Инглиз клублари ёз давомида жами 1,9 миллиард фунтни трансферлар учун сарфлади. Айни дамда эса Буюк Британия Қироличаси оламдан ўтгани сабабли, АПЛ баҳслари вақтинча қолдирилган. Биз бугун инглиз клублари ёзда харид қилган футболчилардан тузилган рамзий терма жамоани эътиборингизга ҳавола этамиз.
Дарвозабон – Ник Поуп
Собиқ "Бёрнли" посбони ўз клуби Чемпионшипга йўл олгач, "Ньюкасл" томонидан сотиб олинган эди. Поуп кутилганидек, "қарғалар" дарвозасини мустаҳкамлай олди. Хусусан, унинг сейвлар кўрсаткичи Жордан Пикфорддан кейинги, иккинчи ўриндан жой олган.
Ўнг қанот ҳимояси – Эрон Хики
Хики ўз фаолиятини чап қанотда бошлаган эди. Аммо "Брентфорд"га ўтгач, Томас Франк уни ўнгда синаб кўра бошлади ва бу иш берди. Шотландия терма жамоаси аъзоси АПЛга тезда мослашиб кета олди. Унинг старти ажойиб кечди.
Марказий ҳимоя – Жеймс Тарковски
1,9 миллиард сарфланганига қарамай, биз текин трансферларни ҳам олишга қарор қилдик. Тарковски эса шундай трансферга эга футболчилардан биридир. Фрэнк Лэмпардга ҳимояда керак кучни айнан собиқ "Бёрнли" футболчиси тақдим эта олди.
Марказий ҳимоя – Белла-Кочап
Англиядаги дебютини зўр ўтказган яна бир футболчилардан бири Армель Белла-Кочапдир. 20 ёшли ҳимоячи тезда ўйин ритмига мослаша олди. У "Саутгемптон" таркибида порлай бошлади.
Чап қанот ҳимояси – Олександр Зинченко
Зинченко ўз фаолиятининг "Манчестер Сити"даги қисмида асосан ротацияларга учраган эди. Гвардиола унга доим ҳам ўйнаш имкониятини тақдим этмаган. Аммо "Арсенал"да у асосий таркиб футболчисига айланди. Украин Лондонда энг ижодкор футболчилардан биридир.
Ярим ҳимоячи – Жоау Пальинья
"Фулхэм" АПЛга анча тетик бўлиб қайтди. Бунда жамоанинг муҳим трансферлари ҳам катта рол ўйнади. Жамоа "Спортинг"дан Пальиньяни сотиб олди. Бу эса Марко Силвага катта ёрдам берди. Унинг шогирдлари ҳозирда жадвалнинг биринчи ярмидан жой олган.
Ярим ҳимоячи – Эриксен
Даниялик маестро "Брентфорд"дан эркин агент сифатида "МЮ"га йўл олганди. Тен Хаг уни Бруну Фернандеш билан бирга, тандемда ўйната бошлади. Бу эса яхши натижа берди. Эриксеннинг эндиги вазифаси таянч ҳимоясида ҳаракат қилишдир. Ҳозирча у буни яхши эпламоқда.
Ярим ҳимоячи – Ромео Лавия
18 ёшда бўлишига қарамай, Лавия "Саутгемптон"нинг ярим ҳимоясида доимий кўриниш бермоқда. Унга "Челси" ҳам қизиқиш билдирган эди. Лавия ҳозирнинг ўзида 50 миллион фунтга баҳолана бошлади.
Ӯнг қанот – Луис Синистерра
Синистерра ўтган мавсумда "Фейеноорд"нинг кашфиётига айланган. У Нидерландияда жами 23 гол уришга эришганди. "Лидс Юнайтед" кутиб ўтирмай, уни харид қилди. Жесси Марш жамоаси Синистерра учун қийинлик қилмади, футболчи осон мослашди. 23 ёшли ҳужумчи ҳозиргача 2 та гол уришга эришди.
Чап қанот – Габриэл Жезус
Зинченко каби, Жезус ҳам Гвардиола жамоасида ротациялар қурбонига айланганди. "Манчестер Сити" сафида Жезус икки қанот ёки марказий ҳужумда ҳаракат қилаверган. Аммо унга доим ҳам имкон тақдим этилавермас эди. Микель Артета эса унга ҳар бир ўйинда ишонч билдирмоқда. Бу ўз мевасини бермай қолмади. У "Арсенал" сафида 6 та ўйинда 6 та гол уришга эришди. Габриэл Жезус мавсум хариди номига лойиқ топилиши мумкин.
Марказий ҳужум – Холанд
Яна ким ҳам бўларди? Мухлисларнинг кўпи Холанднинг АПЛга мослашиб кетишига қийналади деб ўйлаганди. Аммо бу фаразлар ўзини оқламади. У "Манчестер Сити" сафида 6 та ўйинда 10 та гол урди ва айрим рекордларни янгилади. Агар Холанд шундай давом этса, у "шаҳарликлар"га илк бор ЕЧЛ совринини тақдим этиши мумкин.
ИСМАТОВ Ж.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
