Бастиан Швайнштайгер Мюнхенга қайтди ва ўзининг хайрлашув учрашувини ўтказди. Фантастик аншлаг остидаги эҳтиросли беллашувларга кўникиб қолган «Альянц Арена» немис футболчиси мухлисларини сиғдира олмай, танг аҳволга тушиб қолди. Қизиқ, Швайнштайгер буюклигининг сири нимада? Бундан 3 йил аввал «Бавария»ни ташлаб кетган «хоин» қайси фазилатлари эвазига шаҳзодалардек кутиб олинди?
1. Швайни - футбол маъбуди
Бастианнинг футбол оламидаги ўзгармас лақаби сўзма-сўз ўгирганда «маъбуд» (даҳо) маъносини англатади. Мюнхен гранди сафидаги 15 йиллик фаолияти давомида бу атама унга шунчалик «ёпишиб» олдики, ҳатто манчестерлик мухлислар ҳам мулоқотда шундай мурожаат қилишарди. Ваҳоланки, Швайни «МЮ»да жуда оз майдонга тушарди. «Бавария» ишқибозларининг ярим ҳимоячига бу юксак ҳурмати бежиз эмасди. 2002 йилда Басти «Штутгарт» майдонида «Бавария»нинг амалдаги бош мураббийи - Нико Ковач ўрнини эгаллаб, ҳаммаси бўлиб Бундеслигада 342 марта майдонга тушди, 45та гол ва 70та самарали узатмани амалга оширди.
2. Швайнштайгернинг буюк дўстлари бор
Бунинг ажабланарли ери йўқ - буюкларнинг дўстлари ҳам буюк бўлишади. Футболчининг болалик пайтидан бери энг яқин дўсти - тоғ чанғичиси Феликс Нойройтер. Айнан шу спортчини немис телеканали Бастининг сўнгги учрашувини шарҳлашга таклиф этди. Велопойгачи Нико Росберг, баскетболчи Дирк Новицки ва актёр Тиль Швайгерлар ҳам унинг қадрдонлари. Уларни Швайнштайгер уйида тез-тез учратиш мумкин. Айтганча, Ангела Меркель ва Франк-Вальтер Штайнмайер ҳам футболчининг ашаддий мухлислари сирасидан.
3. Бастининг рафиқаси - Ана Иванович
Қарийб барча футболчилар умр йўлдоши танлашда асосий ихтисоси футболчининг рафиқаси бўлган аёлларни излашади. Швайни эса 2016 йилда сербиялик теннис юлдузи Ана Иванович билан никоҳдан ўтди. Венецияда бўлиб ўтган тўй маросимига жуфтлик таниқли шахсларни таклиф этди ва катта спорт билан хайрлашди. Ҳозир бахтиёр оилани Чикаго марказидаги қаҳвахонада учратиш мумкин, футбол майдони ёки кортда эмас. Хабарларга кўра, Ана Бастини немис модели Сара Бранднердан «тортиб олган». Футболчи бу масалада ҳам нозик дид соҳиби эканлигини намойиш этди.
4. Бастиан бошқа спорт турларини ҳам яхши кўради
Агар Швайнштайгер футболни танламаганида, қайсидир бошқа спортда албатта, шуҳрат қозонган бўларди. Унинг отаси айнан спорт буюмлари дўконининг соҳиби ва чанғи пойгаларининг ашаддий мухлиси эди. «Бавария»нинг бўлажак афсонаси болалик пайтида футболни хаёлига ҳам келтирмаган, оппоқ чўққиларни забт этишни орзу қиларди. Шунингдек, у баскетболни ҳам яхши кўрарди. Уни ҳозир ҳам Германия ва АҚШ паркетларидаги муросасиз беллашувларда кўриш мумкин. Бу манзарага гувоҳ бўлганлар Швайни баскетболни футболдан устун кўради, деган фикрга боришлари аниқ.
5. Шкаф тўла совринлар
Бастианннинг «Бавария»даги сўнгги учрашуви шарафига клуб музейидан у ўз жамоаси билан қўлга киритган барча совринлар «Альянц Арена»га олиб келинди. ЕЧЛ кубоги, 8та кумуш товоқ, 7та Германия кубоги, 2та Германия суперкубоги, УЕФА суперкубоги. Энг нуфузли соврин - ЖЧ-2014 кубоги ва Англия кубогига жой етмай қолди.
