Гарчанд коронавирус хавфи ҳали кетмаган, ҳаммада хавотир сақланиб турган бўлса ҳам, футбол давом этмоқда. Ўтган ой бир нечта катта трансферлар билан ёдимизда қолди. Айни вақтда Англия Премьер-лигаси ҳам давом эттирилди ҳамда воқеаларга бой ўтди. Кутилмаган комбеклар, чиройли голлар, дрон билан боғлиқ тартибсизликлар, чироқ ўчиб қолиши – буларнинг бари айнан АПЛда юз берди. Қуйида сизга шу ва шу каби воқеаларнинг энг яхши ўнталигини тортиқ этамиз.
10. «Норвич» Бенитеснинг «Эвертон»даги фаолиятини тугатди
Рафаэль Бенитес январь ойида ишидан айрилган иккита АПЛ менежеридан бири саналади. У меҳмонда «Норвич»га имкониятни бой бериб қўйгач, ўз вазифасидан озод этилган эди. Ўша ўйинда Майкл Киннинг автоголи ҳаммасини рамзан ифода этди. «Эвертон» ичидаги муҳит бузилганди. Ричарлисоннинг акробатик зарбалари ҳам Бенитесни қутқариб қола олмади.
9. Де Брюйне «Челси»га қарши феноменга айланди
Барча мухлислар Кевин Де Брюйненинг яхши даврлари ортда қолди деб ўйлаётган эди. Чунки жароҳатлар моҳир бельгияликни анча толиқтириб қўйганди. Шунга қарамай, у ўзининг собиқ клубига қарши супер даража кўрсата олди. Унинг сенсацион голи жамоасига ғалаба келтирди. Шунинг билан бирга гол чиройли тарзда киритилди.
8. Харрисон «болғачилар»ни болғалади
Жек Харрисон бу мавсум давомида атиги бешта гол урган. Аммо шулардан учтаси «Лондон стадиони»да, «Вест Хэм»га қарши киритилди. Собиқ «Манчестер Сити» ҳужумчиси Марсело Бьелсанинг қийналаётган жамоасига уч очо тақдим этди ва турнир жадвалидаги ҳолати яхшиланишини таъминлади. Бу мавсум фантастик ўйинлар кўрсатаётган «Вест Хэм» эса ўз уйида жазоланди. Хет-трик муаллифига айланган Харрисон, ўйин қаҳрамонига айланди.
7. Уорд-Провснинг «бўрилар» маконида қилган сеҳри
«Саутгемптон» аслида «Вулверхэмптон» уйида имкониятни бой бераётган эди. Январь ўртасида ўтказилган баҳсда битта эсда қоларли вазият юз берди. Ўйин тугашига олти дақиқа қолганида «авлиёлар» сардори Жеймс Уорд-Провс 30 ярд узоқликдан дарвоза томон жарима зарбасини йўллади. Дарвоза юқори бурчагидан жой олган тўпни олиш имконсиз эди. Жеймс эса айни дамда АПЛдаги энг яхши жарима зарбалари ижрочиси эканини исботлади.
6. Коутиньо АПЛга қайтишини нишонлади
«Астон Вилла» январь аввалида ҳаммани ҳайрон қолдирган трансферни амалга оширди. Жамоа «Барселона»дан Филлипе Коутиньони ижарага олди. Бунда Стивен Жеррарднинг хизматлари катта эди. Собиқ мерсисайдер АПЛга қайтишини ўзининг собиқ, аммо ашаддий рақиби бўлган «МЮ»га қарши битта ассист ҳамда гол билан нишонлади. Ўйин охирлаган пайтда Жакоб Ремзи пассини бразилиялик талант дарвозага тўғирлаб қўя олди.
