Бугун 16 март. Машҳур футболчилардан, мураббийлардан ё клублардан ҳикоям йўқ. Балки тўрт йил олдин шу санада ўтказилган суперўйин ҳақида эсламоқчиман. Чемпионлар Лигаси ўйинлари танаффусга чиққан пайти бу айни муддао.
2015/16 йилги мавсум финалга Мадриднинг икки клуби чиққан ва биринчи жамоа ғолибликни қўлга киритган. Қизиғи, ўша мавсумнинг энг қизиқарли жуфтлигида на “Реал”, на “Атлетико” бор эди. Финалгача бора олмаган Мюнхен ва Турин клублари ўртасидаги баҳс бўлган. “Альянц” ўйингоҳларига эга бўлган ва футболчиларни бир-бирига алмаштиришга одатланган жамоалар жуфтлиги ўша мавсумнинг ёдда қоларли лаҳзаларини тақдим этиб берганди бизга.
Ўзи, кўпчиликка маълумки, ЕЧЛнинг нимчорак финалида битта жуфтлик барибир супер бўлади. Бу йилги “МанСити”-“Реал”, ўтган йилги “Ливерпуль” – “Бавария” жуфтлиги каби. “Ювентус” ҳамда “Бавария” ўртасидаги икки ажойиб ўйин.
Биринчи учрашув Туринда ўтган ва унда мезбонлар камбэк қилишганди. Мюллер ва Роббен киритган икки голга танаффусдан сўнг Дибала ва Стураро жавоб берганди. 2:2 билан Мюнхенга йўл олаётган клублар жавоб ўйинида уларни нималар кутаётганини билишмасди. Уҳ, ёдимизда!
Сценарийнинг такрорланишини қаранг: Ўша пайти Туринни гуллатган Погба ҳисобни очган, давомидан Куадродо меҳмонларни икки тўп фарқи билан олдинга олиб чиққани ёдимизда. Биринчи бўлим 0:2. “Бавария” камида ўтган ўйинда “Ювентус” амалга оширган ишни такрорлаши, қўлидан келса, кўпроқ гол йўллаши зарур эди.
Гвардиола танаффусда йигитларга нималар деган билмаймизу, немислар бутунлай ўзгариб чиқишди. Бироқ, дастлабки жавоб голини кутиш учун кўп вақт кетди. 73-дақиқа, ҳамиша навқирон Левандовски нажот эшигини тақиллатишга тушди. Ҳакам ўйин тугаши ҳақидаги ҳуштагини чалиш арафасида Томас Мюллер жамоаси жонига оро кирди. 2:2.
Овертайм. Руҳан устун бўлиб олган мезбонлар буёғига рақибни янчиб ташлашди. Тьяго Алькантара учинчи голни йўллаган бўлса, 110-дақиқада Кингсли Коман ўйинга нуқта қўйган. Қизиғи, барча голларда энг фаол ўйинчи Дуглас Коста иштирок этган. Бугунги кунда “Ювентус” либосида ўйнаётган иқтидор эгаси...
4:2, умумий натижа 6:4. “Бавария” йўлида давом этади. Аммо ўша қувончли лаҳзаларда ҳеч ким бу супербеллашувни тақдим этган жамоалар “Сан сиро”даги финал оқшомига етиб боролмасликларини билмасди. Начора, баъзан шундай бўлиб қолади: аро йўлда шоу кўрсатган қаҳрамонлар метронинг кейинги бекатида тушиб қолишади.
Хайрулла Ҳамидов
Манба: https://t.me/x_hamidov
Киритилди: 07:17, 16.03.2020. Ўқилди: 6843 марта. Фикрлар: 0 та.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