6. Швайнштайгер - барқарорлик тимсоли
Охирги 4 йил давомида Басти аввалгига қараганда камроқ майдонга тушди. Аммо унинг жамоадаги ўрни ўзгармади - шериклари учун Басти барқарорлик манбаи эди. Бу эътироф «Бавария» учун ҳам, бундестим учун ҳам бирдек тегишли. Оқсоқланиб юрган пайтида ҳам Швайни ўртоқларини илҳомлантириб, уларга қўшимча куч-қувват бағишларди. Оқибатда жамоа энг кучли рақибдан ҳайиқмай, сўнгги сонияларгача мардонавор жанг қиларди. Қисқаси, Басти жамоанинг юраги эди - усиз Мюнхен гранди ҳам, терма жамоа ҳам ўзини ожиз сезарди.
7. Швайни - ажойиб, ёқимтой инсон
Спорт оламида ўз вазифасини аъло даражада уддалай оладиган, аммо ҳаётда ўта қўпол, такаббур ёки бемаъни табиати билан ажралиб турадиган, ҳатто ўз фикрини баён эта олмайдиган кишилар жуда кўп. Хайриятки, Бастиан бу тоифадан эмас. У билан мулоқот қилиш касбдошларимиз учун олтинга тенг - Бастидан фақат қизиқарли ҳикояларни эшитасиз. Шунингдек, у ўйчанликни ҳам ўрнига қўяди, садоқатли мухлисларини қадрлайди. Масалан, «МЮ»га ўтганидан кейин эски рақамидаги футболкаларини харид қилган мухлисларига дастхати туширилган либосларни жўнатиш учун вақт топа олди. Адолатсизликка чидай олмай ўз жонига қасд қилмоқчи бўлган ҳакам Бабак Рафатига йўллаган таскин мактубини эса чинакам инсоний фазилат сифатида эътироф этиш ўринли.
8. Бастиан доимо бир қадам олдинда
Аслида, немислар ўта юксак дид бобида мақтана олишмайди. Томас Мюллернинг «ажойиб» образларини мисол сифатида келтиришимиз мумкин. Лекин Швайнштайгернинг тупроғи ўзга жойдан олинган. Очиғи, Басти ўзининг ташқи кўриниши билан ҳеч қачон мақтана олмаган. Бироқ кийиниши ва жентльменга хос юриш-туришига гап йўқ! Вақти-вақти билан унинг рафиқаси ҳамроҳлигида Чикагода сайр қилиб юргани тармоқларда эътиборни тортади. Ҳа, Hugo Boss терма жамоанинг кийинишига самарали таъсир кўрсатгани аниқ.
9. Оила истаги - Швайни учун қонун
Швайнштайгерлар оиласи ҳеч қачон жамоатчиликдан четда бўлишга интилган эмас. Айниқса, футболчи ўз акаси билан битта жамоада тўп сурса. Басти ва Тобиас Швайнштайгерлар худди икки томчи сувдек ўхшашлар. У оилада кучли таъсирга эга бўлиб, кичикларни ҳимоя қиларди. Жумладан, Бастианни танқидчиларга топшириб қўймайди. Айтишларича, Швайнининг Манчестерга ўтишини ҳам Тобиас уюштирган. Кейинчалик футболчи акаси «МЮ»нинг ашаддий мухлиси эканлигини тан олди. Шартнома имзолангач, ака-ука майдон сифатини назоратдан ўтказиш учун «Олд Траффорд»га йўл олишди. Қизил трибуналар қаршисида олинган фотосуратлар Тобиас орзусининг рўёбга чиққанини исботлаб турарди.
10. Швайнштайгер - Бундеслига юзи
Ҳатто «Бавария»ни кўрарга кўзи йўқ бўлган мухлислар ҳам айнан Швайнини Германия чемпионатини бутун дунёга муносиб намойиш эта оладиган футболчи сифатида тан оладилар. «Менинг қалбим, бутун борлиғим «Бавария»га тегишли. Бор куч-қувватим ва маҳоратимни унга сарфладим» - бу жумлалар Басти ва Бундеслига ҳақида. Эътироф жимжимадор иборалардан холи, қисқа ва лўнда. Оддий футболчиликдан немис футболи фахрига айланиш орқали у миллионлар ўйинига бефарқ бўлган ватандошларини ҳам тўпли мўъжизага ошно этди. Ҳа, футболнинг мафтункорлигини Швайнштайгер каби фидойилар таъминлашади!
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
