Карим Бензема ҳозирча Чемпионлар Лигасининг жорий мавсуми асосий юлдузи ҳисобланади. Франциялик жуда ажойиб ўйин кўрсатмоқда ва биз қўрқмай айта оламизки, "Реал" Каримсиз ЕЧЛ финалига, ҳамда Ла Лигада чемпионликни қўлга кирита олмасди.
Бензема Чемпионлар лигасининг ушбу мавсумида 11 ўйинида 15 та гол уришни уддалади. Карим шулардан 9 тасини плей-офф ўйинларидаги 6 та баҳсда киритди. "Реал Мадрид" аввалига Месси, Неймар ва Мбаппе каби топ футболчилари бор “ПСЖ”ни, кейин эса амалдаги турнир ғолиби "Челси"ни, ярим финалда эса ўтган йилги финалчи "Манчестер Сити"ни мағлуб этди ва мазкур турнир финалига йўл олди.
Фаолиятининг кўп қисмини Роналдунинг соясида ўтказган француз, ниҳоят, жаҳон юлдузи мақомини ўзиники қила олди. Кўплаб журналист ва мухлисларнинг эътироф этишича, Бензема ушбу мавсум “Олтин тўп”ни қўлга киритиши мумкин. Шунинг учун футболчига ҳозирда тобора кўпроқ эътибор қаратилмоқда.
Нафақат “Реал” мухлислари, балки футболга беэътибор бўлмаган чарм тўп иҳлосмандлари борки, Бензема ҳар бир ўйинда қўлини оқ бинт билан боғлаб юришини билишади. Мана 3 йилдирки, Карим ушбу одатини ҳеч канда қилмайди. Аммо кўпчилик бунинг асл сабабини билишмайди. Хўш, Бензема нима учун қўлини боғлаб юради? Бу шунчаки имижми ёки бошқа сабаби борми?
Бензема 2019 йилнинг январ ойидан буён ҳар бир учрашувда қўлини боғлаб майдонга тушади. Аслида, бунинг сабаби футболчининг қўлидан олган жароҳатидир. У Ла Лига ўйинларининг бирида "Бетис" ҳимоячиси Марк Бартра билан тўқнашиб кетди ва бармоғини синдириб олди. Карим зудлик билан шифохонага олиб борилди. Шифокорларнинг дастлабки хулосаси шу бўлди - операция қилиш керак.
"Аввалига кимдир бармоғимни тош билан ураётгандек, кейин эса худди уни кесиб ташлаётгандек ҳис қилдим", - деб эслайди ҳужумчи. "Операциядан кейин клуб шифокори ҳаммаси яхши бўлишини айтди, лекин менда бироз шубҳа бор эди".
Шифокорларнинг сўзларига кўра, операциянинг оқибатларини олдиндан айтиб бўлмайди ва Каримнинг тикланишига икки ойга вақт керак эди. Форвард америкалик шифокорлар билан операциясиз даволаш мумкинми, деб маслаҳатлашди, аммо салбий жавоб олди.
Ўшанда "Реал"нинг на Ла Лигадаги, на Чемпионлар лигасидаги ишлари яхши эмас, клуб сафида Бенземадан бошқа айтарли ҳужумчи йўқ эди (ҳозир ҳам шундай). Шунинг учун Карим операцияни бошқа санага қолдиришга қарор қилди.
2019 йилнинг ёзида Бензема операция қилинди, аммо янги мавсумгача тезроқ сафга қайтишга ҳаракат қилди бўлди ва машғулотларнинг бирида яна ўша кичик бармоғини жароҳатлаб олди. Вақтни бой бермаслик учун Карим иккинчи операциядан бош тортди. 2020 йилда Бензема Франция терма жамоаси билан Европа чемпионатига йўл олди, шу сабаб яна иккинчи операцияни қолдирилди.
Операция қилиш учун бошқа вақт йўқ эди. "Реал Мадрид" бугунги кунгача Бенземасиз ҳеч бир натижага эриша олмайди. Буни Карим ҳам, “қаймоқранглилар” раҳбарияти ҳам яхши билади. Бензема том маънода жамоага ёрдам бериш учун ўз соғлиғини қурбон қилди.
Бензема ҳозир ҳам кичик жароҳат билан ўйнамоқда. У синган бармоғини тиббий бракет билан мустаҳкамлаган. Оддий ҳаётда Карим ушбу “ёрдамчи”сиз юради ва унинг ижтимоий тармоқларидаги суратлари орқали кичкина бармоғи қандай кўринишда эканлигини кўришингиз мумкин.
Мадриддаги нуфузли клиникаларидан бирининг шифокори Маrcа нашрига берган интервьюсида тўлиқ тафсилотларни айтиб берди: “бармоқ учун гипс ясаш ва уни қўлга мустаҳкамлаш учун 20 дақиқа вақт кетади. Унинг нархи тахминан 40 евро”.
Бенземанинг қарори қандайдир ғалати бўлиши мумкин. Аммо, Карим бу жароҳатни олган пайтдан бошлаб фаолиятидаги энг яхши даврни ўтказмоқда. Ушбу мавсум якунида франциялик футболчи жарроҳлик амалиётини ўтказиш ва тикланиш имкониятига эга бўлиши мумкин. Сабаби, 2022 йилнинг ёзида халқаро мусобақалар ўтказилмайди. Фақатгина, қишга келибгина, Қатар майдонларида жаҳон чемпионати бошланади. Демак, келаси мавсумда Бенземани қўлидаги бинтсиз кўришимиз мумкин. Аммо шуни таъкидлаш керакки, бу аллақачон Карим учун имижга айланиб улгурган.
Жамшидбек Маҳмудов тайёрлади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
