Хабарингиз бор, Туркиянинг «Ҳатко» компанияси Тошкент вилоятида Ўзбекистон терма жамоалари учун «Дўстлик» базасининг қурилиш-реконструкция ишларини амалга оширмоқда.
Бугун ЎФА раҳбарияти мазкур жараёнлари кўздан кечириш, масъуллар билан суҳбатлашиш ҳамда керакли тавсиялар бериш мақсадида қурилиш объектига ташриф буюрди.
Дастлаб мазкур базадан ўрин олган объектлар, жумладан, машғулот майдончаси ва стадион лойиҳасининг техник-ташклий жараёнлари билан танишилди. Объектдан ўрин оладиган 2 та гибрид ва 2 та сунъий қопламали футбол майдонларини халқаро стандартлар асосида сифатли бунёд этиш, уларнинг дринаж тизимларини тўғри созлаш, келгусида чимларни сақлаш ва парваришлар учун керакли қурилмаларни ташкил этиш юзасидан топшириқ берилди.
Бундан ташқари, қурувчи компания вакилларига барча жараёнларни жадаллаштириш, қурилиш ишларини сифатли амалга ошириш билан бир қаторда лойиҳаларнинг хавфсизлик жиҳатларига алоҳида эътибор қаратиш кераклиги айтилди ва керакли кўрсатмалар берилди.
Шунингдек, терма жамоалар футбол марказининг тиббий-тикланиш, ётоқхона ва ошхонасини замонавий ускуналар билан жиҳозлаш юзасидан фикр алмашилди. Шаҳарчада кутубхона, ресторан ҳамда яшил ҳудуд ташкил этиш лойиҳаси ўрганилиб, инфратузилмадан ўрин олган кейинги режалари муҳокама қилинди.
Матнда хатолик топсангиз, ўша хатони белгилаб, бизга жўнатинг (Ctrl + Enter).