5. «Норвич» «Уотфорд»ни қоронғуликда жазолади
Ўша оқшом «Викерейж Род» ўйингоҳидаги мухлислар ҳақиқий драмани гувоҳи бўлишди. «Норвич» ушбу ўйинни диққат билан назорат қилди ва ўз рақиби уйидан ҳақли уч очкосини олиб кетди. Америкалик ҳужумчи Жош Саржент иккита гол билан меҳмонларни сийлаган бўлса, мезбонлар таркибида Эммануэль Денис қизил билан «сийланди». «Буғулар» устози Клаудио Раньери эса истеъфо беришга мажбур бўлди. Ушбу ўйинда стадион ёриткичлари ишламай қолиб, бир муддат қоронғулик ҳам ҳукм сурган эди.
4. Зиеш «шпорлар»га қақшатқич зарба берди
Хаким Зиеш «Тоттенхэм»га қарши ғалабада, мухлислар ундан кутган ўйинни намойиш эта олди. Иккинчи бўлиб аввалида унинг «сеҳрли» чап оёғидан учган тўп, тўғри бориб, дарвозанинг юқори бурчагига жойлашди. Ҳақиқатдан ҳам ўша куни марокашлик юлдузни тўхтатиш осон кечмади. Ўйин эса 2-0 ҳисобида «шерлар» фойдасига ҳал бўлди.
3. Ковачич «Ливерпуль»га қарши комбекни амалга оширди
Янги йилнинг иккинчи кунида ўтказилган баҳс «Челси» учун омадсиз бошланди. Ярим соат ичида «Ливерпуль» иккита гол фарқи билан олдинда бораётган эди. Шунга қарамай, мезбонлар ўйинга қайтиб ола билишди. Бу қайтиш қандайдир тўрт дақиқа ичида рўй бергани эса эътиборга молик жиҳатлардан бири саналади. Ковачичнинг жарима майдончаси чизиғидан йўллаган фантастик зарбаси голга айланди. Орадан кўп ўтмай, Кристиан Пулишич фарқни йўққа чиқара олди.
2. Дебютант уйида дрон сабаб тартибсизликлар келиб чиқди
«Брентфорд» уйидаги ғалаба «Вулверхэмптон» январь ойини юз фоизлик натижа билан тугаллашига замин яратди. Аммо бу ўйин бошқа бир воқеа билан эсланадиган бўлди. Учрашувда иккита тўхталиш юз берди. Бирида омма ичида тартибсизликлар келиб чиққан бўлса, бошқаси стадион узра дрон кўриниш бергани сабаб юзага келди. Қолаверса, орада ҳакамлар мосламаси ҳам панд бериб, қисқа тўхталиш ҳам бўлиб ўтди.
Агар бу ҳам камлик қилган бўлса, «арилар» устози Томас Франк ўйин тугагач, иккинчи сариқ карточка билан майдонни тарк этишга мажбур бўлганини ҳам қўшиб қўйиш мумкин.
1. Бергвейн «Тоттенхэм»га иложсиз вазиятда уч очко тақдим этди
Рўйхатда фақат битта ғолиб бўлиши мумкин. Бу воқеа 19 январь куни «Лестер Сити» уйида юз берган. Гарчанд «шпорлар» кучли ўйин кўрсатган бўлса ҳам, ўйин охирлаётган пайтда 2-1 ҳисобида ортда қолаётганди. Аммо нима ҳам бўлди-ю, «King Power» стадиони ларзага келди. Ўйинга 5 дақиқа қўшиб берилган, ўша вақт эса поёнлаб қолганди. Нидерланд ўғлони эса айни дамда гол уриб, жамоасини бир очколи қилди. Аммо бу ҳаммаси эмасди. Марказдан бошлаган мезбонлар тўпни яна рақибга топшириб қўйди. Оқибатда эса Стивен Бергвейн яна бир бор рақиб посбонини доғда қолдирди. Ҳаммаси арзимаган бир ёки икки дақиқа ичида юз берди. Аммо «Тоттенхэм» уч очко билан уйига қайтадиган бўлди. Тартибсизликлардан унумли фойдаланган жамоа мукофотланди. Заҳирадан туширилган Бергвейн эса ўйин қаҳрамонига айланди.
инглиз тилидан Жалолиддин ИСМАТОВ таржимаси
Матнда хатолик топсангиз, ўша хатони белгилаб, бизга жўнатинг (Ctrl + Enter).