Дарҳақиқат, бу ўзини ҳар томонлама оқлади. Бу гуруҳдаги жамоалар орасида ҳамон интрига сақланиб қолган эди, албатта, «Ливерпул»дан ташқари. «Қизиллар» аллақачон плей-офф йўлланмасини нақд қилган эдилар. Аммо иккинчи ўрин учун бир варакайига «Атлетико», «Милан» ва «Порту» кураш олиб бораётгани мухлисларнинг мусобақага бўлган қизиқишларини оширгани турган гап.
Якунда эса ҳаммаси қандай тугаганини жуда яхши биласиз: мадридликлар португалияликларни мағлуб этиб, плей-оффга йўл олган бўлса, (3:1), «Милан» «Ливерпул»га ютқазиб, тўртинчи ўринга тушиб кетди.
Бу ердаги масала хронологик жиҳатдан жуда ҳам қизиқарли тус олди. Зеро, омадли жамоа номи сўнгги дақиқаларгача бир неча бор ўзгариб турди. Қуйида бу ҳақда қисқача тўхталиб ўтамиз.
1-дақиқа
Ҳакам учрашувларга ҳуштагини чалган пайтда «Ливерпул»да 16 очко, «Порту»да 6, «Милан»да 5 ва «Атлетико»да ҳам худди шунча очко мавжуд эди.
Бу ерда иккинчи йўлланма учун «Порту» энг яхши позицияга эга эди. Бироқ рақиб ҳам анча жиддий ва португалларнинг амалий жиҳатдан имкониятлари барибир паст баҳоланди. Кейинги босқичга чиқиш учун «Милан» ва «Атлетико»нинг рақибларини нисбатан яхшироқ тўп билан ютишларига тўғри келарди, айниқса, «россонерилар».
Чунки ҳал қилувчи баҳслар олдидан бу икки жамоада ҳатто тўплар нисбати ҳам бир хил кўрсаткичга эга эди. Аммо, миланликларнинг рақиби анча жиддийроқ «Ливерпул» ва Пиоли шогирдлари кўпчилик кутганидек, рақибига имкониятни бой бериб қўйди.
Бу қандай кечди?
29-дақиқа. Томорининг голи
Гуруҳдаги вазият:
«Ливерпуль» - 15 очко, «Милан» - 7, «Порту» - 6, «Атлетико» - 5.
Фикайо Томорининг голи ҳаммасини ўзгартириб юборди. Миланликлар шу заҳоти иккинчи ўринга кўтарилиб, «Порту»ни Европа Лигасига равона қилиш арафасида эди. Бу ерда «матрасчилар» эса яққол аутсайдерга айланиб қолишди.
36-дақиқа. Салоҳнинг голи
«Ливерпуль» - 16 очко, «Порту» - 6, «Милан» - 5, «Атлетико» - 5
Муҳаммад мувозанатни тиклаган паллада унинг жамоасидаги руҳият кескин кўтарилди. Зеро, «Ливерпул»нинг ушбу ўйиндаги ғалабаси жамоани ЕЧЛ гуруҳ босқич баҳсларининг барчасини ғалаба билан тугатган илк инглиз жамоасига айлантирар эди. Кейинчалик шундай ҳам бўлди. Мисрлик футболчининг голи «Милан»ни яна учинчи ўринга тушириб юборди.
55-дақиқа. Оригининг голи
«Ливерпуль» - 18 очко, «Порту» - 6, «Атлетико» - 5, «Милан» - 4.
Иккинчи бўлим бошида «Милан» бошлаган эртак бутунлай тугади: Дивок Ориги жамоасининг иккинчи голини урди. Бу миланликларни бир зумда тўртинчи ўринга тушириб юборди: параллель ўйинда эса «Порту» «Атлетико»га қарши баҳсда имкониятни бой бераётган эди.
56-дақиқа: Гризманнинг голи
«Ливерпуль» 18 очко, «Атлетико» 7 очко, «Порту» 5 очко, «Милан» 4 очко.
Параллель ўйиндаги Оригининг «Сан-Сиро»даги голидан бир неча сония ўтибоқ Португалияда Антуан Гризманн катта саҳнага чиқди. Бу гол «Атлетико»ни дарҳол иккинчи ўринга олиб чиқиши билан ҳам эътиборга молик эди. Энди «Милан»ни ҳатто «Ливерпуль» билан дуранг ҳам қониқтирмасди. Чунки ўзаро ўйинларда «Порту» «россонерилар»дан яхшироқ кўрсаткичга эга бўлган.
«Атлетико» ва «Порту» баҳси жуда тажовузкор руҳда ўтди: иккинчи бўлимда бор-йўғи саккиз дақиқа ичида жамоалар учта қизил ва учта сариқ карточка билан «сийланишди».
«Порту» 81-дақиқада тўртта ўзгариш билан ўйинни буриб юборишга ҳаракат қилди. Чунки плей-оффга чиқиш учун жамоага дуранг ҳам етарли бўлар эди. Аммо қолган дақиқаларда аксинча «Атлетико» яна иккита гол урди ва «Порту» бунга бир марта жавоб қайтара олди холос.
«Б» гуруҳ баҳслари якунлангач, қуйидаги воқеалар юзага келди:
• «Ливерпуль» гуруҳ босқичининг олтита ўйинида ғалаба қозонган биринчи инглиз жамоасига айланди. Умуман олганда, ушбу натижага жуда кам жамоа эришган: «Милан», «ПСЖ», «Спартак», икки марта «Реал», «Барселона», ва «Бавария». Энди «Аякс» ҳам бу мавсумдан ушбу жамоалар орасига қўшилди.
• «Милан» ўз гуруҳида бор-йўғи тўрт очко тўплади - Италия жамоалари учун энг ёмон натижалардан бири, 2004/05 йилги мавсумда фақатгина «Рома» «россонерилар»дан камроқ очко тўплаган - бир очко.
• «Атлетико» бу мавсум гуруҳда бор-йўғи етти очко тўплади – бу жамоанинг Диего Симеоне даврида Чемпионлар лигасидаги антирекордининг такрорланиши ҳисобланади. Мадридликлар ушбу мавсумдан олдин ҳам аввал икки марта бир хил 7 очко тўплашган эди.
Гуруҳда асосий эътиборни тортган жамоа барибир «Порту» бўлди. Кўпчилик португалларни «Атлетико» ва «Милан» билан кураш олиб боришига ишонмаган эди. Лекин улар буни имкон қадар уддалашди ва ҳеч бўлмаганда Европа лигаси йўлланмасини қўлга киритишди. Жамоа муҳим паллаларда аутсайдерга айланиб қолмади.
Юсуфбек Сайдалиев тайёрлади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
