги йил учун режалар тузиб, ҳомийлар ва раҳбариятга тақдим этишади.
Қуйида Суперлигада иштирок этиш эҳтимоли юқори бўлган клубларнинг тайёргарлик режалари хусусида ўртоқлашсак.
«ЛОКОМОТИВ»
Амалдаги чемпион ва кубок соҳиби 18 декабрда таътилдан қайтди. Жамоа айнан шу санадан то 8 январга қадар ТТЗдаги қароргоҳи - «Локомотив» спорт мажмуасида кунига 1-2 маҳал шуғулланади. Машғулотлар 1,5-2 соат назарий ва 2 соат амалий шаклда ўтади. Берилган жисмоний юкламалардан келиб чиққан ҳолда машғулот вақти ўзгариши мумкин.
2018 йилнинг 9-21 январь кунлари БААнинг Дубай шаҳрида ўқув-йиғин машғулотлари ташкилланади. Жисмоний юкламалардан келиб чиққан ҳолда кунига 1-2 маҳал машғулотлар ўтказилади. У ерда машғулот олиб бораётган хориж клубларига қарши ўртоқлик ўйинлари ташкил этиш ҳам эҳтимолдан холи эмас.
«Темирйўлчилар» 22 январда Ўзбекистонга қайтгач, яна ўз қароргоҳларида машғулотларга зўр беришади. Февраль ойи учун режалар Осиё Чемпионлар Лигаси қуръасидаги рақибларга қараб кейинроқ такомиллаштирилади.
«НАСАФ»
Қарши клуби 28 декабргача ўз қароргоҳида ўқув-машғулот йиғини ўтказади. Рўзиқул Бердиев унда асосан амалий ва назарий машқларга эътибор қаратади. 2018 йилнинг 3-7 январида жамоа янги мавсум тайёргарлигини давом эттиради. 7-20 январь оралиғида клуб Анталия ёки БААда йиғин ўтказишни режалаштирган.
23-30 январда эса «аждарлар» ўз қароргоҳларида ОЧЛ гуруҳ босқичига йўлланма берувчи «плей-офф» баҳсларига тадорик кўрадилар. Мабодо Иорданиянинг «Ал-Файсали» клуби мағлуб этилиб, гуруҳ босқичи чиптаси қўлга киритилса, жамоанинг февраль ойи учун режалари кейинроқ маълум қилинади.
«ПАХТАКОР»
Қисқа танаффусдан сўнг ОЧЛга қайтган «шерлар» олдида ўта муҳим ўйин турибди. Қатарда «Ал-Гарафа» меҳмони бўладиган жамоа 23 декабрдан таътилдан қайтади. Клуб шундан сўнг 29 декабргача Тошкент шаҳридаги «ЖАР» спорт мажмуасида кунига 1-2 маҳал машғулот ўтказади.
«Пахтакор» тушгача назарий, кечга яқин эса 2 соатли амалий машғулотлар ўтказади. Берилган жисмоний юкламаларга қараб шуғулланиш вақти ўзгариши эҳтимоли мавжуд. Жамоа 29 декабрдан 2018 йилнинг 4 январигача бир ҳафталик таътилга чиқади.
4-15 январь кунлари эса Туркиянинг Анталия шаҳрида ўқув-машғулот йиғини ташкиллаштирилади. У ерда ҳам жисмоний юкламалардан келиб чиқиб, кунига 1-2 маҳал машғулотлар ўтказилади. «Ал-Гарафа» билан ўйин учун тузиладиган дастур ҳақида кейинроқ маълум қилинса керак.
«БУНЁДКОР»
Миржалол Қосимов шогирдлари 29 декабргача ўз қароргоҳларида йиғин ўтказишади. Машғулотлар кунига икки марта олиб борилади. Даставвал 2 соат назарий, тушдан сўнг эса амалий машғулотлар ўтказилади.
