Ўтган ёзда бир нечта мега трансферлар амалга оширилган эди. Клублар ҳар қандай футболчини катта маблағ эвазига сотиб олар экан, унга улкан умид боғлайди. Биз бугун АПЛ жамоалари харид қилган футболчилар ҳақида сўз юритамиз. Хўш юз миллионлаб сарфланган пуллар ўзини қанчалик оқлади? Қуйида ана шундай «қимматбаҳо» футболчиларнинг учтаси ҳақида гап боради.
Жек Грилиш – 100 миллион фунт-стерлинг
Грилиш «Манчестер Сити»га ўтганидан то ҳозирга қадар АПЛ доирасидаги баҳсларда жами 20 марта асосий таркибда, 3 та учрашувда эса захирадан майдонга ташланади. Унинг майдонда ҳаракат қилган вақти 1,728 дақиқани ташкил этади. Бу статистика футболчининг «Астон Вилла» сафида 2020-2021 йилги мавсумда энг ёмон ўтказган (жароҳатлар сабаб) давридаги тенг кўрсаткичдир. Шундай бўлсада у ўтган мавсум давомида жамоа етакчиси сифатида 12 та ассист ҳамда 6 та гол уришга муваффақ бўлган.
Шунга қарамай, Грилиш унга нисбатан энг кўп қоида бузиладиган футболчилар ичида етакчилардан биридир. У бу борада ўртача 2,2 марталик кўрсаткичга эга. Яъни унга нисбатан ҳар бир ўйинда икки мартадан кўпроқ фол ишлатилади. Аммо бу статистика ўтган мавсумдагига қараганда икки баравар камроқдир (4,2 марта). Ярим ҳимоячи, шунингдек, ҳал қилувчи узатмалар бериш борасида ҳам бу мавсумда анча пастлаган. Грилиш бу борада Англияда иккинчи ўриндан (ўртача ҳар бир ўйинда 3,1 та) ўнинчи ўринга (ўртача 1,9 та) тушиб қолди.
Ўзининг ЕЧЛдаги илк баҳсида гол ва ассист билан катта умидлар уйғонишига сабабчи бўлган Грилиш, кейинчалик кўринмай қолди. Хусусан, у 5 та ЕЧЛ баҳсида на гол ва на ассист қайд этди. Жамоасининг сўнгги иккита плей-офф ўйинини эса захирадан кузатишга мажбур бўлди. Шунга қарамай, 100 миллионлик футболчидан ҳали ҳам кўп нарсалар кутилмоқда. Грилиш «Манчестер Сити» сафида миллий чемпионат доирасида 2 та ассист муаллифига айланди. Бу дегани ҳар бир ассистнинг нархи 50 миллион фунтдан баҳоланади. Кўрамиз, унинг кейинги тақдири қандай кечар экан...
Ромелу Лукаку – 97,5 миллион фунт
Ўтган мавсум Лукаку «Интер» билан чемпион бўлганди. Ўшанда Бельгия ҳужумчиси 36 та баҳсда 24 та голга муаллифлик қилади. «Челси» билан эса баъзи пайтларда унга захирадан тушишга ҳам имкон берилмаяпти (масалан, «Эвертон» билан мағлубиятли баҳсда). Лукаку 2022 йил кириб келганидан бери ҳали АПЛда гол урмади. Сўнгги 20 та ўйинда эса атиги 2 та голга муаллифлик қилди, холос. Унинг ҳар бир ўйинда рақиб дарвозасига ўртача зарба бериш кўрсаткичи 1,3 тани ташкил этди. Бу эса АПЛда 75 ўрин демакдир. Ҳужумчининг узатмаларда иштирок этиш кўрсаткичи ҳам анча аянчли аҳволда.
Ромелу Лукаку «Челси»нинг Англия кубогидаги ўйинларининг бештасида асосий таркибдан жой олганди. Ушбу баҳслар давомида эса 3 та гол уришга эришди. Шунингдек 28 ёшли футболчи ҳисобида 2 та клублар ўртасидаги Жаҳон чемпионатида урилган голлар ҳам мавжуд. Аммо 100 миллионлик ҳужумчингиз бўлганидан кейин, уни «Ливерпуль» ёки «Манчестер Сити»га қарши ўйинда гол уришини истайсиз. Қандайдир «Честерфилд» билан ўйинда эмас. Шундай қилиб, Лукакунинг «Челси»да урган ҳар бир голи клуб учун 19,5 миллион фунтга тушди. Келажакда Ромелу Лукакунинг ишлари яхшиланиб кетишига тилакдошмиз.
Жейдон Санчо – 76,5 миллион фунт
«Манчестер Юнайтед» ўтган мавсумни 2 ўринда, «Ливерпуль»дан 5 очко кўп тўплаган ҳолда якунлаган эди. Айни дамда эса «қизил иблислар» ўзларининг ашаддий рақобатчиларидан 27 очкога ортда қолмоқда. Аслини олганда, «МЮ» бу мавсумда чемпион бўлишни ният қилган эди. Шу мақсадда Жейдон Санчони «BVB»дан 76,5 миллионга харид қилган. Аммо кўчиш омадли бўлмади. Санчо ўтган мавсумни Бундеслигада 17 гол ҳамда 17 ассист билан якунлайди. Бу мавсумда эса жами 29 та АПЛ баҳсида 3 та гол ва 3 та ассист қайд этди, холос. Орадаги фарқ анча сезиларли. Шу сабаб ҳужумчининг бозор нархи 18 миллион фунтга пастлаб кетди. Қолаверса, бошқа майда статистикалар, жумладан, муҳим пасслар бериш, дриблинг ҳамда голларда қатнашиш фоизлари ҳам кескин пастлади. Санчо «МЮ»нинг февраль ва март ойларидаги учрашувларида 3 та гол ва 2 та ассистга муаллифлик қилган. Бироқ апрелдаги сўнгги бешта ўйин инглиз футболчиси учун омадсиз ўтди. «МЮ» мухлислари (балки раҳбарияти ҳам) эса унга сарф қилинган пулларга ачина бошлади. Чунки айни пайтда Санчонинг ҳар бир берган голли узатмаси жамоага 25,2 миллион фунтга тушиб турибди. Биз эса Жейдон Санчонинг кейинги мавсумларда ўз даражасига қайтиб олишига умид билдирамиз.
Жалолиддин ИСМАТОВ таржимаси
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
