Килиан Мбаппе – нафақат келажак, балки бугуннинг энг кучли футболчиларидан бери. Уни 5-6 йилдан бери биламиз-у, лекин ҳали ҳам номи тилга олинганда “ёш футболчи” ёки “келажак супер юлдузи” каби ибораларга кўзимиз тушади. Аслида Мбаппе аллақачон воқейлигимизнинг энг кучли футболчиларидан бирига айланиб улгурган, 19 ёшида жаҳон чемпиони бўлган бир тўлақонли шахс ҳисобланади. Лекин, қачонлардир... қачонлардир эмиш, кечагина бу шахс Франция пойтахтининг жиноятчилик ва зўравонлик урчиган бир ҳудуди – Бонди кўчаларида тўп тепиб юрган оддий болакай эди.
Қуйида биз жиноятчилар уясида Мбаппенинг қандай қилб футболчи бўлиб тарбиялангани, унинг асли африкалик бўлган спортчи ота-онаси, футболчи бўлмаганда мусиқачи бўлиши мумкинлиги, ўсмир чоғи “Челси” ва “Реал”нинг уни рад этиши-ю, бугунги кунга келиб қанча пул топиб, гаражида қандай машиналарни сақлаши ҳақида тўхталиб ўтамиз. Демак – кетдик!
1998 йил декабр, Франция. Париж атрофидаги Бонди мавзеси ўзининг бетартибликлар маркази, қонунга бўйсунмас муҳожирлар макони экани билан шуҳрат қозонганди. “13-ҳудуд” фильмини кўрган бўлсангиз гап нима ҳақида бораётганини тушуниб етишингиз осон бўлади. Франция терма жамоа 1998-йил ёзида мундиалда чемпион бўлганида ҳамма қатори бондиликлар ҳам байрам қилишган. Вильфрид ва Файза ҳам ёзда жуда қувонишган, Франция чемпион бўлганидан ҳам кўра, оилада янги меҳмон дунёга келиши ҳақидаги хабарини билишганидан кўпроқ қувонишган.
Килианнинг отаси Вильфрид асли камерунлик бўлиб, унинг томирида Нигерия ҳудудидаги туб қабилаларнинг ҳам қони оқарди. Унинг аждодлари ҳам Францияга кўпчилик қатори яхши ҳаётни кўзлаб етиб келганди. Ўзи эса маҳаллий лигалаларда тўп тепарди. Кейинчалик футболни ўзининг асосий касбига айлантирган Вильфрид мураббийлик билан ҳам шуғуллана бошлади. Килиан Мбаппенинг биринчи устози отаси бўлади. Онаси Файза Ламари эса асли марокашлик гандболчи эди. Бир сўз билан айтганда бу жиноятчилик урчиган мавзеда истиқомат қилувчи намунавий спортчилар оиласи эди.
Франция жаҳон чемпиони бўлганидан сўнг 6 ой ўтиб дунёга келган Килиан ва оиладаги бошқа болаларнинг атрофдаги муҳитдан салбий таъсирланиб қолмаслигини ўйлаб ота-онаси уларни доим бирор мушғулот билан банд қилиб қўярди. Айниқса 2005 йил комуннада юз берган бетартибликлар натижасида бинолар ва автомашиналар ёниб кетган, кўчада тўлиқ хаос юзага келганди. Бошқа жойга кўчиб ўтишга имкони бўлмаган Вильфрид ва Файза Килианни футбол ва санъат жумладан, мусиқага қизиқтирди. Маҳаллий жамоа мактабига қатнаб юрган Мбаппе айни вақтда 11 ёшигача консерватория қошидаги мусиқа мактабига ҳам борарди. “АС Бонди” клубида отасидан сабоқларни олар экан у тенгдошлари орасида дарҳол ажралиб қолди. Мбаппе тўпни эгаллаб олгач қайтиб ҳеч кимга беришни истамасди. Тезлик ва дриблинг ўша вақтидаёқ унинг устун жиҳатлари эди. Ўз машғулотлари тугаса ҳам отаси билан кечгача машқларда иштирок этган Килиан тез орада “Бонди” жамоаси турли совринларни олиб кела бошлади. Ўзи эса тонгда футбол билан уйғониб, тунда футбол билан уйқига кетарди.
Ота-онаси болани футболга янада қизиқтириш учун янги ҳоббилар ўйлаб топишарди. Бундай ишлардан бири юлдуз футболчилар билан Мбаппени таништириш, аниқроғи суратга тушириш ҳаракати эди. Яъни Килианга маълум вазифалар берилар, уларни бажарса отаси иложини қилиб бирор юлдуз футболчининг олдига бориб ўғли билан суратга тушишни илтимос қиларди. Тьери Анри, Зинедин Зидан ва Криштиану Роналду каби супер юлдузлар Мбаппе билан суратга тушганларида ёнларида турган болакай келажакда улар ўрнатган рекордларни янгилишини ўйлашмагани аниқ. Улар учун бу миллионлаб мухлислардан бири бўлган холос.
Давоми бор...
Ориф Толипов.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Нефтчи
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
