Бугун “Барселона” футболчиси Лионель Мессининг “Барселона” сафида илк бор майдонга тушганига роппа-роса 15 йил бўлибди. Вақтнинг ўтишини қаранг.
ФАНТАСТИК ДАВРНИНГ БОШЛАНИШИ
2004 йилнинг 16 октябри. “Монжуик” стадиони. Каталония дербиси. "Эспаньол" – "Барселона". Ҳисоб 0:1. Ўйин якунланишига саккиз дақиқа қолган. Бош ҳакам “Барселона” сафида ўзгариш қилишга рухсат берди. Майдонни ягона голга муаллифлик қилиб турган Деку тарк этди. Ўрнини эса Лионель Месси эгаллади. Шу пайтда Месси 17 ёш, 3 ой ва 22 кунлик эди.
Мессининг дебют голи эса 2005 йилнинг 1 майига тўғри келган. “Кўк-анорранглилар”нинг ашаддий мухлислари яхши билишади, балки кўришгандир ҳам. Месси ўшанда Испания чемпионати доирасида «Альбасете» дарвозасига гол урганди. Таъкидлаш керакки, Месси “Барселона” сафидаги дастлабки мавсумида жами 77 дақиқа ўйнаган.
“У МЎЪЖИЗАВИЙ ТАЁҚЧА”
“Барселона” сафидаги илк кунларидаёқ Месси ушбу клубнинг бошқа бир афсонаси Роналдиньонинг эътиборини қозонганди. Маълумот учун, Мессининг биринчи голига айнан бразилиялик футболчи ассистентлик қилган.
"У туғма истеъдод соҳиби. Ёшлигидан футболга қизиққан. “Барселона” сафига келиб қўшилганида эса аллақачон профессионалга айланиб улгурганди. Биз Мессини катта қувонч билан қарши олдик, у фаолиятини айнан “Барселона”да бошлаганидан хурсандман. Энг қувонарлиси, у биринчи голини менинг узатмамдан кейин киритганди”, деганди Роналдиньо интервьюларининг бирида.
15 йиллик барқарорлик
Месси “Барселона”га келиб қўшилгани заҳоти ўзини кўрсата олган. Гвардиоланинг ишончини қозониб, Златан Ибрагимовичнинг жамоадан кетишига сабабчи бўлган, аниқроғи Златандан кўра яхшироқ етакчи бўла олишини кўрсатган Месси буни ҳамон исботлаб келмоқда. 10 йилдан ошиқ муддат бир хил даражада ўйнаш — жуда мушкул иш. Месси эса бунинг уддасидан чиқиб келмоқда.
“Барселона” Месси даврида ўзининг энг ёрқин дамларини ўтказди, десак, хато бўлмас. Мессидан олдин Каталония клубида яққол етакчи йўқ эди. Бир вақтда бир нечта юлдузлар ўйнашган. Тўғри, Лео даврида ҳам “Барселона”да юлдуздар бор эди, бироқ Месси яққол ажралиб чиқишни уддалади. Бу борада унга туғма истеъдод ёрдам берди — рақибларни кетма-кет алдай олиш, чиройли зарбалар, бетакрор узатмалар ва қойилмақом жарима зарбалари. Муҳими, бу жиҳат Мессини ҳамон тарк этгани йўқ. У ҳозир ҳам рақибларни алдамоқда, вазиятларни чиройли голлар билан тугатяпти, жамоадошларини узатмалар билан таъминлаяпти, жарима зарбаларини-ку айтмаса ҳам бўлади. Ва катта эҳтимол билан камида икки йил ана шу даражада ўйнай олади бу Месси деганлари.
10 йиллик шартнома
“Барселона” Мессига 10 йиллик шартнома таклиф қилди. Бу аргентиналик футболчи Каталония клубида фаолиятини якунлайди дегани агар у янги шартномага имзо чекса. Ҳозир “Барселона”ни Мессининг яна неча йил юқори формада ўйнаши қизиқтирмаяпти, жамоага фақат битта нарса керак — Месси қолса бўлди. Лионель бундай қадрланишга арзийди. Биз эса Мессига “Барселона”да чорак йиллик юбилейини нишонлаши тарафдоримиз. Олға, Месси.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
