Ўз миллий терма жамоаси, демакки, яшил майдонда ватан шарафини ҳимоя қилиш , ҳар бир футболчи учун энг олий шараф!
Тўғри, ҳамма футболчиларга насиб этавермайди, фақат сараларнинг сарасига миллий терма жамоа эшиклари очилади. Ҳозирга қадар 600дан кўпроқ футболчи ўз терма жамоаси либосида 100 мартадан ортиқ майдонга тушишга муваффақ бўлган. қуйидаги қаҳрамонларимиз ана шу фидойи футболчилар рўйхатининг етакчи ўнлигидан жой олишган. Марҳамат, танишинг:
10. Жанлуиджи Буффон, Италия (терма жамоада 176та ўйин)
Италиялик афсонавий дарвозабон ҳанузгача яшил майдонни тарк этган эмас, қадрдон клуби «Парма»да тўп сурмоқда. Терма жамоада эса барча ватандошларидан кўра кўпроқ майдонга тушган. 1997 йилда «Скуадра Адзурра»да дебютини нишонлаган 19 ёшли Жиджи узоқ йиллар давомида миллий жамоа шарафини ҳимоя қилди, жумладан, 8та йирик мусобақаларда иштирок этди. Посбон айниқса, 2006 йилда терма жамоанинг 4-марта жаҳон чемпиони унвонини қўлга киритишига муносиб ҳисса қўшгани билан фахрланади.
9. Клаудио Суарес, Мексика (177)
Марказий ҳимоячи учун анча паст бўйли бўлишига қарамасдан, Клаудио Мексика терма жамоаси таркибида 177 марта майдонга тушишга муваффақ бўлганди. 1992 йилда халқаро аренадаги дебютини нишонлаган «Эль-Эмперадор» 14 йил давомида миллий жамоада ишончли тўп суриб, ўз ўрнини ҳеч кимга бермади ва ЖЧ-2006 турниридан кейин бутсаларини михга илди. Суарес узоқ вақт сардорлик боғичи билан майдонга тушиб, ватандошларининг 1993, 1996 ва 1998 йилларда Олтин Кубокни қўлга киритишларига катта ҳисса қўшди. Шунингдек, у Конмебол Кубоги доирасидаги 1999 йилда бўлган Бразилияга қарши финал баҳсида ҳал қилувчи роль ўйнаганди.
8. Муҳаммад ал Деайя, Саудия Арабистони (178)
Бу футболчи 1993-2006 йилларда миллий терма жамоанинг доимий аъзоси бўлган, 1996 йилда Осиё Кубогини қўлга киритган, 1994-2006 йиллар оралиғида барча ЖЧларида иштирок этган. Қизиғи шундаки, аввалига Муҳаммад гандболга қизиқиб қолган ва акасининг қистови билан футболга ўтган экан. Энди у Саудиянинг энг фидойи ўйинчиси.
7. Андрес Гуардадо, Мексика (179)
Гуардадо Қатар мундиалида Мексика терма жамоасининг мутлақ рекордчисига айланиб олди. «Бетис»да тўп сураётган 36 ёшли фахрий миллий жамоанинг етакчиларидан бири саналади, аммо ЖЧ-2022да атиги битта - Аргентинага қарши баҳс (0:2)да, шунда ҳам тўлиқ бўлмаган бир тайм ўйнади. Андрес «Атлас»даги парвозидан 4 ой ўтгач, миллий жамоага жалб этилганди.
6. Серхио Рамос, Испания (180)
«ПСЖ»да жисмоний ва спорт формасини тиклаб олганига қарамасдан, марказий ҳимоячи Қатар мундиалида иштирок этмади. Ўтган йили «Реал» унинг Европа чемпионатидан четда қолишига сабабчи бўлганди. Бу сафар Луис Энрике ЖЧ-2010, Евро-2008 ҳамда Евро-2012 турнирлари ғолибига таркибдан жой бермади.
5. Аҳмад Муборак, Уммон (183)
Фаолияти давомида ўз юртидан ташқари, Саудия, Қатар, Қувайт ва БААда 14дан ортиқ клубларда тўп сурган уммонлик футболчи Қувайт терма жамоаси сафида 183та учрашув ўтказгач, 2019 йилда нафақага йўл олди. Аҳмад Муборак ўзининг энг ёрқин ўйинларини 2017Ғ18 йиллар мавсумидаги Форс кўрфази Кубоги турнирида намойиш этди. Ўшанда унинг жамоаси бегона юртда зафар қучганди.
4. Аҳмад Ҳассан, Миср (184)
Миср футболи афсонаси. Ҳассан миллий терма жамоа таркибида 8 марта Африка Миллатлар Кубоги мусобақаларида иштирок этиб, уларнинг нақ ярмида чемпионлик гаштини сурганди. «Фиръавнлар» 1998, 2006, 2008 ва 2010 йилларда қитъанинг тенгсиз жамоасига айланишган, Аҳмад эса бош ролни ижро этганди. Нуфузли совринни қўлга киритиш бобида ярим ҳимоячи билан тенглаша оладиган футболчи йўқ, терма жамоадаги ўйинлар сони бўйича ҳам. Ҳассаннинг бирдан-бир армони - ЖЧ!
3. Со Чин Энн, Малайзия (195)
Балки бу ном Малайзиядан ташқаридаги мухлисларга таниш эмасдир. Лекин атиги бир нафар футболчи миллий терма жамоа сафида ундан кўпроқ учрашувда майдонга тушган, холос. Малайзиялик марказий ҳимоячи 1969 йилда бош жамоа сафида илк учрашувини ўтказганди. Со 1972 йилдаги Олимпия Ўйинларида мамлакат шарафини ҳимоя қилди, 8 йилдан кейин унинг Осиё Кубоги турниридаги ишончли ўйини Жанубий Кореядек номдор жамоа билан жанговар (1:1) дурангни таъминлаганди. Со 1984 йилда Малайзия терма жамоасидаги фаолиятини якунлади.
1-2. Криштиану Роналду, Португалия (196)
Жаҳон чемпиони унвони - Роналдунинг совринлар коллекциясида етишмаётган ягона йирик соврин. Қатар мундиали эса сўнгги имконият эди. Афсус, катта эҳтимол охирги имконият ҳам бой берилди. Бунга алоҳида тўхталиш шарт бўлмаса керак... Ҳозирда халқаро учрашувларда 118та гол билан тўпурарлар пешқадами бўлиб турган 37 ёшли футболчи ўйинлар сони бўйича ҳам яққол етакчи бўлиш учун бор куч-маҳоратини сарфлашига шубҳа йўқ. Агарда унга яна имконият берилса, албатта.
1-2. Бадр ал Мутва, Қувайт (196)
Январда 38 ёшини нишонлайдиган ал Мутва ҳамон яхши спорт формасида. У терма жамоадаги ўйинлар сонини 200тага етказиш умиди билан шижоат билан ишламоқда. Бадр ал Мутва терма жамоадаги иштирокини 2003 йилда, 18 ёшда бошлаганди. Шундан бери мунтазам равишда майдонга тушиб, 56та гол урди ва 2010 йилда Қувайтнинг 10-марта Форс кўрфази Кубогини қўлга киритишига муносиб ҳисса қўшди.
Равшан ИБРОҲИМ тайёрлади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
