Токио-2020. Улуғбек Рашитов эронлик таэквондочини мағлуб этиб, ярим финалга чиқди
Ўзбекистонлик 19 ёшли таэквондочи Улуғбек Рашитовнинг ғалабали юриши давом этмоқда. Ҳамюртимиз олимпиададаги учинчи жангида ҳам ғалаба қозонди.
Чорак финалда ҳамюртимиз эронлик Мирҳошим Ҳуссайний рўбарў келди. Биринчи бўлимда спортчилар тенгма-тенг кураш олиб боришди ва Улуғбек 7:6 ҳисобида олдинга чиқиб олди.
Иккинчи раундда эса Рашитов устунликни ўз томонига оғдира бошлади ва ҳисобни 14:8га етказиб қўйди.
Эронлик таэквондочи учинчи раундда ҳисобдаги фарқни йўққа чиқаришга қаттиқ уринди ва очиқ жангга киришди. Маълум пайтга келиб ҳисобдаги фарқ бор-йўғи 4 очкони ташкил қилди. Аммо Улуғбек бўш келмади. Айниқса жангнинг сўнгги дақиқасида қандайдир 18 сония ичида Рашитов 12 очко жамғариб, рақибидан анча олдинга ўтиб олди. Якуний ҳисоб эса 34-22, Улуғбек Рашитов ярим финалда!
Ватандошимиз ярим финалда босния ва герцеговиналик Недзад Хушичга қарши даянга чиқади. Ушбу жанг Тошкент вақти билан 12:18да бошланади.
Киритилди: 11:43, 25.07.2021. Ўқилди: 4045 марта. Фикрлар: 0 та.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Бўлимга тегишли қизиқарли хабарлар