Бугун Хитойнин Нинбо шаҳрида оғир атлетика бўйича бўйича Осиё чемпионати расман старт олади. Табиийки, беллашувлар бошланишидан аввал қитъа федерациясининг қатор йиғилишлари ўтказилди. Мазкур тадбирлар доирасида Осиё оғир атлетика федерациясининг Ижроия қўмитаси, илмий-амалий, мураббийлар ва ҳакамлар қўмиталари йиғилиши, шунингдек, ташкилотнинг навбатдаги Конгресси ҳам бўлиб ўтди.
Қитъа ва Халқаро оғир атлетика федерациялари мутасаддиларини жамлаган мазкур тадбирларда Ўзбекистон оғир атлетика федерацияси раисининг биринчи ўринбосари, Осиё оғир атлетика федерацияси вице-президенти Шаҳрулло Маҳмудов ҳам иштирок этди.
Эслатиб ўтамиз, Осиё чемпионатида 6 нафар спортчимиз қатнашади. Терма жамоамиз вакилларининг дастлабки чиқиши эртага бошланади ва унда Адҳамжон Эргашев (-67 кг) чемпионлик учун супачага чиқади.
Эътиборлиси, таркибга кирган барча атлетларимиз ўз вазн тоифаларида медаллар учун асосий даъвогарлардан саналишади. Шундай экан, Ўзбекистон Миллий олимпия қўмитаси Осиё чемпионатида мамлакатимиз терма жамоаси аъзоларига омад ва муваффақиятлар тилайди.
Матнда хатолик топсангиз, ўша хатони белгилаб, бизга жўнатинг (Ctrl + Enter).