Хабарингиз бор, 14 сентябр куни Қарши шаҳридаги марказий “Насаф” стадионида Ўзбекистон 21-миллий чемпионатининг 19-тур марказий учрашуви бўлиб ўтади. Совринли ўринлар учун кураш олиб бораётган Қашқадарёнинг икки клуби – “Насаф” ҳамда “Шўртан” жамоалари навбатдаги “Қашқадарё дербиси”да майдонга тушишади.
Учрашувга бўлган қизиқиш жуда юқори, чунки, сўнгги йилларда мамлакатимиз клублари орасида ўз ўринларига эга бўлган ва ҳар бир мавсум аввалида юқори мақсадларни қўяётган бу икки жамоа ўртасидаги ўзаро баҳс кўпчиликнинг диққат марказида турибди.
Шу боисдан, “Шўртан” клуби матбуот хизмати ходимлари мамлакатимизнинг бир қатор жамоалари бош мураббийларининг ушбу ўйин арафасидаги фикрлари билан қизиқди.
Миржалол Қосимов (Ўзбекистон миллий терма жамоаси ва “Бунёдкор” клуби бош мураббийи): “Шўртан” клубида бош мураббий ўзгарганидан кейин жамоанинг ўйини кескин кучайиб кетди. Статистикага назар ташлайдиган бўлсак, ғузорликлар ҳали иккинчи даврада мағлубиятга учрашгани йўқ, қолаверса, жамоа кучли ва мазмунли ўйин намойиш этмоқда. Албатта, бир вилоятнинг икки жамоаси совринли ўринлар учун кескин курашмоқда ва шу боис 14 сентябр куни бўладиган учрашув жуда қизиқарли ва шиддатли ўтишини тахмин қилиш мумкин. Мен авваллари ҳам айтиб келганман ва ҳозир ҳам айтаман – совринли ўринлар учун “Бунёдкор”, “Пахтакор”, “Насаф” ва “Шўртан” жамоалари кураш олиб боради.
Усмон Тошев (“Насаф” жамоаси бош мураббийи): Ўйинни жанговор ва очиқ бўлишини тахмин қилсак бўлади. Ҳар икки жамоа ҳам фақат ва фақат ижобий натижани қўлга киритиш учун майдонга чиқади. Очколар сув ва ҳаводек зарур. Ҳозирги кунга келиб “Насаф” ва “Шўртан” турнир жадвалида ёнма-ён кетмоқда, шунинг учун ушбу учрашувдаги ғалаба “Насаф”га таъқибдан қочиб кетиш, “Шўртан” эса биздан ўтиб кетиш имкониятини беради. Таркиб борасида ҳеч қандай муаммоларимиз йўқ, жароҳат олган футболчиларимиз йўқ, шогирдларимнинг кайфиятлари яхши, миллий терма жамоага чақирилган футболчиларимиз ҳам клуб ихтиёрига етиб келди. Ўйинга тайёргарлик ҳар доимгидек кечмоқда, ушбу ўйин учун алоҳида машғулот ўтказмадик. Эртанги баҳс биринчи даврадаги учрашувдан фарқ қилиши табиий, чунки, у пайтда иккала клубда ҳам бошқа бош мураббийлар фаолият кўрсатишганди, ҳозир эса иккала клубда бош мураббийлар алмашган. Қолаверса, бугунги келиб жамоалар чемпионатни катта қисмини босиб ўтишди, футболчиларнинг ҳам функционал ҳолати мутлақо бошқа. Кўпчилик мутахассислар каби мен ҳам натижани башорат қилишдан йироқман, лекин “Насаф” албатта ғалаба учун майдонга чиқишини таъкидлаб ўтаман. “Ўз ўйингда деворлар ҳам қўллайди” деганларидек, “Насаф” эртага ўз майдонида, ўз мухлислари кўз ўнгида тўп суради.
