АҚШда ҳам футбол йилдан-йилга оммалашиб бормоқда. Деярли ҳар йили МЛСдан камида бир футболчи Европа чемпионатларидан бирига кўчиб ўтмоқда. Албатта, бу лигани оммалаштиради ва ривожланишига ёрдам беради. Келинг, ушбу мавзуга батафсил тўхталамиз. Ҳозир биз сизлар билан Европада ўйнаётган АҚШлик футболчилар ҳақида суҳбатлашамиз.
Сержиньо Дест
Ёши: 20
Позиция: ҳимоячи
Клуб: "Барселона"
"Барселона"га янги келган футболчи Американинг бирон бир клубида ўйнамаган. Сабаби, Дест Голландияда туғилган ва футболга илк қадамларини ҳам, айнан лолалар юртида қўйган. Аммо, "Барса" ҳимоячисининг отаси АҚШ фуқороси ҳисобланади. Шунинг учун ҳам Сержиньо терма жамоада ўйнашга келганда, ота юртини танлашга қарор қилган. Ёш ҳимоячи ҳозиргача ўз мамлакатининг асосий жамоаси таркибида 5та ўйин ўтказган, аммо ҳали ўз ҳисобига гол ёздириб қўйишга улгурмади.
Дест клубдаги фаолиятини "Аякс" билан бошлаган. Ҳимоячи саккиз йил давомида Голландия пойтахти жамоаси сафида тўп сурган. Сержиньо "Аякс" асосий таркибида 38 учрашув ўтказди, 2 гол урди ва 6 голга узатмани амалга оширган. 2020 йилнинг октябр ойида Дест 21 миллион евро эвазига "Барселона"га кўчиб ўтди. Америкалик футболчи Каталония клуби таркибида 22та ўйин ўтказган бўлиб, 2 марта рақиблари дарвозасини ишғол қилган ва 1 голли пас берган. Ҳозир Испанияда Сержиньонинг истеъдоди ва маҳоратига юқори баҳо берилмоқда.
Кристиан Пулишич
Ёши: 22
Позиция: ярим ҳимоячи
Клуб: "Челси"
Пулисич Европага кетишдан олдин, АҚШ клубида ўйнашга муваффақ бўлган. Кристиан МЛСнинг "Мичиган Раш", "Пи Эй Классикс" каби жамоалар таркибида тўп тепган. Футболчи ушбу ватанини 2015 йил февраль ойида тарк этган, шундан сўнг у эркин агент сифатида "Боруссия Дортмунд" клубига ўтган. У ерда америкалик Германия клубининг У-17, кейинчалик эса асосий жамоаси сафида тўп сурган. Америкалик футболчи "Боруссия"да 127та ўйин ўтказиб, 19та гол урган ва 26та голли пас беришга эришган.
2019 йилнинг январида Кристиан "Челси" таркибига 64 миллион евро эвазига бориб қўшилди. "Кўклар"нинг собиқ устози Френк Лэмпард футболчига жуда катта умид боғлаган эди, аммо англиялик мутахасис футболчи билан катта муваффақииятга эриша олмади. Бироз муддат америкалик футболчи жароҳатлар туфайли бир қанча муддат майдонга туша олмади, аммо ҳозирда футболчи деярли майдонда тўлиқ ҳаракат қилмоқда. Пулишич Америка терма жамоасининг энг ёрқин вакилларидан биридир. Бугунги кунга қадар вингер АҚШ терма жамоаси сафида 36та ўйин ўтказган ва 15та гол урган. Шубҳасиз, Кристианинг келажаги жуда ҳам порлоқ
Жованни Рейна
Ёши: 18
Позиция: ярим ҳимоячи
Клуб: "Боруссия Д"
Рейна АҚШнинг Европадаги энг умидли футболчиларидан биридир. Йигитча ҳозирда атиги 18 ёшда, аммо у аллақачон "Боруссия Дортмунд"нинг асосий ўйинчиларидан бири ҳисобланади. Биласиз, Германия клуби доимий равишда Бундеслига чемпионлиги учун курашадиган ва Чемпионлар Лигасида мунтазам қатнашадиган жамоа ҳисобланади. Жованни фаолиятини "Нью-Йорк Сити" жамоасида бошлаган. Аммо, футболчи болалик клуби сафида битта ҳам учрашувда майдонга тушмаган ва 2019 йилнинг июлида эркин агент сифатида "Боруссия" сафига кўчиб ўтган. Шундан сўнг, ҳозиргача мазкур жамоа шарафини ҳимоя қилиб келмоқда.
