Бугун, 8 январь куни Бухоро футбол ассоциациясининг навбатдаги Конгресси бўлиб ўтди. Унда Бухоро футбол ассоциацияси Ижроқўм аъзолари ҳамда оммавий ахборот воситалари вакиллари иштирок этишди. Шунингдек, кузатувчи сифатида Ўзбекистон футбол ассоциацияси ва Ўзбекистон футбол ассоциацияси ҳудудий футбол ассоциациялари билан ишлаш бўлими мутасаддилари, қолаверса, делегатлар сифатида Бухоро вилояти туман (шаҳар)лар футбол ассоциациялари Президентлари, вилоят бошқарма ва ташкилотлар раҳбарлари, Ўзбекистон Про-лига ва 1-лига мусобақаларида иштирок этувчи футбол клублари, вилоят футбол маҳорат мактаби, болалар ва ўсмирлар футбол мактаби, футбол фахрийлари қатнашишди.
Конгресс кун тартибидан ўрин олган биринчи масалада Бухоро футбол ассоциацияси томонидан 2020 йил давомида амалга оширилган ишлар ҳисоботи эшитилди. Шу билан бирга вилоят футбол ассоциациясининг 2021 йилги бюджети тасдиқланди ҳамда вилоят футбол ассоциацияси биринчи вице президенти, қолаверса, Бухоро футбол ассоциацияси Ижроия қўмитаси аъзолари сайланди. Унга кўра, вилоят ҳокими вазифасини бажарувчи Ботир Зарипов Бухоро вилоят футбол ассоциацияси Президенти, вилоят Ички Ишлар бошқармаси бошлиғи Шуҳрат Алиев Бухоро вилоят футбол ассоциацияси вице президенти, Фаррух Ҳамроев Бухоро вилоят футбол ассоциацияси I вице президенти этиб тасдиқланди.
Тадбирда сўз олган вилоят раҳбари сўнгги йилларда халқимизнинг саломатлиги тўғрисида ғамхўрлик қилиш, маънавий ва жисмоний баркамол авлодни шакллантириш, миллионлар ўйини бўлган ва мамлакатимизда алоҳида ўрин тутадиган спортнинг футбол турига аҳолини, айниқса, ёшларни кенг жалб этиш бўйича бир қатор чора-тадбирлар амалга оширилиб келинаётганлиги алоҳида таъкидлади. Қайд этилганидек, бугунги кунда юртимизда футбол жадал ривожланиб бормоқда. Олий лигадан Суперлигага ўзгартирилган миллий чемпионатимиз ҳам ривожланиб бораяпти.
Гарчанд вилоятимиз бош жамоаси “Бухоро” клуби 2020 йилги Суперлига баҳсларида омади келмаган бўлсада, жамоада янгидан-янги истеъдодли ўйинчилар кашф этилмоқда. Бу бежиз эмас. Чунки мамлакатимиз футболининг ҳар бир даврида Бухоронинг ўзига хос иқтидорли футболчилари мавжуд бўлган. Улар турли ёшдаги терма жамоалардан тортиб, миллий терма жамоамиз сафида ўнлаб учрашувларда ўз маҳоратларини намойиш этишган. Бундай иқтидор эгалари ҳозир ҳам бор.
— Мана, яқинда клубда ўзгартиришлар қилдик. Мураббийлар штабини янгиладик. Кўрамиз, улар қандай натижа кўрсатишаркан? Биз барча соҳаларда бўлгани каби футболда ҳам ишлайдиган тизим барпо этишимиз керак, -деди Ботир Зарипов.
Конгрессда сўз олган Ўзбекистон футбол ассоциацияси вице президенти Шоакрам Исроилов Бухоро футболининг ўзига хос тарихи борлигини, унинг ана шу тарихий анъаналарини қайта тиклаш зарурлигини айтиб ўтди.
Шу куни йиғилишда вилоятиммиз шаҳар ва туманларидаги маҳаллаларда спорт майдончаларини ташкил этиш, ёпиқ спорт мажмуаларидан самарали фойдаланиш масалалари ҳам кўриб чиқилди.
Бу борада вилоят ҳокимининг ўринбосари Ботир Шаҳриёровнинг ахбороти эшитилди. Ботир Зарипов ахборотда қайд этилган камчиликларнинг қисқа муддатда бартараф этиш юзасидан шаҳар ва туманлар ҳокимлари, тегишли мутасаддиларга топшириқ берди.
Вилоят ҳокимлиги матбуот хизмати
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
