26 апрель куни Жисмоний тарбия ва спорт вазирлиги ҳузуридаги Жисмоний тарбия ва спорт бўйича мутахассисларни илмий-методик таъминлаш, қайта тайёрлаш ва малакасини ошириш марказида республика ўқув семинари бўлиб ўтди.
Семинарда Жисмоний тарбия ва спорт вазирлиги раҳбарияти, тегишли бошқарма ва бўлим бошлиқлари, ихтисослаштирилган олимпия захиралари мактаб-интернатлари ҳамда олимпия ва миллий спорт турлари бўйича давлат ихтисослаштирилган мактаб-интернатларининг раҳбарлари ҳамда спорт федерация (ассоциация)лари мутасаддилари иштирок этишди.
Тадбирни кириш сўзи билан очиб берган Жисмоний тарбия ва спорт вазири ўринбосари Шарифжон Мўминжонов Президентимиз томонидан илгари сурилаётган бешта ташаббус бўйича, хусусан ёшларни жисмоний чиниқтириш, уларнинг спорт соҳасида қобилиятини намоён қилиши учун зарур шароит яратишга йўналтирилган иккинчи ташаббус доирасида амалга оширилаётган ишлар ва истиқболдаги вазифалар хусусида батафсил маълумот берди.
Шундан сўнг маъруза қилган вазирликнинг Фан, спорт ва таълим муассасаларини илмий методик таъминлаш бошқармаси бошлиғи Азизбек Хасанов муассасаларга ўқувчиларни қабул қилишда ҳудудлардаги реал эҳтиёжларни ўрганиш, спорт иншоотининг салоҳияти ундаги тренерлар ва спорт жиҳозларнинг ҳолатига ҳам алоҳида эътибор қаратиш лозимлигини таъкидлади. Шунингдек, муассасаларни янги ўқув йилига тайёрлаш, ўқув режалар ва дастурларни ишлаб чиқиш, керакли адабиётлар ва қўлланмалар билан таъминлаш бўйича олдинда турган устувор вазифалар ҳақида айтиб ўтди.
Навбатдаги маърузачи вазирликнинг юридик бўлим бошлиғи Шерзод Каримов спорт таълими муассасалари раҳбарларига коррупцияга қарши кураш бўйича муассасаларда амалга оширилиши лозим бўлган чора-тадбирлар ҳақида маълумот берди.
Тадбирда шунингдек, таълим муассасалари ходимларининг молиявий саводхонлигини ошириш ва молиявий хатоликларга шароит яратмаслик чораларини кўриш, ички ҳужжатларни тартибга келтириш ҳамда олий таълим муассасалари билан ҳамкорлик самарали қилиш мавзуларида маърузалар тингланди.
Ўқув семинарнинг амалий қисми Республика ихтисослаштирилган олимпия захиралари мактаб-интернатида давом эттирилди.
Якунда иштирокчиларга ушбу семинар давомида олган билим ва кўникмаларини ўз муассасаларида амалиётга жорий этиш вазифаси юкланди.
Матнда хатолик топсангиз, ўша хатони белгилаб, бизга жўнатинг (Ctrl + Enter).