Ўзбекистон Республикаси Президенти Ислом Каримов 24 август куни Оқсаройда Буюк Британиянинг Лондон шаҳрида бўлиб ўтган ХХХ ёзги Олимпия ўйинларида медалларни қўлга киритган спортчиларимиз ва уларнинг устоз-мураббийларини қабул қилди.
– Биз бугун Лондон шаҳрида бўлиб ўтган ХХХ ёзги Олимпия ўйинларида Ватанимиз шарафини муносиб ҳимоя қилган спортчиларимизни қутлаш ва тақдирлаш учун тўпландик, – деди давлатимиз раҳбари. – Дунёда спорт соҳасида ўтказиладиган мусобақалар кўп. Лекин улар орасида Олимпия ўйинлари юксак нуфуз ва алоҳида ўринга эга. Шунинг учун Олимпия ўйинларида қатнашиш ҳар бир спортчи учун катта шарафдир. Лондон Олимпиадасида иштирок этиб, Ўзбекистонимиз шарафини муносиб ҳимоя қилган йигит-қизларимизга, уларнинг устоз ва мураббийларига, бутун жамоамиз аъзоларига чуқур миннатдорлик билдириш менга катта мамнуният бағишлайди.
Юртимиздаги миллионлаб спорт мухлислари Олимпиада ўйинларида мардона курашган спортчиларимизни нафақат экран орқали кузатиб борди, балки уларга чин қалбдан мадад тилаб турди, десак, айни ҳақиқатни айтган бўламиз.
Албатта, бундай нуфузли мусобақаларда муносиб қатнашиш, ғолибликка эришиш осон эмас. Агар бугунги кунда дунёда 7 миллиард аҳоли яшаётганини ва улар орасида фақат ўн ярим минг нафар одам бу мусобақаларда қатнашиш ҳуқуқини қўлга киритганини эътиборга оладиган бўлсак, мазкур ўйинларнинг нақадар кучли рақобат муҳитида ўтганини англаш, сезиш қийин эмас, деб таъкидлади Президентимиз.
Лондондаги мусобақаларда спортчиларимиздан 4 нафари совриндор, 14 нафари ўз йўналиши бўйича кучли саккизликка кирганини алоҳида таъкидлаш ўринлидир. Беллашувларда эркин кураш бўйича учинчи бор Олимпиада олтин медалини қўлга киритган Артур Таймазов, бронза медаллар билан тақдирланган дзюдочи Ришод Собиров, машҳур боксчимиз Аббос Атоев ва эркин курашчи Сослан Тигиев муросасиз ва шиддатли курашларда ғолиб чиқиб, юксак маҳорат ва матонат намунасини кўрсатгани барчамизга қувонч ва ғурур бағишлади.
Машҳур полвонимиз, икки карра жаҳон чемпиони Артур Таймазовнинг Олимпиада чемпиони деган шарафли номга учинчи марта сазовор бўлгани алоҳида таҳсинга лойиқ. Бу маҳоратли спортчимизнинг Сидней Олимпиадасида кумуш медалга сазовор бўлганини ҳам инобатга оладиган бўлсак, у тўртта Олимпиадада зафар қозониб, тўртта медални қўлга киритган. Жаҳон спорти тарихида бундай юксак ютуқларга эришганлар камдан-кам бўлган.
