Айни вақтда "Насаф"нинг қайси бир мухлиси билан суҳбатлашманг, ҳаммаси иккинчи даврада "Насаф"га бошқа мураббий келиши кераклиги ҳақида гап очади. Мухлисларнинг бир қисми "Демяненкони яна қайтариш керак", дейишса, яна айрим мухлислар "Абрамовнинг ўрни "Насаф"да" дейишмоқда. Бошқа бир гуруҳ мухлислар эса "Насаф"ни Бердиевга ишониб топшириш керак", деган фикрни олға суришмоқда.
Хўш, мухлисларнинг бу қарашлари кимдир томонидан инобатга олинадими ёки шунчаки мунозаралигича қолиб кетадими? Келинг, юқоридаги фикрларни таҳлил қилишдан олдин бир ҳикоя билан танишиб чиқайлик:
Муҳиддин тоға ўғли Насимнинг сўнгги кунлардаги ўйинқароқлигидан норози шекилли фанлардан ўзлаштиришини текшириб кўриш мақсадида ёнига чақирди. Бир вақтлар ўзи мактабда аъло баҳоларда ўқиган эмасми, ўғлига ҳар хил фанлардан савол бериб, билимини текшириб кўра бошлади. Ҳамма фанлардан яхши-ю, негадир математикага келганда анча нўноқлиги сезилиб турарди. Ўғлининг математикадан нўноқлигидан анчагина ранжиган Муҳиддин тоға қўшниси Умар домлани олдига маслаҳатга чиқди. Ахир Умар домла ҳам ўғли ўқийдиган мактабда ишлайди. Муҳиддин тоға қўшнисидан математика ўқитувчиси ҳақида сўраб билмоқчи бўлди. Салом аликдан сўнг Умар домла бир хўрсинган кўйи қадрдон қўшнисига вазиятни тушунтира кетди:
- Математикадан яқингача Бердиқулов деган ёш таълантли ўқитувчи дарс берарди. Ўқувчиларнинг кўрсаткичлари Дўрмонов давридагидай бўлмаса-да, ҳар ҳолда туманда биринчиликни мактабимиз ҳеч қайси мактабга бермай келаётган эди. Нимадир бўлдию, "замдиректор"римиз Тошпўлатов уни ишдан бўшатиб, математика ўқитувчилигини ўз қўлига олди. Унга ҳеч ким ҳеч нарса дея олмади. Ўқувчиларнинг кўрсаткичи кескин тушиб кетди. Ҳатто, туманимиз нариги томонидаги мактабдан келишган ўқувчилар ўз уйимиздаги фан олимпиадасида биздан устун келишди. Уларнинг ўқитувчисини танийман. Адашмасам, йигирма беш йилдан бери дарс беради-Юсуф Сардорий!!!
- Унда уни дарров ишдан бўшатиш керак!
- Шу гап сиздан чиқдими, Муҳиддинбой?! Ахир уни ким ишдан бўшатади? Ўзи "замдиректор", ўзи "завуч" бўлса, мактабда бирор кишининг уни мушугини пишт дейишга журъати етмайди.
- Балким, "района"ни огоҳлантириш керакдир?
- Ким билади дейсиз, "района"дагилар томонидан тайинлангандир, балким!!!
Бу ҳикоянинг футболга нима алоқаси бор экан, деб ўйлаб турггандирсиз! Бу турган гап. Бугунги "Насаф" мана шу ҳикоядаги Насимжон ўқийдиган мактабнинг ҳолатига тушиб қолмадимикин?!
Қадрли жонкуяр мухлислар, биз ниманики ҳоҳлаётган бўлсак, ҳаммаси жамоамиз манфаати, "Насаф"имиз келажаги учун. "Насаф" учун шунчалик қайғураётган экансизлар, сизларга раҳмат. Сизларнинг фикрларингиздан келиб чиққан ҳолда "НАСАФ" мутасаддиларига юзланамиз:
ҲУРМАТЛИ ЖАМОАМИЗ МУТАСАДДИЛАРИ!
1. Биз мухлислар, жорий йилда "Насаф"дан юқори натижаларни кутсак бўладими?
2. Ёш, умидли мураббий, жамоамизнинг ҳақиқий жонкуяри Рўзиқул Бердиев ички чемпионат ёки кубок баҳсларида ҳеч бир жамоага мағлуб бўлмаган ҳолда, нега лавозимидан четлатилди?
3. Бердиевдан кўра Тошев билан юқорироқ натижаларни кўзлашимизга асослар борми?
4. Стадионга ташриф буюрадиган мухлислар бундан кейин жамоамизнинг тактик чиройли ўйинларидан умид қилса бўладими?
Ўйлайманки, юқоридаги саволларга яқин кунларда жавоб оламиз! Гарчи жавоб ололмасак-да, биз мухлислар "Насаф"ни доимо қўллаб-қувватлашдан чарчамаймиз!
ШОДЛАНСИН ҚАРШИ, "НАСАФ" ЭНГ ЯХШИ!
Олим Толипов
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