3 январдан жамоанинг ўз қароргоҳидаги машғулотлари тикланади ва бу ҳолат 10 январга қадар давом этади. 2018 йилнинг 12 ва 26 январи оралиғида мазкур клуб Туркиянинг Blue Waters ёки Бирлашган Араб Амирлигидаги Jebel Ali меҳмонхонасига жойлашади.
У ерда машғулотлар кунига 2 маҳал олиб борилади. 29 январдан то чемпионат стартигача жамоа янги мавсум тараддудини юқори даражага кўтаради.
«НАВБАҲОР»
«Лочинлар» 25 декабрга қадар Наманганнинг ўзида ўқув йиғини ўтказишади. «Навбаҳор» Марказий стадионида назарий машғулотлар ташкил этилса, амалий машқлар сунъий қопламали майдонда ўтказилади.
2018 йилнинг 5-18 январь ҳамда 20 январь-2 февраль кунлари Тошкент шаҳрида ўқув йиғини уюштирилади. Наманган клуби машғулотлар ўтказишда «Бунёдкор» спорт мажмуасидан фойдаланишни режалаштирган.
Назарий (1,5 соат) ва амалий (2 соат) машғулотлар кетма-кетлик асосида ўтказиб борилади. Клубнинг хорижда йиғин ташкиллаштириши тўғрисида маълумот берилмаган.
«БУХОРО»
Маълумки, бу жамоа декабрь ойида таътилда бўлади. 2018 йилнинг 4-18 январь кунлари эса Тошкент шаҳридаги «Grand Atlas» меҳмонхонасига жойлашиб, аввалги тартибда тайёргарлик олиб боради.
«Бунёдкор» сунъий майдонида икки маҳалдан машғулотлар ўтказиш режалаштирилмоқда. 22 январдан 6 февралгача Тошкент йиғини давом эттирилади. 10-25 февраль саналари оралиғида Улуғбек Бақоев жамоаси Туркия давлатида одатий ўқув-йиғин машғулотлари ўтказади.
«МАШЪАЛ»
Муборак клуби 28 декабргача Янгиер шаҳрида ўқув-йиғин машғулотлари ўтказишни режалаштирган. Бу жараён дастлаб назарий, кейинчалик амалий шаклда давом эттирилади. 28 декабрдан 4 январгача жамоага таътил берилади.
2018 йилнинг 5-21 январь саналарида яна Янгиер шаҳрида йиғин ташкилланади. 21-24 январда эса футболчиларга дам берилади.
24 январдан 8 февралгача Фарғона вилояти ҳокими кубоги мусобақасида иштирок этиш учун таёргарлик олиб борилади. 11-26 февралда жамоа яна Янгиер шаҳрига қайтади.
«ОЛМАЛИҚ»
Виктор Кумиков шогирдлари 29 декабрга қадар Тошкент вилоятидаги «Олтин олма» санаториясида ўқув-йиғин ташкиллашади. Назарий (1,5 соат) ва амалий (1,5 соат) машғулотлар тушгача ва кечга яқин кетма-кетлик асосида ўтказиб борилади. Берилган жисмоний юкламалардан келиб чиққан ҳолда машғулот вақти ўзгариши мумкин.
2018 йилнинг 4-31 январь кунлари йиғинни Анталияга кўчириш режалаштирилган. Жамоа у ерда машғулот вақтларини бироз қисқартиради.
Яъни, назарий машғулотларга 1 соат ажратилган, холос. 22 февралдан то чемпионат бошлангунча Тошкент шаҳридаги «Туркистон» меҳмонхонасидан ТТЙМИ майдонига қатнаган ҳолда машғулотлар давом эттирилади.
«ҚЎҚОН-1912»
Бу клуб 20-28 декабрь саналари оралиғида Қўқон шаҳридаги Марказий стадионда 1-2 маҳалдан ўқув-йиғин машғулотлари ўтказади. Назарий ва амалий машқлар учун 1,5 соатдан вақт ажратилиши кўзда тутилган. Мураббийлар штабининг юкламаларни кучайтириши эҳтимоли ҳам йўқ эмас.
