Дилшод Нуралиев бошқарувидаги Ўзбекистон ўсмирлар терма жамоаси (U16) 19 мартдан 2 апрелга қадар Туркияда ташкил этилган ўқув-йиғин машғулотларида иштирок этди. Унинг доирасида 6та ўртоқлик ўйини ташкил этилиб, ўсмирлар терма жамоаси шуларнинг 5тасини ўз фойдасига ҳал қилди. Бош мураббий Дилшод Нуралиев сўзларига кўра, мазкур йиғин расмий ўйинлар учун ас қотади.
«Туркия йиғини давомида бир қатор режаларни амалга оширганимиздан хурсандман. Гарчи Осиё чемпионати финал босқичига ҳали вақт бўлсада, унга ҳозирданоқ жиддий муносабатда бўлиш талаб этилади. Шу сабабли биз вазифага жиддий муносабат билан ёндошамиз. Ўйлашимча, йиғин футболчилар учун анча фойдали бўлди», дейди Дилшод Нуралиев.
Ўсмирлар терма жамоаси аъзосиларидан бош мураббий «Бухоро» ҳужумчиси Акобир Тўраев ва олимпия заҳиралари коллежи тарбияланувчиси Ислом Каримовни алоҳида таъкидлаб ўтди. «Футболчиларнинг кўпчилиги менда илиқ таассурот қолдирди. Айниқса Акобир Тўраев ва Ислом Каримовни ажратиб кўрсатишни хоҳлардим. Улар мени қувонтирган ҳолда тўғри йўлдан кетаётганликларини исботлаб беришди».
Ўсмирлар терма жамоасининг келгуси режалари ҳақида тўхталаркан Дилшод Нуралиев қуйидагиларни маълум қилди: «Навбатдаги йиғинни 22 апрель куни Тошкентда ташкиллаштиришни режалаштирганмиз. Шундан кейин биз Озарбайжонда анъанавий бўлиб ўтадиган «Каспий Кубоги»да иштирок этишга ҳаракат қиламиз. Мазкур мусобақа май ойининг сўнгги кунларида старт олади».
Ўзбекистон ўсмирлар терма жамоасининг Туркиядаги ўртоқлик ўйинлари:
1. Ўзбекистон (U16) – Украина (U17) 0:4
2. Ўзбекистон (U16) – «Зенит» (U16) 2:0
3. Ўзбекистон (U16) – «Зенит» (U15) 2:0
4. Ўзбекистон (U16) – «Реутов» (Москва) 8:1
5. Ўзбекистон (U16) – «Зенит» (U16) 2:0
6. Ўзбекистон (U16) – «Чертаново» (U17) 2:1
Ўсмирлар ўртасидаги Осиё чемпионати шу йилнинг 21 сентябрь – 6 октябрь кунлари бўлиб ўтади. ОФК эса мезбон мамлакат номини аниқлаб олмаган.
Матнда хатолик топсангиз, ўша хатони белгилаб, бизга жўнатинг (Ctrl + Enter).