Ўзбекистонлик футбол мухлислари учун шу пайтгача ушалмай келаётган орзу – ЖЧга йўл олиш. Аммо ҳар доим мундиалга бир қадам қолганда, бизникилар ҳаммасини барбод қилишади. Қизиғи, бу сафар МТЖ анча олдин таслим бўлди. Охирги саралаш босқичига чиқа олмаган Ўзбекистон терма жамоаси ҳозир Осиёдаги бор обрўсини йўқотиб бўлди. Хўш, бизнинг футболчиларга нима етишмайди? Уларнинг олдида қандай муаммолар бор? Яратиб берилган шароитлар камлик қиляптими? Шу каби саволлар ҳақида ҳозир батафсил сўз юритамиз.
Муаммолар ҳақида
Эътибор бериб қарасак, ён-атрофдаги мамлакатларда ҳам футбол жуда ривожланиб кетмаган. Фақат Россия ва Эрон биздан яққол устунлиги билиниб туради. Қолганлар ё биз билан бир даражада, ёки биздан кучсиз. Мана шу ҳам бизнинг ривожланишимиз учун тўсиқ бўла олади. Маълумки, рақобат бор жойда ўсиш бўлади, ривожланиш бўлади. Бизда эса бундай рақобат мавжуд эмас.
Тасаввур қилинг, ўзбек футболчилари кучли Европа клубларига ўтиши учун қайси йўлдан ўтиши мумкин? Биз кўрадиган ягона йўл – Россия. Бошқа вариант йўқ. Бор бўлса ҳам катта машаққат ва кўп пул билан ҳал қилиниши керак. Кўп футболчиларимизда эса бундай қобилият мавжуд эмас, тан олайлик. Пул топишлари мумкин, бироқ Европанинг машаққатли меҳнатига дош бера олмайди. У ерда футболни шунчаки мухлислар кўзига яхши кўриниш учун ўйнашмайди. У жойларда аллақачон футбол термини – бизнесга синоним бўлиб улгурган.
Яна бир томони, ўзбек футболида маошлар ўта юқори даражада. Тўғри, Еврофутболдаги маошлар олдида буниси ҳеч нарсадек туюлиши табиий. Бироқ Ўзбекистондаги бошқа соҳалар билан солиштирадиган бўлсак, бунисида ер билан осмончалик фарқни кўрамиз.
Тавсия қиладиган бўлсам, Ўзбекистондаги профессионал футболчиларга бериладиган маблағни икки баробар камайтириб, улар қайд этадиган натижалари учун бериладиган мукофот пулларини икки баробарга ошириш керак.
Қачон биз ҳам зўр бўламиз?
Ҳар сафар ҳар қандай ўзбек мухлиси томонидан бериладиган савол. Улар ҳам севимли жамоаларини энг кучли термалар билан ўйнашини орзу қилишади. Энг олди жамоалар олдида юртдошларини қўллаб-қувватлашни ҳаёл қилишади. Хўш, шундай самимий ва беғубор орзулар қачон амалга ошади? Буниси ҳақида аниқ жавоб бера олмаймиз. Зотан, биздан кўра Аллоҳ билгувчироқ. Биз фақат футболни тушунадиган инсон сифатида янада ривожланишимиз учун нима қилмоқ кераклиги борасида фикр айта оламиз, холос.
Демак, биз қандай фикрлар бера оламиз? Муаммоларга айтиладиган ечим сифатида, аввало, таниш-билишчилик ва коррупцияни йўқотиш керак дейишимиз мумкин. Соф рақобатни ташкил қилиш учун соғлом танловни йўлга қўйиш керак. Ёш футболчиларни кашф этиш, болалар футболига катта эътибор қаратиш лозим. Зеро, ёшларга берилган эътибор – келажакка берилган эътибор.
Ички чемпионат ҳақида гапиришга энди кеч. Шунда ҳам деярли ҳар йили ўзгартирилаверганидан чемпионатимиз оғир дамларни бошдан ўтказмоқда. Суперлига ҳеч қандай ўзгаришларсиз камида яна 5 йил шу тарзда давом этмоғи мақсадга мувофиқ бўлади.
Ҳа, футболимиз ростан ислоҳотларга муҳтож. Бироқ кескин чоралар кўриш, тезда юқори натижалар кутиш тўғри эмас. Тан олиш лозим, биз кўп йилларни бой бердик. Ундаги муваффақиятлар ҳам, қоқилишлар ҳам ҳаммаси ортда қолди. Ҳозир янги давр бошланмоқда. Шундай экан, янгича лекин оддий усуллар билан ривожланиш даркор.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
