"Локомотив"нинг Биринчи лигадан Олий лигага чиқишида унинг украиналик легионери Арсен Манасян ҳам улкан ҳисса қўшди. Футболчи Олий лигада 29та гол уриб, Зайниддин Тожиевдан кейин тўпурарлар танловида иккинчи ўринни эгаллади. Лекин ҳужумчи ушбу мавсумда темирйўлчилар шарафини ҳимоя қилмайди. Манасян Украинанинг www.football.ua сайтига берган интервьюсида Ўзбекистондаги бир йиллик фаолияти ҳақида сўзлаб берди.
— Ўз вақтида "Энергия" сафида ўйнаб, жамоанинг профессионал фаолиятга ўтишида кўплаб голларингиз орқали ёрдам бергансиз. Кейинчалик эса жамоани ташлаб, Тошкентга йўл олдингиз. "Локомотив" варианти қандай пайдо бўлганди?
— Отам бу жамоани қабул қилиб олди ва унинг олдига Олий лигага чиқиш вазифаси қўйилди. 2011 йил январь ойида Тошкент варианти пайдо бўлди ва клуб раҳбарлари билан музокаралардан кейин февраль ойида "Локомотив"га қўшилдим.
— Отангиз мураббий сифатида ўғлига қандай муносабатда бўлди?
—Албатта, отам қўлостида ўйнаш оғир. Бу — икки ҳисса масъулият дегани.
— "Локомотив"даги шароитлар қандай эди?
— Шароитлар аъло даражада эди. Боиси, олдимизда Олий лигага чиқиш вазифаси турганди. Ҳомийимиз эса Ўзбекистон темирйўллари компанияси эди.
— Тошкент ёқдими? Шаҳарни томоша қилишга улгурдингизми?
— Шаҳар жудаям гўзал, чиройли бинолар талайгина. Шаҳарнинг эътиборга молик жойларини айландим. Шаҳар замонавий бўлса-да, Осиё руҳияти сезилиб туради. Турмуш ўртоғим билан музей ва театрларга бордик. Таомлар эса... Ўзбек таомлари — мен таътиб кўрган миллий таомлар ичида энг яхшиси. Менга уларни танаввул қилиб кўриш насиб қилди!
— Сўнгги йилларда ўзбек футболида шов-шувлар кўп бўлмоқда. Бошқа жамоаларнинг, масалан, ўша "Бунёдкор"нинг ўйинларини кузатдингизми? Ривалдо билан учрашмадингизми?
— "Насаф" - "Пахтакор" ўйинини стадионда кўрдим, шунингдек, "Бунёдкор"нинг Осиё чемпионлар лигасидаги 2та ўйинини кўрдим. Ривалдони эса кўрмадим. Лекин ҳақиқатдан ҳам мамлакатда футбол ривожланмоқда. Чемпионатда кучли жамоалар ва яхши легионерлар бор.
— Айтишларича, Ўзбекистонда аксарият вақти жазирама иссиқдан иборат экан. Бунга қандай кўникдингиз?
— Ҳа, иссиқ. Лекин чидадим.
— У ернинг Биринчи лигаси, умуман футболи ҳақида таассуротларингиз қандай? Стадионлар, ўйинлар савияси, услуби...
— Ўз олдига Олий лигага чиқиш вазифасини қўйган жамоаларда стадионлар ҳам, майдонлар ҳам, база ҳам яхши ҳолатда. Албатта, қашшоқроқ жамоалар ҳам бор. Умуман олганда эса чемпионат савияси яхши. 6-7 жамоа ўз олдига жиддий мақсадларни қўяди.
— Клуб манзили — Тошкент, Тарас Шевченко кўчаси. Унга атаб ҳайкал қўйилмаганми?
— Йўқ. Ҳайкал аниқ йўқ эди.
— Нима учун жамоада мураббий ўзгарди? Энди у ерда Оганесян ишлаётган экан.
— Ҳа, ҳозирда у бош мураббий ҳисобланади. Мураббийнинг ўзгарши ҳақидаги саволни эса клуб президентига бериш керак. Биз ўз олдимизга қўйган вазифани бажардик.
— Бу муваффақиятда сизнинг ҳиссангиз ҳам улкан булди — 30та гол урдингиз...
— Чемпионатда 29та, Кубокда битта гол урдим. Мавсум яхши ўтди. У ерда тўплаган тажрибам менга кейинчалик наф беради деган умиддаман.
— Сизни баҳорги мавсум учун "Энергия"га "заявка" қилишди. Наҳотки, "Локомотив"ни Олий лигага олиб чиқиб, у ерда ўйнашни истамадингиз?
— Хоҳлардим. Аммо у ердан отам кетди, унинг кетидан мен ҳам...
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
