Эртага, 29 август куни Лондонда XIV Паралимпия ўйинларининг очилиш маросими бўлиб ўтса, 30 августдан бошлаб мусобақаларга старт берилади. Аслида бу мусобақага британияликлар асос солишган. Шунинг учун ҳам мезбонлар Паралимпиадага янада жиддийроқ ёндашишмоқда.
Бугун, 28 август куни эса Лондонда Ўзбекистон Давлат байроғини кўтарилишига бағишланган тадбир бўлиб ўтади. Унда Ўзбекистон делегацияси, ташкилий қўмита аъзолари, Ўзбекистоннинг Буюк Британиядаги элчихонаси вакиллари иштирок этишади.
Буюк Британияга Ўзбекистон Маданият ва спорт ишлари вазирлигининг матбуот хизмати бошлиғи Шавкат Жалилов ҳам йўл олган. Биз бу ҳамкасбимиз билан доимий алоқада бўлиб турибмиз. Насиб қилса, Шавкат ака сайтимиз учун махсус мақолалар, кундаликлар ёзиб турадиган бўлди, бу ҳақда келишиб олдик.
— Бугунга келиб дзюдо, енгил атлетика ва сузиш мусобақаларида ўзбекистонлик спортчиларнинг имкониятлари юқори баҳоланяпти. Дзюдочимиз дунё рейтингида 4-ўринда. У 31 август куни татамига чиқади. Насиб қилса, Истиқлол байрамига совға ҳозирламоқчи. Бундан ташқари 100 метрга югуришда қизимизнинг кўрсаткичлари юқори. Биринчи бўлиб пауэрлифтингчилар мусобақаларга киришадилар. Уларнинг имкониятлари бироз пастроқ-ку, лекин улардан ҳам умид бор. Насиб этса натижалар яхши бўлиши керак, — дейди Шавкат Жалилов.
Дастлабки куни - 30 август куни спортнинг 11 тури бўйича мусобақалар ўтказилиб, сузиш, дзюдо, пауэрлифтинг, велотрек ҳамда пневматик қуролдан ўқ отиш каби спорт турларида жами 28 та комплект медаллар ўйналади.
Ўзбекистон делегацияси аъзолар орасида биринчи бўлиб мусобақаларга пауэрлифтингчиларимиз киришадилар. Эркаклар ўртасидаги беллашувларда Яшин Шобердиев (48 кг.), аёллар мусобақасида эса Елена Аббасова (56 кг.) ғолиблик учун баҳс юритадилар.
“Биласизми, инсон ўзига берилган имкониятдан самарали фойдаланиш чораларини кўриши лозим. Мусобақада биринчи ёки охирги бўлиб чиқиш мен учун унчалик ҳам аҳамияти йўқ. Асосийси, ўзингизга бўлган ишонч ва жисмоний тайёргарлик. Албатта, биз биринчилардан бўлиб мусобақаларга киришишимизни олдиндан билар эдик ва шунга яраша ҳам жисмоний, ҳам руҳий тайёргарлик кўрдик. Спортда олдиндан бирон бир натижага эъришишни башорат қилиб бўлмайди. Шуни аниқ айтаманки, ўзбекистон шарафини муносиб ҳимоя қилиш учун бор маҳоратимни ишга соламан” –дейди Елена Абасова.
“Албатта, ҳар қандай мусобақада ҳам биринчи бўлиб майдонга тушиш катта маъсулият ҳисобланади, – дейди Яшин Шобердиев. Чунки, мусобақада қандай натижага эришишингиз нафақат ўзингизга, балки бутун жамоага ҳам қандайдир таъсири бўлади. Бу эса спортчига руҳий босим бўлади. Ёш бўлганлигим боис бошида бироз ҳаяжон бор эди. Лекин бу ўткинчи холат. Аниқроғи, бу ҳолатдан иложи борича тезроқ чиқиб кетиш керак. Мен мураббийларим ҳамда рухшунос шифокоримиз кўмагида бу ҳолатдан чиқишга муваффақ бўлдим. Мақсадим, Паралимпия ўйинларида муносиб иштирок эътиб, ватанимга ёруғ юз билан қайтиш”.
Шу ўринда таъкидлаш жоизки, ҳар икки спортчимиз ҳам биринчи бор Паралимпия ўйинларида иштирок этаётганликларига қарамай, ўз олдиларига юқори мақсадларни қўйганликлари қувонарли ҳол. Аслида, тўрт йилликнинг энг йирик спорт байрамидан бирига йўлланмани қўлга киритишнинг ўзи ҳам қаҳрамонлик ҳисобланади. Дастлабки кунги натижалар қандай бўлишидан қатъий назар, “Лондон-2012” Паралимпия ўйинларида ватанимиз шарафини ҳимоя қиладилар барча спортчиларимизга мусобақалар давомида омад ва зафарлар тилаб қоламиз.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