2018 йилнинг 4-16 январь кунлари Тошкент шаҳридаги меҳмонхоналардан бирига жойлашиб, ўқув-машғулот йиғинини Чилонзор туманидаги «Пахтакор» мактаб мажмуасида ташкиллаб, у ерда назорат учрашувлари ўтказиш режалаштирилган. Жамоа шундан сўнг Фарғонага қайтади ва 20 январдан 5 февралга қадар Фарғона вилояти ҳокими кубогида қатнашади.
«Қўқон-1912» мазкур турнир якунлангач, яна эски манзил бўйича Тошкент шаҳрига бориб, назорат ўйинларига зўр беради. Бу жараён 8-24 февраль саналарига тўғри келиши мумкин. Чемпионат старти бошлангунга қадар жамоа яна Қўқон шаҳрига қайтади.
«МЕТАЛЛУРГ»
29 декабргача Чирчиқ шаҳридаги «The Room» меҳмонхонасига жойлашадиган бекободликлар тушгача «Бунёдкор» мажмуасидаги сунъий қопламали майдонда машғулотлар ўтказишади. Заруратга қараб юкламалар орттирилиши мумкин. Футболчилар 2018 йил 3 январдан 1 февралгача шу тахлит шуғулланишда давом этишади.
Чирчиқдаги «Кимёгар» майдонида соат 18:00дан 19:30гача машғулотлар ташкил этилади. Буниси дастлабки йиғиндан бироз фарқли бўлади. 2-16 февраль кунлари Анталияда ўқув-машғулот йиғини ўтказилади. 20 февралдан то чемпионат стартигача жамоа яна «Бунёдкор» - «Кимёгар» йўналиши бўйлаб шуғулланишни давом эттиради.
«ҚИЗИЛҚУМ»
27 декабргача Навоий шаҳрида икки хил (назарий ва оғзаки) шаклдаги машғулотлар ўтказилади. Берилган жисмоний юкламалар асосида машғулот вақти ўзгариши мумкин. 2018 йилнинг 5-28 январь саналари оралиғида Навоийдаги ГМЗ-1 стадионида ўтказиладиган машғулотлар олдинги форматда давом эттирилади.
1-10 февраль саналари оралиғида жамоа Тошкент шаҳридаги «Grand Atlas» меҳмонхонасига жойлашади. «Қизилқум» эрталаб «Ёшлик» стадионида шуғулланса, тушдан сўнг машқлар «Бунёдкор» спорт мажмуасининг сунъий қопламали майдонига кўчади. 12-28 февралгача имкони топилса, Туркия ёки Тошкент шаҳрида яна бир бор ўқув-йиғини ўтказилади.
«ЦЕМЕНТЧИ»
Ўтган мавсум якунларига кўра, Суперлига йўлланмасини қўлга киритган бу клуб 28 декабргача Қувасой шаҳрида шуғулланади. Машғулотлар «Цементчи» қароргоҳида олиб борилади. Соат 09:00дан 10:15гача назарий машғулотлар ўтказилса, 15:00дан 16:30гача футболчилар амалий машқларга зўр беришади.
Янги йилдан сўнг бу турдаги машғулотлар 12 январгача айнан Қувасойнинг ўзида давом эттирилади. 15-29 январь кунлари жамоа Тошкентдаги «Ўзбекистон» меҳмонхонасига жойлашади ва «Пахтакор» спорт мажмуасида шуғулланади. Машғулотлар кунига икки маҳалдан олиб борилади.
1-15 февраль кунлари эса Фарғона шаҳридаги «Истиқлол» мажмуасида мавсум тараддудини давом эттиради. Машғулотлар кунига икки марта олиб борилади. Катта эҳтимол билан бу жамоа ҳам Фарғонадаги вилоят ҳокими кубоги турнирида иштирок этади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
