"Барселона" клуби бугун янги бош мураббий номини эълон қилди. Кутилмаганда, Кике Сетьен билан 2022 йилнинг ёзигача шартнома имзоланди. Хўш, ким ўзи бу мутахассис?
Футболчи Сетьен
У фаолиятини пляж футболида бошлаган. Унинг катта футболдаги биринчи жамоаси "Расинг" бўлган. Бу клуб сафида у 12 йил (1977-1985, 1992-1996) давомида марказий ҳимоячи сифатида ўйнаган ва "эл-маэстро" лақабига эга бўлган. Орада эса "Атлетико"га ўтиб, бу клуб сафида Испания суперкубогини қўлга киритган. Испания терма жамоаси таркибида 3та ўйинда майдонга тушган. Сетьен "Логроньес" ва "Леванте" клублари ҳам ўйнаган ва футболчилик фаолиятини 39 ёшда якунлаган.
Мураббий Сетьен
61 ёшли мутахассис 20 йиллик мураббийлик тажрибасига эга. У ўзини "Барселона"нинг афсонавий мураббийи Йохан Кройффнинг шогирди деб ҳисоблайди. У ўз жамоаларида доимо узатмаларга асосланган футболни тарғиб келган. Шу боис ҳам "Барса" уни ўз сафига чорлаган бўлса не ажаб.
Мураббийлик фаолиятида "Расинг" (2001-2002), "Полидепортиво" (2003-2004), Экваториал Гвинея (2006-2007), "Логроньес" (2007-2008), "Луго" (2009-2015), "Лас-Пальмас" (2015-2017), "Бетис" (2017-2019) клубларини бошқарган.
"Бетис"ни қабул қилган биринчи мавсумда Ла лигада 6-ўринни эгаллаб, Европа лигаси гуруҳ босқичида иштирок этган. Жамоа мусобақанинг 1/16 финал босқичида Франциянинг "Ренн" клубига ютқазиб, мусобақани тарк этган.
Андалусияликлар Испания чемпионатининг ўтган мавсумида 10-ўринни олганидан сўнг мураббий "Бетис"дан кетишга қарор қилди. Ваҳоланки, клуб билан унинг яна бир йиллик шартномаси мавжуд эди.
Биласизми?
Кике Сетьен "Барселона"ни "Камп Ноу"да мағлуб этган сўнгги мураббий бўлиб турибди. У 2018 йилнинг ноябрь ойида "Бетис" билан каталонияликлар майдонида 4:3 ҳисобида ғалаба қозонган эди. Шунингдек, ўтган мавсумда у "Атлетико"ни ҳамда "Реал"ни "Бернабеу"да мағлуб этди (2:0).
Сетьен "Барселона"да
Сетьен жамоа билан 2022 йилнинг июнь ойига қадар бўлган шартномага имзо чекди. У дастлабки ўйинни 19 январь, якшанба куни "Гранада"га қарши ўтказади. Каталонияликлар Испания Ла лигасида пешқадам бўлиб туришибди. "Кўк-анорранглилар" Европа чемпионлар лигасининг нимчорак финал босқичида "Наполи" билан тўқнаш келишади.
Исми: Энрике "Кике" Сетьен Солар
Фуқаролиги: Испания
Туғилган куни: 27.09.1958
Ўйинчилик фаолияти: "Расинг", "Атлетико", "Логроньес", "Леванте", Испания терма жамоаси
Мураббийлик фаолияти: "Расинг", "Полидепортиво", Экваториал Гвинея терма жамоаси, "Логроньес", "Луго", "Лас-Пальмас", "Бетис", "Барселона"
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
