Ким меҳмон, ким мезбон?
Европа чемпионлар лигасининг 2003 йилги ярим финалида тўқнаш келган Миланнинг икки жамоаси «Интер» ҳамда «Милан» уй учрашуви борасида келишиб олишларига тўғри келди. Икки клуб ҳам уй учрашувларини битта стадионда ўтказишлари сабабли, қуръа ташланди. Унга кўра, шартли равишда биринчи учрашувнинг мезбони «Милан», иккинчисиники «Интер» бўлди. Ҳар икки ўйинда ҳам дуранг натижа қайд этилгани сабабли (0:0, 1:1) финалга «меҳмонда» урилган гол ҳисобига «Милан» йўлланма олди.
Чумоли уясининг фойдаси
Норвегиялик биатлончи Магнар Солберг ёз ойларида ўқ отиш машқини чумоли уяси устида ётиб бажарарди. Мураббийининг фикрига кўра, бу ҳолат спортчининг фикрни жамлашга ва ташқи таъсир ва чарчоққа эътибор бермасликка чақиради. Ўша пайтгача жаҳон чемпионатларида бирорта медал қўлга киритмаган Солберг 1968 йили Греноблдаги олимпиада ўйинлари чемпионлигига эришган. Тўрт йил ўтиб, Саппорода ҳам мувафақиятини яна бир бор такрорлади.
Чумоли уяси муваффақият гаровими?
Федерер чимли, Надаль қумли кортда. Ким ғолиб?
Профессионал теннисчилар Ассоциацияси томонидан 2007 йилнинг 2 майида Испаниянинг Пальма-де-Мальорка шаҳрида ярми чим, ярми қумли кортда антиқа учрашув ўтказилди. Унинг иштирокчилари беш йилдан буён кетма-кет 48 та учрашувда чимли кортларда мағлубият нималигини билмаётган Рожер Федерер ҳамда 3 йилдан ошиқ вақт 81 та ўйинда қумли кортда фақат ғалаба қозонаётган Рафаэл Надаллар эди. 19 кун давомида қурилишига 1 630 000 доллар сарфланган антиқа кортда уч сет давом этган учрашув испаниялик теннис юлдузининг ғалабаси билан якунланди.
«Хок тўлдирилган кўза» — бош соврин!
1882 йили Англия терма жамоаси крикетчилари ўз майдонида азалий рақиб Австралияга ютқазиб қўйишди. «The Sporting Times» нашри мазкур ўйин ҳақида кинояли некролог эълон қилди: «Англия крикети вафот этди. Унинг танаси куйдирилди ва хоки махсус кўза (кубок)да Австралияга жўнатилди».
Австралияда бўлиб ўтган кейинги учрашувда инглизлар жамоаси кучлироқ чиқиб, мельбурнлик ташкилотчилар қўлидан ўша машҳур «кўза»ни қабул қилиб олишди – бу сафар Австралия крикети «хоки» солинган. Айнан ўшанда юқоридаги икки мамлакат терма жамоалари иштирокидаги машҳур «The Ashes» («Хок») турнирига тамал тоши қўйилган. «Хок тўлдирилган кўза» бугунги кунда музейда сақланади, унинг нусхаси турнир ғолибига тақдим этилади.
«YouTube» ролигидан фойдаланган спортчи олимпиада совриндори
Кениялик Жулиус Йего «YouTube»да Олимпиада чемпионлари иштирокидаги роликлар орқали найза улоқтиришни ўрганади. Африка ўйинларида ғолиб чиққач эса профессионал мураббий билан ишлашни бошлайди. Шундай бўлса-да, у йилнинг кўп вақтини мустақил тайёрланиш билан ўтказарди. 2015 йили Йего найза улоқтириш бўйича жаҳон чемпионатида ғалаба қозонди, Рио-де-Жанейродаги Олимпиада баҳсларида эса кумуш медални қўлга киритди.
«Doing a Bradbury»
Австралияликлар бирор ютуққа ўз кучи билан эмас, фақатгина омад туфайли эришишга «doing a Bradbury» («Брэдбери иши») иборасини қўллайдилар.
Қишки Олимпия ўйинларида Австралия терма жамоасининг илк олтин медалини «шорт-трек»чи Стивен Брэдбери 2002 йили қўлга киритган. Олдинги турнирларда саралаш босқичидан нарига ўтолмаган спортчи бу сафар чорак финалда учинчи ўринни қўлга киритади. Аммо босқич ғолибининг мусобақадан четлатилиши уни кейинги босқичга олиб чиқади. Ярим финалда охирги ўринда бораётган Брэдбери бошқа спортчилар ўзаро тўқнашиб, йиқилиб кетиши натижасида финишга иккинчи бўлиб етиб келади. Худди шунга ўхшаш ҳолат финалда ҳам такрорланади.
Бу сафарги тўқнашувда австралиялик спортчидан ташқари барча спортчилар йиқилишади. Омадли Стивен Брэдбери эса Олимпиада олтин медалини қўлга киритади.
«Учар фин»нинг «парвоз»и
Парижда ўтган 1924 йилги Олимпиадада финляндиялик енгил атлетикачи Пааво Нурми ўзи иштирок этган барча югуриш мусобақаларда ғалаба қозонди. У шахсий ва жамоавий кроссда, жамоавий 3000 метрлик баҳсда, шунингдек, 1500 ва 5000 метрларда ҳам олтин медални қўлга киритди. Мусобақалар орасидаги фарқ камлиги сабабли терма жамоа мураббийлари 10000 метрлик баҳс финалига чарчаб қолган Нурмини эмас, балки бошқа бир спортчи – Вилле Ритолани қўйишади. Вилле ишончни оқлаб, жаҳон рекордини ўрнатган ҳолда олтин медални қўлга киритади. Аммо, мураббийларидан аччиқланган Нурми асосийга қўшни бўлган машғулот йўлагида иштирокчилар билан бир вақтда югуришни бошлаб, финишга Вилледан ҳам олдинроқ етиб келади. Лекин унинг натижаси расмий маълумотларга киритилмайди. «Учар фин» лақабли Пааво Нурми 10000 метрлик масофада 1920 ва 1928 йилги Олимпия ўйинларида ҳам олтин медални қўлга киритган.
Энг узун фамилияли футболчи
Замонавий футболда энг узун фамилияга эга европалик футболчи Нидерландия терма жамоаси собиқ аъзоси Ян Веннегор оф Хесселинк саналади.
Унинг фамилияси 17 асрдан — иккита фермерлар оиласи — Веннегорлар ва Хесселинклар қариндошлик ришталарини боғлагандан буён сақланиб келмоқда. Маълумотларга кўра, ўша пайтда янги туғилган боланинг насаби ижтимоий мавқеи ва бойлиги жиҳатидан тенг бўлгани бу икки оила фамилияларини қўшишдан келиб чиққан. Фақат янги фамилия маҳаллий одатларга кўра, чизиқча билан эмас, нидерланд тилида «ёки» маъносини берувчи «of» боғловчиси орқали ёзилган.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
