Энг яхши футболчини йўқотиш ҳар қандай жамоага катта зарба беради. Уларни текинга қўйиб юбориш эса икки карра ёмонроқдир. Масалан, "ПСЖ" Мбаппени йўқотишига озгина қолди. "МЮ" эса Погбани текинга қўйиб юборди. Қуйида Премьер-лиганинг энг яхши ўнта клубининг энг қиммат футболчиларини санаб ўтамиз.
Букайо Сака – "Арсенал" (58,5 миллион)
Жамоада энг яхши тўпурар ҳамда ассистент бўлган Сака, "Арсенал"нинг ишонган ўйинчиси бўлиб турибди. У 2020 йилнинг июлида 2024 йилга қадар мўлжалланган битимга имзо чекканди.
Эми Буендиа –"Астон Вилла" (31,5 миллион)
Буендиа ўтган ёзда "Норвич"дан олиб келинган эди. Ярим ҳимоячи янги жамоасида анча қийналди. Аммо мавсум сўнгида ўзини кўрсатиб, 6 та ўйинда 2 та гол ва шунча ассистга муаллифлик қилди. Буендианинг амалдаги битими эса 2026 йилда якунланади.
Ришарлисон – "Эвертон" (45 миллион)
Бразилиялик ҳужумчига айни дамда "Тоттенхэм", "ПСЖ" ҳамда "Реал" қизиқмоқда. Шу сабаб бу ёзда "Эвертон" уни йўқотиши мумкин. Унинг амалдаги битими 2024 йилга қадар тузилганди. Шунингдек, Калверт-Льюин ҳам янги жамоага йўл олади.
Ромелу Лукаку – "Челси" (76,5 миллион)
Лукаку эндигина келганига қарамай, кетишга тайёр футболчи сифатида қаралмоқда. Бельгиялик бу мавсумда АПЛ доирасида 8 та гол урди. Бу дегани унинг ҳар бир голи "Челси" учун 12 миллион фунтга тушган. Лукаку 2026 йилга қадар "Челси"да бўлиш ҳуқуқига эга.
Вильфрид Заха – "Кристал Пэлас" (36 миллион)
Заха ўзи тузган 5 йиллик битимнинг сўнгги даврига етиб келди. Ҳужумчи афтидан "бургутлар" билан янги шартнома имзоламайдиган кўринади. Унинг битими эса 2023 йилга қадар тузилган.
Калвин Филлипс – "Лидс" (45 миллион)
Агарда "Лидс" Чемпионшипга қайтганида, Филлипс шубҳасиз жамоасини тарк этган бўларди. Футболчининг ўзи "Лидс"да қолишини айтган. Аммо у яқиндагина агентини алмаштириб, кетиши мумкинлигига ишора қилди. Англия терма жамоаси аъзоси "Лидс" билан 2024 йилга қадар шартнома имзолаган.
Вильфрид Ндиди – "Лестер" (54 миллион)
Ндиди жароҳатлари сабаб бу мавсумда "тулкилар"га 19 марта ёрдам бера олди, холос. Жамоа устози Бренден Рожерс унинг йўқлигини, ярим финалда "Рома"га мағлуб бўлишнинг асосий омили сифатида кўрсатганди. Нигериялик ҳужумчининг "Лестер"даги шартномаси 2024 йилгача тузилган.
Муҳаммад Салоҳ – "Ливерпуль" (90 миллион)
Гарчанд мисрликнинг амалдаги битими 2023 йилда якунланса ҳам, ҳали шартномани янгилашга улгургани йўқ. Салоҳнинг ўзи "Энфилд"да қолишни исташини билдирган. Агарда "Ливерпуль" уни сотишни истамаса, у ҳолда, тезда Салоҳга янги, футболчини қониқтирадиган битим таклиф этиши лозим.
Кевин Де Брюйне – "Ман Сити" (81 миллион)
Бу мавсумда АПЛнинг энг яхши футболчиси деб топилган ярим ҳимоячи "шаҳарликлар"га 2025 йилга қадар ёрдам бериш ҳуқуқига эга. У ўз шартномаси ҳақида шундай деганди: "Менда яна 3 йил бор. Бу вақтни эса шу ерда ўтказишни истайман. Чунки бу клуб айнан мен хоҳлаган жой".
Фернандеш – "МЮ" (81 миллион*)
Протугалия терма жамоаси аъзоси апрель ойида "қизил иблислар" билан тузган битимини 2026 йилга қадар узайтирган эди. Фернандеш бу вақт давомида ҳафтасига 240 минг фунт маош олиши белгиланган. Аниқки, "МЮ" уни ҳеч қаёққа қўйиб юбормайди!
ИСМАТОВ Ж.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
