Мадриднинг «Реал» клуби ҳужумчиси Карим Бензема Францияда 2022 йилнинг энг яхши спортчиси деб топилди. 24 ноябрдан 31 декабргача ОАВ вакиллари UJSF мукофоти доирасида 2022 йилнинг энг яхши француз спортчиларини танладилар. Овоз беришда Франция спорт журналистлари уюшмасининг 3000 нафар аъзоси иштирок этди. Улар Бенземани биринчи ўринга қўйишди, «ПСЖ» ҳужумчиси Килиан Мбаппе иккинчи ўриндан жой олди. Каримнинг мавсум иккинчи ярмида омадсизликка учрагани ва Қатарда бўлиб ўтган жаҳон чемпионатида иштирок этмаганини ҳисобга олсак, бу албатта, ғалати натижа.
Хўш, Бензема 2022 йилда Мбаппедан сезиларли даражада ёмонроқ ўйнадими?
Календарь йили бўйича статистикадан бошлайлик. Бензема 2022 йилда барча мусобақаларда «гол+пас» тизимида 40 (32+8) очко жамғарган. Бу Ла Лигадаги футболчилар орасида энг яхши натижа, аммо Европа футболи миқёсида бу кўрсаткич бошқа юлдузларга нисбатан анча заиф. Килиан Мбаппе ва Лионель Месси 56 ўйинда 73 (56+17) очко ва мос равишда 51 учрашувда 65 (35+30) очко тўплаган ҳолда пешқадамлик қилмоқда. Кейинги ўринларда Эрлинг Холанд 53 (45+8), Неймар 52 (42 ўйинда 32+20) ва Роберт Левандовски 51 (51 ўйинда 42+9). Шунингдек, 2022 йилда гол уриш бўйича етакчилар қаторида Кристофер Нкунку 58 ўйинда 50 (37+13) очко, Ҳарри Кейн 61 ўйинда 48 (34+14) ва Кевин Де Брюйне 54 ўйинда 45 (18+27) ҳам бор.
Аммо бу ҳолатда бизни фақат французлар қизиқтиради. Бензема Мбаппе ва Нкункудан ҳам ёмонроқ статистика кўрсатди. Албатта, Кристоферни «Лейпциг»да сезиларли ютуқларга эришмагани учун энг яхшилар унвонига номзод деб бўлмайди. Аммо Бензема - Мбаппе жуфтлигида яққол устунлик бор - Килиан шахсий натижалар бўйича Каримдан олдинда. Шунга қарамай, Франциянинг спорт журналистлари Бенземани йилнинг энг яхши спортчиси сифатида танладилар. Улар нимага кўра бундай қарорга келишганини тушуниш қийин. Бензема «Реал Мадрид» билан Ла Лига ва Чемпионлар Лигасида ғолиб чиқди ва «Олтин тўп» соҳибига айланди. Катта ютуқлар, лекин уларнинг барчаси йилнинг биринчи ярмига тегишли. Бу вақт оралиғида Карим шубҳасиз энг яхши эди. Ҳужумчи кўплаб голлар урди ва «Реал Мадрид» билан Европанинг энг нуфузли мусобақасида ғалаба қозонди ва плей-оффда Мбаппе бошчилигидаги «ПСЖ»ни мағлуб этди. Бироқ йилнинг иккинчи ярмида Карим амалда футбол ҳаётини тарк этди. Агар Франциядаги энг ёмон спортчиларнинг антирейтинги тузилган бўлса, у етакчи бўлмаса ҳам, унда энг юқори ўринлардан бирини эгаллаши мумкин. Бир неча ҳафта олдин Бензема 35 ёшга тўлди. 2021/2022 йилги мавсумда у бор кучини берди ва охирида жуда чарчаган эди. Карим 19 июль куни таътилдан қайтди - қолган жамоадошларидан бир неча ҳафта кечроқ. «Реал Мадрид» президенти Флорентино Перес ва бош мураббий Карло Анчелотти кекса Бенземага дам олишга рухсат беришди, бироқ футболчининг мавсумолди тайёргарлиги бузуқ эди. У 23 июль куни Лас-Вегасда «Барселона» билан бўлган «эл-класико»ни ўтказиб юборди, чунки у майдонга тушишга тайёр эмас эди. 2022/2023 йилги мавсум бошида расмий