Эсингизда бўлса, бундан тўрт йил муқаддам, Пекин Олимпиадасидан кейин мана шу залда ўтказилган учрашувда мен Артурга миллионлаб мухлислар ва бутун халқимизнинг истаги сифатида навбатдаги Олимпиадада ўзининг учинчи олтин медалини қўлга киритишини тилаган эдим, деди Ислом Каримов. Бугун Артур эл-юртимизнинг ана шу юксак ишончини оқлаб, Ватанимизга тарихий ғалаба билан қайтгани барчамизга улкан мамнуният етказади. Бундай самимий миннатдорлик сўзларини бугунги тадбиримизда иштирок этаётган икки карра Олимпия ўйинлари совриндори, икки карра жаҳон чемпиони Ришод Собиров ва икки карра Олимпия ўйинлари совриндори Сослан Тигиев, икки карра жаҳон чемпиони Аббос Атоев ва бошқа спортчилар ҳақида ҳам айтиш мумкин. Қўлга киритилган бундай буюк ғалаба ва ютуқлар ҳаётга кириб келаётган, машҳур спортчилар сафига киришни ўз олдига мақсад қилиб қўйган ёш, навқирон авлодимизга ўрнак ва ибрат бўлиши билан эътиборлидир.
Давлатимиз раҳбари энди барчамизнинг, аввало, спорт жамоатчилиги, соҳа мутасаддилари олдида 2016 йилда Бразилиянинг Рио-де-Жанейро шаҳрида ўтказиладиган ўттиз биринчи ёзги Олимпиада ўйинларига жиддий тайёргарлик кўриш вазифаси турганлигини таъкидлади. Лондон Олимпиадаси якунларини чуқур таҳлил қилиш ва ундан тегишли сабоқ ва хулоса чиқариш, Олимпия ўйинларида энг юқори натижаларга эришган давлатлар тажрибасини ўрганишга алоҳида эътибор бериш зарурлигини, бу ишни бугундан, ҳозирдан бошлаш лозимлигини қайд этди.
Олимпиадада қатнашган барча йигит-қизларимизни, ғалабаларни қўлга киритишга муносиб ҳисса қўшган, ёш спортчиларни тарбиялаган устоз-мураббийларни, бутун команда аъзоларини яна бир бор табриклаб, барчангизга бахт ва омад, янги-янги зафарлар ва ютуқлар тилайман, деди пировардида Ислом Каримов.
Ўзбекистон Республикаси Президентининг 2012 йил 14 август куни қабул қилинган “Лондон шаҳрида бўлиб ўтган ХХХ ёзги Олимпиада ўйинларида юксак натижаларга эришган спортчиларимиздан бир гуруҳини мукофотлаш тўғрисида”ги фармонига мувофиқ, Олимпиада ўйинларида эришган ютуқлари билан Ватанимизнинг халқаро миқёсдаги обрў-эътибори ва нуфузини оширишга қўшган катта ҳиссаси учун бронза медаллари соҳиблари бўлган Ришод Собиров ва Сослан Тигиев “Ўзбекистон ифтихори”, Аббос Атоев “Ўзбекистон Республикасида хизмат кўрсатган спортчи” фахрий унвонлари билан тақдирланди.
Лондон Олимпиадаси чемпиони Артур Таймазов юртимизнинг спорт соҳасидаги шон-шуҳратини юксалтириш ишига қўшган улкан ҳиссаси, Олимпиада ўйинларида юксак натижаларга эришгани учун “Эл-юрт ҳурмати” ордени билан мукофотланди.
Президентимиз спортчиларга давлатимизнинг ана шу юксак мукофотларини топширди.
Давлатимиз раҳбари Артур Таймазовга машҳур курашчимизнинг Ўзбекистон байроғини баланд тутиб турган олтин суви юритилган ҳайкалчасини совға қилди.
Артур Таймазов, Ришод Собиров, Аббос Атоев, Сослан Тигиев, мураббий Аҳрол Рўзиев Президентимиз Ислом Каримовга спортни ривожлантириш ва спортчиларни ҳар томонлама қўллаб-қувватлаш борасида кўрсатаётган доимий эътибори ва ғамхўрлиги учун самимий миннатдорлик изҳор этдилар. Спортчиларимиз бундай ғамхўрликка жавобан келгуси халқаро миқёсдаги йирик ва нуфузли мусобақаларда ҳам Ватанимиз шаънини муносиб ҳимоя қилишларини таъкидладилар.
ЎзА
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
