Иккинчи давра арафасида «Андижон» клуби ўз таркибини маҳоратли футболчилар билан кучайтирди. Биласиз, бу жамоа биринчи даврани кўнгилдагидек ўтказа олгани йўқ. Бу эса ишқибозларни ранжитди. Шунинг учун иккинчи даврада йўл қўйилган хатоларни такрорламаслик мақсадида жамоа ўйинини кучайтирадиган ўйинчиларни қўлга киритмоқда.
Ана шундай футболчидан бири – Отабек Валижонов. Наманганлик бу ўйинчи мавсум бошида «Шўртан»га бориб қўшилганди. Унинг у ердаги ярим йиллик фаолияти ёмон кечмади. Хар ҳолда Отабек асосий таркибда майдонга тушди. Аммо бош мураббий алмашганидан сўнг Валижонов жамоадан кетадиган бўлди. «Андижон» эса ушбу футболчини ўз сафида кўришни хоҳлаётганди. Гарчи бир қатор клублардан таклифлар бўлишига қарамасдан у «Андижон»ни танлади. Шартномага қўл қўйганидан кейин у билан суҳбатлашдик.
- Отабек, «Шўртан»ни тарк этган ҳолда иккинчи даврани «Андижон»да ўтказишингизга нима туртки бўлди?
- Тўғрисини айтсам, Ғузор менга узоқлик қилди. Фаолиятимни эса уйимга яқинроқ жойда давом эттиргим келди.
- Сизгача «Шўртан»дан Мўйдин Мамазулумов ҳам «Андижон» аъзосига айланганди...
- Албатта, унинг ҳам «Андижон»га ўтганини эшитиб хурсанд бўлдим. Мўйдин ўткир ҳужумчи. У голлар уришни яхши кўради. Умуман, Мамазулумовнинг фойдаси тегишига ишонаман. Қолаверса, яна бир жамоада ўйнаётганимдан мамнунман. Клуб раҳбари Позилжон Мирзаев Мўйдиндан кейин мени ҳам таклиф қилди ва гаплашганимдан кейин шартномага қўл қўйдим.
- Қишда «Навбаҳор»ни тарк этиб, «Шўртан»га қўшилганингизда, бу ерга катта ниятлар билан келганингизни айтгансиз. Аммо у ердаги фаолиятингиз ярим мавсумдан иборат бўлди. Бу сиз учун қандай ўтди?
- Ғузорликлар таркибида ўйнаб, ёмон бўлганим йўқ. «Шўртан» ҳам ўзига хос жамоа. Ҳали кўрмаган ўйинларимни у ерда ўтказдим. Шунингдек, ўзим учун тажриба ҳам оширдим.
- Бу жамоада асосан Игор Криушенко қўли остида тўп сурдингиз. Кейинчалик эса унинг ўрнини Эдгар Гесс эгаллади. Балки бу ўзгариш жамоадан кетишингизга таъсир қилгандир?
- Игор Николаевичнинг ишдан бўшаши қайсидир маънода менинг клубдан кетишимга ҳам туртки бўлди. Криушенкодан кейин менинг ҳам у ерда қолгим келмади. Айнан ўша мураббий борлиги учун астойдил ўзимни кўрсатиш учун ўйнаётгандим. Гесс билан эса ишламаганман. Шунинг учун унинг қандай мураббий эканлигини яхши билмайман.
- Умуман, «Шўртан»дан кетишингиз ўзингиз учун кутилмаган ҳолат бўлиб туюлмадими?
- Йўқ, бундай бўлмади. Клубдан кетишни хоҳладим ва бу нарса амалга ошди.
- Сизда 4-5та яхши вариантлар бор эди. Уларнинг орасидан эса айнан «Андижон»ни танладингиз...
- Боя айтганимдек, Андижон уйимга яқин. Бу ерда ўйнасам деярли оилам билан бирга бўламан. Шу боис бу ўзим учун ҳам қулай вариант эди.
- Бунгача «Андижон» ҳақида фикрингиз қандай эди?
- Табиийки, курашчан жамоа. Лекин «Андижон»га бораман деб ўйламагандим. Аммо ҳаммаси қисқа фурсат ичида ҳал бўлди. Бундай бўлгани менга ҳам яхши кечди.
- Биринчи даврада жамоа омадсизликка учради. Натижада кутилмаганда 13-ўринга тушиб қолди. Бу ҳолат сизга таъсир қилмадими?
- Йўқ, ҳеч қандай таъсир қилмади. Футболда ҳамма нарса бўлади. Бу натижа вақтинчалик холос. Иккинчи даврада ҳаммаси яхши томонга ўзгаришига ишонаман. Боз устига биз ҳам қўлимиздан келганича ёрдам берамиз. Ҳали ярим мавсум олдинда турибди.
- Ҳар қандай ўйинчи янги жамоага қўшилганида ўзининг олдига қўйган шахсий мақсади бўлади. Бу борада сизнинг мақсадингиз қандай?
- Мен фақат олдинга интилишни яхши кўраман. «Андижон»га ҳам шунчаки келганим йўқ. Бу ердаги ишқибозларни яхши биламан. Уларнинг ишончини қозониш учун қўлимдан келганича ҳаракат қиламан.
- Охирги савол сифатида мухлисларга нима дея оалсиз?
- Ғалабаларимиз билан уларни хурсанд қилмоқчимиз. Мухлисларнинг қўллаб-қувватлаши бизга катта далда беради.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
