Президентимиз томонидан илгари сурилган 5та ташаббуснинг иккинчиси, яъни спорт тўгараклари фаолиятига алоҳида эътибор берилиши натижасида Тошкент вилояти Бўка туманидаги 15-сонли Меҳрибонлик уйи тарбияланувчилари ўз тенгдошларидан соғлом, чаққон ва абжир эканликларини исботлади.
Ўзбекистон Ёшлар иттифоқи томонидан ташкил этилган футбол бўйича Меҳрибонлик уйлари ва болалар шаҳарчалари тарбияланувчилари ўртасида Республика биринчилигининг финал босқичи Тошкент шаҳрида ўтказилди. Ҳал қилувчи босқичда мамлакатимизнинг 4та минтақасидан спортчи ёшлар ғолиблик учун баҳс олиб борди.
Финал босқичида Фарғона водийси минтақасидан Марғилон шаҳридаги 1-сонли Меҳрибонлик уйи, Қорақалпоғистон Республикаси, Бухоро ва Хоразм вилоятлари орасидан Хива шаҳридаги Болалар шаҳарчаси жамоаси, Сурхондарё, Қашқадарё, Навоий ва Самарқанд вилояти вакилларини жамлаган ҳудуддан эса Самарқанд шаҳридаги 1-сонли Меҳрибонлик уйи ҳамда Тошкент шаҳри, Жиззах, Тошкент ва Сирдарё вилояти вакиллари ўртасида Бўка туманидаги 15-сонли Меҳрибонлик уйи тарбияланувчилари ўзаро беллашди.
Якуний босқичда бўкалик ёшлар Чирчиқ шаҳридаги 14-сонли Меҳрибонлик уйи тарбияланувчиларини 8:2, Сирдарё вилояти вакилларини 5:2, Тошкент шаҳри вакилларини 3:2 ва ярим финалда Самарқанд шаҳри ёшларини 2:0 ҳисобида енгишди. Финалда Фарғона вилояти вакилларидан 6:1 ҳисобида устун келган Бўка туманидаги 15-сонли Меҳрибонлик уйи тарбияланувчилари Республика чемпионлигини қўлга киритди.
Натижада бўкалик спортчи ёшлар мусобақа бош соврини – кўчма кубок, медаллар, 1-даражали диплом ҳамда қимматбаҳо совғалар билан тақдирланди.
Хулоса ўрнида шуни айтиш керак, Президентимиз томонидан илгари сурилган 5та ташаббусдан кўзланган мақсадлар бирин-кетин ўз самарасини бера бошлади. Ушбу самара ва натижалар ўқувчи ёшларнинг таълим-тарбиясида, ҳаётда эришаётган ютуқларида акс этиши лозим эди ва бунга маълум маънода эришилмоқда.
Матнда хатолик топсангиз, ўша хатони белгилаб, бизга жўнатинг (Ctrl + Enter).