Ўзбекистоннинг амалдаги чемпионлари бу мавсумни анчагина бўш бошлашди. Буни кўплаб мухлислар асосий таркиб футболчилариннг бошқа клубга ўтиб кетгани билан боғлаган бўлса, баъзилар ротациянинг йўқлигини сабаб қилиб кўрсатмоқда. Қисқаси, бугун амалдаги чемпион клубимиз ҳақида…
Асосий таркиб учун рақобат йўқ
Сардор Мирзаев, Хусниддин Ғофуров, Ислом Тўхтахўжаев, Темурхўжа Абдухолиқов, Алишер Шоғуломов,Диёр Туропов, Шуҳрат Муҳаммадиев… Бу футболчилар мана бир неча йиллардан бери «Темир йўлчилар» шарафини ҳимоя қилиб келмоқда… Уларнинг аксарияти терма жамоа даражасига чиқа олмаган бўлсада, молиявий бақувват клубдан яхшигина маош олишади. Авваламбор, омадларини берсин, аммо бу уларнинг зиёнига ишламоқда. Бу футболчиларда мотивация қолмагандек гўё?! Юқорида санаб ўтилган футболчиларнинг охирги маротаба қачон кўзи ёниб майдонда тўп сурганини тўғриси, ҳозир эслай олмайман.
Ачинарлиси шундаки, ўз вақтида бутун Ўзбекистоннинг умидига айланган йигитлар ҳозирда ўзларининг сояларида қолиб кетишмоқда… Клуб ротацияга эътиборни камроқ қаратгани учун сўнгги 5 мавсумда жамоа бирорта ёш футболчини кашф эта олмади. Бу юкни «Насаф» ва «Бунёдкор» аллақачон ўз бўйнига олиб бўлгани етмагандек, ёшларга таянган клублар кичик бюджет билан ҳам исталган рақибни енга оладиган жанговар жамоага айланган бир пайтда, «Локомотив»дек қудратли клуб ўзбек футболи ривожи учун бирорта янги номни кашф этмагани кишини ўйлантириб қўяди… Ротацияга урғу бермаган жамоада тўп сурган футболчилар асосий таркибдаги жойини йўқотиб қўйишдан сира чўчимай майдонда тўп сургани сабаблими, ёки бошқа факторлар эвазига халқаро ареналарда ғалаба қозониши шарт бўлган учрашувларда очко йўқотаётган «Локомотив»нинг ўйинларида ўсиш кузатилмаяпти... Минг афсуски, «Темир йўлчилар»нинг ОЧЛ даги омадсиз юришлари эвазига квоталаримиз қисқариб бормоқда. Ички чемпионатимизда ОЧЛ да иштирок этувчи клублар сонини ошириб олишни уддасидан чиқа олсак, бу терма жамоамиз учун ҳам, «Супер Лига» учун ҳам фойдадан холи бўлмас эди.
Кетганлар келганлардан анча кучлироқ эди
Мавсум бошида «Локомотив» жамоасини елкасида кўтариб юрган Бикмаев, Алибоев, Абдуллаев, Нестеров сингари футболчиларни жамоада олиб қолмагани етмагандек, уларнинг ўрнини боса оладиган футболчиларни ҳарид қила олмади. Жамоага ҳозир Алибоев сингари креатив футболчи етишмаётган бўлса, Бикмаевнинг ўрнини босиши керак бўлган футболчи заҳирада қолиб кетяпти. Афсуски, «Локомотив» бу мавсум чемпионлик учун курашда «Пахтакор»га ҳозирги таркиби билан етарлича қаршилик кўрсата олмаслиги аниқ бўлиб бормоқда. Бу эса, ўз-ўзидан «Супер Лига»даги интриганинг йўқолишига сабаб бўлса, ажаб эмас…
Сифатсиз легионерлар
Легионер футболчилар маҳаллий футболчиларга нисбатан бир бош баланд бўлиши шарт, акс холда, уларни жамоага таклиф этишдан маъни ёқ.
Бу мавсумда ОЧЛ ҳавосидан нафас олмаган, тажрибасиз Жокич, Аманов, Раеватсларнинг ҳарид қилиниши «Локо»нинг ўйинини кучайтирмаслиги кундек равшан эди. Ўзбекистон чемпиони сифатида клублар ўртасидаги қитъамиздаги энг нуфузли турнирда юртимиз шарафини ҳимоя қилаётган жамоа учун бу траснферлар нима учун керак бўлди экан?! Тўғриси, тушуниш қийин.
Ўйиндаги камчиликлар
Жамоа асосий эътиборни қанотларга қаратмоқда ва ҳужумларнинг деярли 80% қанотлардан вужудга келмоқда. Бу яхши, аммо рақиб бу услубни тезда ўқиб олиб қарши чоралар корадиган бўлса, «Локомотив»да «Б» режа йўқ эканлиги панд бериб қўймоқда. Бундан аввалги мавсумда Икром Алибоев қанотларни рақиблар беркитган пайтида марказдан ажойиб ҳужумлар бошлаб турар ва бу уруниш кўп холларда гол билан якунлар эди. Хозирда, марказда ўйнаётган футболчларда ижодкорлик етишмаяпти. Жамоанинг марказдан уюштириладиган ҳужумларига жавоб бериши кутилалаётган Искендеров эса ҳали тўлиқ спорт формасини тиклаб олганича йўқ. Шундай экан, афсуски, «Локомотив» «Б» режасидан фойдаланишни истаган тақдирда ҳам ижрочилар йўқлиги панд бермоқда.
Хулоса
Умумий қилиб айтганда, жамоада кечиктирмасдан қилиниши керак бўлган ишлар йиғилиб қолган.Мавсум оралиғида жамоа янги футболчилар билан таркибини кучайтириб олиши шарт. Акс холда, ОЧЛ да ҳам «Супер Лига»да ҳам ижобий натижа кўрсатишдан умид қилмаса ҳам бўлади. «Локомотив» ўйинни ўз қўлига ола биладиган футболчиларга муҳтож. «Темир йўлчилар»нинг ОЧЛда жойлашган гуруҳи «Пахтакор»никидан бироз кучсизроқ дейиш нотўғридек, аммо «Локо» анчадан бери бу қадар қулай гуруҳга тушмаган эди. Афсуски, «Ал Иттиҳод»га қарши бўм-бўш стадионда кечган учрашувдаги мағлубият имкониятларни бироз пасайтириб юборди. Энди қолган ўйинларнинг ҳар бири финалга тенг бўлади. Шундай экан, буёғига «Локомотив» ортида турган ўзбек халқи ва футболимиз шаъни учун ҳам икки ҳисса масъулият билан майдонга тушмоғи даркор. Олдинда бутун бошли ички чемпионат ва ОЧЛнинг иккинчи давраси бор. Йўқотилган очколарни жамғариш ва курашга қайтишнинг айни пайти.
Яҳёхўжа Улуғхўжаев
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов.jpg)
Қаҳрамон Асланов
Шуҳрат Шокиржонов
Шерзод Ражабов