ўйинларда Бензема ёмон формада кўринган бўлса ажаб эмас. У жаҳон чемпионати олдидан 12 ўйинда атиги 6 та гол урганди. Октябрь ойининг ўрталаридан бери Карим мушак жароҳати ва жаҳон чемпионатида кучини тежаш истагини баҳона қилиб, «Реал Мадрид» ўйинларида қатнашмади. Испания ва Франция ОАВ зарар унчалик жиддий эмаслиги ва агар хоҳласа, Карим майдонга тушиши мумкинлиги ҳақида хабар беришди. Натижада ҳужумчи бир ой ичида «Селтик» билан Чемпионлар лигасида атиги 27 дақиқа ўйнади ва Франция жамоаси жойлашган базага йўл олди. Бу «Олтин тўп» эгаси учун қандай офат бўлишини кўпчилик тасаввур қила олмасди. Мбаппе жамоани Жаҳон чемпионати финалига судраб чиққанида Бензема Франция терма жамоасида жанжалларни келтириб чиқарди. Гуруҳ босқичи бошланишига бироз вақт қолганида Бензема мушакларидаги жароҳат туфайли жаҳон чемпионатини ўтказиб юбориши ҳақида хабарлар пайдо бўлди. Карим жамоанинг Қатардаги базасини тарк этиб, Ҳинд океанидаги Реюнион оролига дам олишга йўл олди. Декабрь ойи бошида у «Реал Мадрид» базасида ҳеч қандай чекловларсиз машғулотларни бошлади, 15 декабрда «Леганес» билан ўртоқлик ўйинида қатнашди - жаҳон чемпионати тугашидан олдин.
Франция терма жамоаси тиббий штаби Бенземанинг плей-офф босқичида тикланиши мумкинлиги ҳақида оптимистик прогноз берди. Аммо Карим Реунионга боришга қарор қилди ва кейин «Реал»га қайтди. Ҳаммасига ҳужумчининг терма жамоа кийиниш хонасига олиб келган низолари сабаб бўлди. Бензема базадан кетгач дарҳол L'Equipe миллий терма жамоа ўйинчиларининг кўпчилиги хурсанд бўлиб, юксалиш устида ишлай бошлагани ҳақида хабар берди. Шунингдек, ҳужумчи Антуан Гризманн ва дарвозабон Уго Льорис ҳужумчининг жаҳон чемпионатига келишига қарши бўлганлигини даъво қилди. Дешам бунга унчалик интилмаган. У шунчаки ҳужумчининг «Реал»даги ёрқин ўйинини эътиборсиз қолдира олмади, шунинг учун жамоадаги можаролар хавфига кўз юмди. Мураббий Бенземани қайдномадан чиқариб ташламади, бу эса ҳужумчига назарий жиҳатдан Аргентина билан финал ўйинида Қатарга қайтиш имконини берди. Аммо Карим Франция президенти Эммануэль Макроннинг таклифига эътибор бермай, томошабин сифатида ҳам келмади. Франция Аргентинага мағлуб бўлди (3:3, пенальтилар бўйича 2:4), орадан бир-икки кун ўтиб Бензема кутилмаганда терма жамоадаги фаолиятини якунлаганини эълон қилди. Карим ижтимоий тармоқларда деярли барча французларни кузатишни бекор қилди. У «Реал»даги жамоадошлари Эдуардо Камавинга ва Аурелиен Тчуамени, шунингдек, Килиан Мбаппе, Рафаэль Варан ва Маркус Тюрамни кузатади холос. RMC Sport хабарига кўра, Бензема нафақат кўпчилик футболчилар билан можаро, балки Дешам билан тушунмовчилик туфайли терма жамоани тарк этган. Франция футбол федерацияси ва Дешам яқинда шартномани 2026 йилгача узайтиришди, бироқ бу ҳақда ЖЧ финалидан олдин ҳам расман келишиб олишганди. Карим терма жамоани Зинедин Зидан бошқарганида қоларди. Бу иш бермади, шунинг учун Бенземанинг терма жамоадаги сўнгги имиджи ниҳоятда ёқимсиз бўлиб чиқди.