Рейнани Дортмундда жуда ҳам ҳурмат қилишади. 2020 йилда "арилар" жамоаси Жованни билан шартномани 5 йилга узайтирди. Бу шуни англатадики, Немис жамоаси узоқ вақт давомида футболчини ўзида олиб қолмоқчи. Бу эса ўз навбатида Жованни учун АҚШ терма жамоасига йўл очиб беради. Шуниси эътиборга лойиқки, Рейна ўз мамлакатининг асосий жамоаси таркибидаги дебютини, ўтган йилнинг 12 ноябрда ўтказган. Ҳозиргача АҚШ бош жамоаси сафида, 4 учрашувда майдонга тушиб, 2 гол уришга эришган. Бундеслигада ҳам ярим ҳимоячи мунтазам равишда самарали ҳаракатлари билан ажралиб туради. Америкалик футболчини аллақачон Европанинг топ-клублари, шу жумладан Мадриднинг "Реал" жамоаси кузатмоқда. Аммо, Рейнанинг ўзини айтишича, у ҳозирча дортмундликлар сафида қолмоқчи.
Уэстон Маккенни
Ёши: 22
Позицияси: ярим ҳимоячи
Клуб: "Ювентус"
Маккенни - Американинг "Даллас" жамоаси академиясининг футболчиси ҳисобланади. Уэстон умрининг 7 йилини мазкур жамоа базасида ўтказган. Аммо шунча вақт давомида ярим ҳимоячи Техаснинг асосий жамоаси сафида битта ҳам учрашувда майдонга тушмаган. Шунга қарамай, ёш ярим ҳимоячи Европада кўзга ташланди. 2016 йил июл ойида Маккенни Германиянинг "Шальке" клубига эркин агент сифатида қўшилди. Немис клуби академияда бир мавсум тўп сурган ўйинчи, иккинчи мавсумдан "Шальке"нинг асосий жамоасида ўйнаган. Америкалик Германия клуби таркибида 91та ўйин ўтказиб, 5та гол урган ва 7та голли узатма берган.
2020/21 йилги мавсум бошланишидан олдин,"Ювентус" Маккенни сотиб олиш шарти билан ижарага олди. Футболчи Турин клуби сафида ажойиб ўйин кўрсатмоқда. Шунингдек, футболчи "Шальке"ни айни инқироз пайтида тарк этгани яхши бўлган. Эҳтимол, Германияда қолганда, ярим ҳимоячи ўсишдан тўхтаган бўлармиди?! Италияда унга янги имкониятлар очилган ва мураббий Андреа Пирло мунтазам равишда америкаликка ўйин амалиётини тақдим этиб келмоқда. "Ювентус"да Маккеннида ривожланиш ва тараққиёт учун барча имкониятлар мавжуд. Бундан ташқари, Уэстон АҚШ терма жамоаси аъзоси ҳам ҳисобланади. Ўзининг миллий жамоаси сафида ярим ҳимоячи 21та ўйин ўтказиб, 6та гол урган.
Юнус Мусо
Ёши: 17
Позиция: ўнг қанот ярим ҳимоячиси
Клуб: "Валенсия"
Муса ушбу рейтингнинг энг ёш вакили. Йигит ҳали 18 ёшда ҳам эмас, лекин футболчи аллақачон "Валенсия"нинг асосий футболчиси ҳисобланади. Юнуснинг таржимаи ҳоли жуда қизиқарли. Футболчи Нью-Йоркда туғилган, лекин болалигида Италияга кўчиб ўтган ва у ерда футбол ўйнашни бошлаган. 2012 йилда вингер Англияга йўл олади. Туманли Альбионда Лондоннинг "Арсенал" академиясига қабул қилинди. "Канонирлар" асосий таркибида ҳеч қачон битта ҳам ўйин ўтказмаган америкалик 2020 йил 1 августда эркин агент сифатида Испанияга йўл олади ва "Валенсия" билан шартнома имзолайди.
Жорий 2020 йил Юнуснинг фаолиятидаги энг яхши йил бўлди десак адашмаймиз. Биринчидан, ўша мавсумда ўзининг биринчи дебютини ўтказди. Иккинчидан, профессионал лигадаги биринчи голини урди. Учинчидан, 2020 йилда у АҚШ терма жамоаси таркибида дебют қилди. Бу йигит ривожланиш учун катта имкониятларга ва катта имкониятларга эга. Юнус 17 ёшида дунёнинг энг яхши жамоаларига қарши ўйнамоқда: "Барселона", "Атлетико", "Реал". Агар Муса астойдил ишлашда давом этса ва мураббийининг ишончини оқласа, унинг келажаги порлоқ бўлади. Бунга шубҳа йўқ.
Жамшиджон Маҳмудов тайёрлади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Сурхон
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
