Бугун “Ахмат” — “Ростов” ўйинини кўриб, ВАРга бўлган муносабатим, Россиядаги ВАРга бўлган муносабатим салбий томонга ўзгарди. Ҳали бунақа кутилмаган қарорни ҳатто майдондаги ҳакамлар ҳам чиқаришмаганди.
Ўйинда дастлаб Шомуродов ҳисобни очди. Кейин эса мезбонлар ҳисобни тенглаштиришди. Ғалабага интилган Карпин шогирдлари эса олдинга ўтишга интилишди. Шундай вазиятлардан бирида жамоадоши Элдорга тўпни узатди. Элдор рақиб футболчисидан ўзиб, жарима майдонига яқинлашди. Шу пайтда “Ахмат” футболчиси Элдорнинг қўлидан тортди. Элдор мувозанатни йўқотди, йиқила бошлади. Шунда рақиб ҳамюртимизнинг қўлини қўйиб юборди ва ҳеч нима қилмадим дегандек ишора қилди. Лекин бош ҳакам вазиятни тўғри баҳолаб, жарима зарбаси белгилади ва қўполлик қилган футболчига қизил карточка кўрсатди. Ҳаммаси тўғри эди. Чунки Элдорни рақиб сўнгги чора сифатида йиқитди, агар тортмаганида Шомуродов катта эҳтимол билан гол урарди. Ҳамма, жумладан, мен ҳам жарима зарбаси берилишини кута бошладим.
Айни шу пайтда ВАР ишга тушди. Негалигини билмадим. Бош ҳакам ҳайрон бўлганча, дам асабийлашиб ВАРдаги ҳакамлар билан гаплаша бошлади. Футболчилар ҳам ҳайрон. Ўзимча “Қизил карточка бекор қилинса керак”, деб ўйладим. Чунки қизил карточкани бекор қилдиришга ВАРнинг ваколати бор. Демак, сариқ карточка билан алмаштирилиши ва жарима зарбаси тепилиши керак. Балки, умуман, карточка бекор қилишар... Хуллас, вазият жуда антиқа тарзда якунланди. ВАРдагилар нима деган, билмадим, бош ҳакам қизил карточкани бекор қилди, четлатилган футболчи майдонга қайтди (буниси тушунарли), аммо жарима зарбасини ҳам бекор қилинди. Айни шу қарорни тушунмадим. Ҳеч қандай ўйиндан ташқари ҳолат йўқ, қўполлик бор, рақиб Элдорнинг қўлидан тортиб қолганди. Агар ҳужум ривожланиши давомида қаердадир “Ростов” футболчилари қўполлик қилишган бўлса, ўша жойдан жарима зарбаси тепилиши керак. Аммо мезбонлар дарвозабони тўпни эркин зарба билан ўйинга киритди. Демакки, ВАР қоида бузилмаган деб топган.
Кейинчалик такрорий вазиятда "Ростов" футболчиси Норманнинг рақиб билан тўқнаш келган ҳолати кўрсатилди. Шарҳловчи эса "Менимча, шу ҳолат сабаб бўлди-ёв" қабилида фикр билдирди. Аммо Норман рақибга ҳеч қандай қўполлик ишлатмаганди. Агар ВАР шуни асос қилган бўлса, бу ҳам хато. Чунки Норманнинг рақибга ҳеч қандай қўполлик қилмаганини билиш учун, аслида, ВАР ҳам керак эмасди.
Шу ўринда савол туғилади, қўлдан тортиб қолинган, очиқ-ойдин йиқитилган вазиятни ўйин қоидаси бузилмаган деб топиш учун ВАРда қандай асос бўлган экан?
Мазкур ўйинни бошқарган бош ҳакамга эътироз йўқ. Катта эҳтимол билан у ҳам ВАРнинг қароридан ҳайрон қолган.
ВАР тизимига, аслида, эътироз йўқ. Чунки кучли бешлик чемпионатларида хатоларидан кўра фойдали қарорлари кўпроқ ВАРни. Аслида, ВАРда ишлайдиган ҳакамларга футбол борасидаги билим ва яхши кўрадиган кўзнинг ўзи етарли. Россияда бугунги “Ростов”нинг ўйинида ишлаган ВАР ҳакамларига эса очиғи беш кетмадим.
Якунда Элдор Шомуродов жамоаси икки очкодан маҳрум бўлди. Элдор ВАР қурбонига айланди.
Низомжон ИСЛОМОВ
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
