Сесар Аспиликуэта ушбу мавсум тугаши билан "Челси"ни тарк этиши мумкин. Агар у шундай қилса, клуб афсонаси сифатида ўз статистикасини ошира олмайди. 32 ёшли жамоа сардори қарийб ўн йилдан буён "аристократлар" билан бирга ва клуб сафида саккизта совринни қўлга киритишга улгурган. Испания терма жамоаси аъзоси мухлислар кўз-ўнгида жамоаси учун мисоли қоя каби кўринади. У жамоага 2012 йилда "Марсель" сафидан келиб қўшилган ва ўшандан буён икки бор АПЛ чемпионига айланган. Аспиликуэта, шунингдек, жамоасига икки бор Европа лигаси тожини, битта мамлакат кубогини, яна бир маротаба лига кубоги ҳамда ўтган йилги ЕЧЛ ғолиблигини олиб беришда жонбозлик кўрсатган эди. Ҳимоячининг сўнгги титули ўтган йили "Вильярреал"га қарши баҳсда, Европа Супер кубогида қўлга киритилган.
"Челси"нинг барча даврлардаги совриндор футболчилари рўйхатида Сесар Аспиликуэта саккизта титул билан Гари Кэхилл қайд этган натижани такрорлаб турибди. 36 марта Испания термаси шарафини ҳимоя қилишга улгурган юлдуз, "Челси"нинг шонли вакиллари ичида топ даражада дея олмаймиз. Чунки биринчи ўринни эгаллаб турган собиқ сардор, етакчи ҳамда афсонавий футболчи Жон Террида 15 та катта совринлар жамланмаси мавжуд. Шунингдек, рўйхатдаги кучлилар қаторидан Петр Чех (13 та), Дидье Дрогба (12 та), Френк Лемпард ҳамда Пауло Феррейралар (ҳар иккисида 11 тадан) жой олган.
Тўғри, Апскиликуэтанинг кучли бешликка етиши деярли имконсиз иш. Аммо унда яқин кунлар ичида совринлар борасида Эшли Коул ҳамда Бранислав Ивановичга етиб олиш имкони бор. Чунки бу икки собиқ юлдуз ўтмишда "Челси" билан 9 та соврин ютган. Сесар эса Клублар ўртасидаги жаҳон чемпионатини ютиш орқали уларга тенглашиб олиши мумкин. Албатта, испан "жангчиси" бундан ўн йил илгари бой берилган совринни қайтариб олиш йўлида қаттиқ ҳаракат қилади. Ўшанда Аспиликуэта "Челси"даги дебют мавсумида финал ўйинида жамоадошлари билан "Коринтианс" клубига имкониятни бой бериб қўйганди. Умуман олганда, Клублар мундиали "Челси" юта олмаган тарихдаги ягона титул ҳисобланади. Шу туфайли жамоа сардори клубдаги эҳтимолий сўнгги мавсумини яна бир йирик соврин билан тўлдиришни мақсад қилиб олган. Кейин эса, ёзда "Барселона"га эркин агент мақомида бориб қўшилиши мумкин бўлади.
Сесар Аспиликуэта ФИФА томонидан ташкил этилган мусобақа ҳақида ўз фикрлари билан ўртоқлашди. У шундай дейди: "Ўйлашимча, бу турдаги мусобақада ғалаба қозониш жуда мураккаб иш. Мен шу нарсани ўн йилдан кейин англаб етяпман. Ўшанда биз (2012 йил) "Коринтианс"га имкониятни бой бериб қўйгандик. Турнирдан кейин нималарни ҳис қилганим жуда яхши эсимда. Ҳа, менинг жамоадаги илк мавсумим эди, биз ҳар бир турнирда иштирок этаётган эдик. Шу сабабданми, бизга мусобақаларда ғалаба қозониш аслиятдагига қараганда жўнроқ туюлгандир. Аммо мана бугун, ҳозир, мен тушуниб етдимки, бу ерга етиб келишни ўзи бўлмас экан. Бу ўта узун ва қийин йўл экан. Аввало, сиз ЕЧЛ йўлланмасини қўлга киритишингиз керак, кейин эса ҳамма тўсиқларни енгиб, турнирни ютиб чиқишингиз шарт. Фақат шу орқали, бу ерда бўла оласиз. 2012 йилдаги мағлубият бизни жуда ҳам хафа қилганди. Мана, ҳалигача бу турнир "Челси" забт эта олмаган ягона чўққилигича қолмоқда.
Менимча, бу мусобақани ютиш, жамоадаги ҳамма учун ўта катта муваффақият бўлади. Шу сабаб барчамиз майдонда боримизни бериб ҳаракат қиламиз. Биз шуни ҳам ёдда тутишимиз керакки, "Челси" бу ерга нафақат ўзини, балки бутун Европанинг шарафини ҳам ҳимоя қилиш учун келган!".
Футболчи ўзининг яқин келажаги ҳақида гапирар экан, жумладан, шундай дейди:
"Менинг тақдирим айни дамда ҳеч қандай аҳамиятга эга эмас. Асосий мақсадим, умуман, жамоа мақсади қандай бўлмасин – соврин ютиш. Кейин нима бўлишини эса, вақт кўрсатади. Ўйлайманки, ҳар бир футболчи клубига титул олиб беришда кўмаклашиб, айни дамда ўз тарихини ҳам ёзиб боради. Мен йиллар давомида жуда кўп жаҳон даражасидаги футболчиларни, мураббийларни кўрдим, улар билан бирга ишладим. Аммо ҳар доим ҳамманинг мақсади битта бўлди. У ҳам бўлса, клуб манфаати йўлида, унга соврин олиб келиш мақсадида курашиш эди.
Мана, ҳозир ҳам айни шу мақсад йўлида ҳаракатдамиз. Ўйлайманки, ҳозир айни вақти. Чунки бизда "Челси" тарихида абадий қолиш, клубга янги кубокни тақдим этиш имконияти бор. Умид қиламанки, биз тез орада ана шундай инсонлардан бирига айланамиз".
Эслатиб ўтамиз, "Челси" ушбу турнирга ярим финалдан келиб қўшилади. Клубнинг дастлабки рақиби эса Саудия Арабистонининг "Ал-Ҳилол" жамоаси бўлади.
Жалолиддин ИСМАТОВ таржимаси
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