Килиан Мбаппе ўша пайтда нима қилди? У жаҳон чемпионатида саккизта гол уриб, турнирнинг энг яхши тўпурарига айланди. Жумладан, Аргентина билан финалда хет-трик қайд этди. Бензема 2022 йилда француз жамоасига ёрдам бериш учун ҳеч нарса қилмади, аксинча, унга зарар етказди. Мбаппе жамоани судраб юрди. Аммо журналистлар барибир Каримни энг зўр деб аташди, мантиқан эса кўпроқ футболчининг клубдаги эмас, терма жамоадаги ўйинига таяниш керак эди. Мбаппе йилни клуб миқёсида тенг равишда ўтказганига қарамай, у «ПСЖ»да мунтазам кўп гол урди, Бензема эса 2022/2023 йилги мавсумнинг биринчи қисмида «Реал»да ёрқин ўйин ўтказмади.
Алоҳида нашрлар Мбаппега Бенземадан кўра яққол устунлик беради
UJSF мукофоти Франциядаги энг нуфузли спорт жамоатчилигининг танловидир. Франция спорт журналистлари уюшмасининг 3000 нафар аъзоси ҳеч қандай жиддий далиллар келтирмасдан, Бенземани тақдирлашга қарор қилди. Шу билан бирга, «Бензема - Мбаппе» мавзусидаги баҳсларда алоҳида нашрлар Килианга яққол устунлик беради. Мбаппе L'Equipe нашри томонидан Францияда йилнинг энг яхши спортчиси деб топилди. Овоз беришда Килиан 832 балл тўплади. Бензема 484 очко билан иккинчи бўлди. Худди шу L'Equipe яна спортчиларнинг глобал рейтингини тузди. Унда Лионель Месси (808 очко) пешқадамлик қилди, иккинчи ўринда Мбаппе (381) ва кейинги поғонани Бензема (195) эгаллади. Испаниянинг Marca нашри 2022 йилнинг энг яхши футболчиси учун рейтинг тузди: ўқувчилар икки футболчидан бирини танлади. Ғолиб кейинги босқичга йўл олди. Финалда Килиан Мбаппе ва Лионель Месси тўқнаш келишди. Француз 56% овоз билан ғалаба қозонди. «Реал Мадрид» ҳужумчиси Карим Бензема ярим финалда Эрлинг Холандни ортда қолдириб, сўровномада учинчи бўлди (66% ва 34%). Ўқувчилар Франция спорт журналистлари уюшмасининг профессионал экспертлари эмас, лекин уларнинг фикри ҳам жуда очиқ бўлди. Бундан ташқари Бензема Франциядаги энг ҳурматли 50 кишидан бири эмас. Бу шуни англатадики, француз жамияти кўп жиҳатдан уни ёқтиришмайди, терма жамоа футболчилари ва Дешам билан зиддиятда уни қўллаб-қувватлашмади, у Мбаппедан анча пастроқда келтирилади. Франция спорт журналистлари уюшмаси бу борада бошқача фикрда. Карим фахрий мукофот билан тақдирланди, гарчи у бунга лойиқ бўлмасада. 2022 йилнинг биринчи ярмини эмас, балки бутун йилни ҳисобга олсак, Мбаппега адолатсизлик қилингани аниқ.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