Эдгар Гесс: (“Шўртан” жамоаси бош мураббийи): “Биз учун ҳар бир учрашув муҳим аҳамият касб этади ва ҳар бир учрашувга жиддий тайёргарлик кўрамиз. Мен ўз фаолиятим давомида ҳеч қачон рақибларни пешқадам ёки аутсайдер тоифасига ажратмаганман. Шу боис, “Насаф” билан бўладиган учрашувга ҳам оддий тақвимдаги ўйин каби тайёргарлик кўряпмиз. Йигитларим ҳеч қандай ортиқча босимни ҳис қилаётганлари йўқ ва бунга йўл ҳам қўймаяпман. Тўғри, бу баҳс дерби мақомига эга, лекин гарчи дерби мақомига эга бўлса-да, ҳамма жараён одатдагидек кетмоқда. Биз ушбу учрашувда ижобий натижани қўлга киритиб, ўз мавқеимизни яна-да мустаҳкамлаб олишга ҳаракат қиламиз. Таркиб борасида ҳеч қандай муаммолар йўқ, жароҳатланган футболчилар йўқ, шогирдларимнинг кайфиятлари яхши, қисқа қилиб айтганда, ҳаммамиз ўйинга тайёрмиз.”
Азамат Абдураимов: (“Андижон” жамоаси бош мураббийи): “Насаф” ва “Шўртан” жамоаларининг ўзаро “тўқнашуви”ни “Бунёдкор”-“Пахтакор” дербисига қиёслаган бўлардим. “Шўртан” яхши шаклланган жамоа ва бежизга медаллар учун кураш олиб бораётган йўқ. Бўлажак “Қашқадарё дербиси” кескин ва қизиқарли курашлар остида ўтиши шубҳасиз. Учрашув Қарши шаҳрида ўтишини ва “Насаф” жамоаси ҳам таркиб борасида мукаммал ва тажрибали футболчиларга бой эканлигини инобатга оладиган бўлсак, “Шўртан”га анча қийин бўлади. Ҳар иккала жамоага омад тилаган ҳолда, ҳақиқат юзасидан айтадиган фикрим қуйидагича: “Насаф” ушбу учрашувда биринчи рақамли жамоа сифатида ҳаракат қилади.
Мурод Исмоилов (“Пахтакор” клуби бош мураббийи): Аввало, учрашув қизиқарли, шиддатли ва кескин курашларга бой бўлишини айтиб ўтишим керак. Бу икки жамоанинг ўзаро учрашувларини кўп кузатганмиз, жуда чиройли ўйинларига гувоҳ бўлганмиз. 14 сентябр куни ҳам мана шундай ўйинларини намойиш этишади деган умиддаман. Мана шундай клубларнинг мана шундай чиройли ўйинлари орқали юртимиз футболи савияси кўтарилади ва мамлакатимиз чемпионатини безайди. Яна бир нарсани айтиб ўтишим керак: футболда кимдир ютади, кимдир ютқазади, балки дуранг ҳам бўлиб қолиши мумкин. Мана шундай вазиятда мағлуб бўлган жамоа ишқибозлари мағлубиятни тўғри қабул қилишлари керак ва ўртада низо келиб чиқишига йўл қўйишмаса мақсадга мувофиқ бўларди.
Тачмурат Агамуратов (“Бухоро” клуби бош мураббийи): Учрашув қизиқарли бўлиши аниқ. Бир вилоятнинг икки етакчи клуби чемпионатда медаллар учун кураш олиб бораётганлигининг ўзи “Қашқадарё дербиси” мақомини яна-да кучайтириб юборади. Натижани тахмин қила олмайман, негаки бу ўйинда ҳар иккила жамоадан ҳам исталган ҳисобни кутиш мумкин. Айтмокчиманки, “Насаф” ҳам, “Шўртан” ҳам бир-бирларига муносиб рақиб.
Юрий Саркисян (“Нефтчи” жамоаси бош мураббийи): Мен фақат ўз қўл остимдаги жамоа ўйини ҳақида фикр билдираман, қолган жамоаларнинг ўйинларини муҳокама қилишни ёқтирмайман.
Александр Хомяков (“Машъал” жамоаси бош мураббийи): Бир нарсани олдиндан айтиб қўяй – ўйин ҳисобини башорат қила олмайман! Ҳар икки клуб таркибида кучли футболчилар етарли жамланишган. Ўйин мен ёқтирадиган ҳужумкор, шиддатли курашларга бой бўлади. Чунки, ҳар икки жамоада буларни амалга ошира оладиган футболчилар топилади.
Равшан Ҳайдаров (“Қизилқум” жамоаси бош мураббийи): Албатта, ўйин қизиқарли тус олиши аниқ. Чунки, “Насаф” ҳам, “Шўртан” ҳам ҳозирги кунга келиб яхши шаклланган. Айниқса, “Шўртан” жамоасининг иккинчи даврада кўрсатаётган ўйини мақтовга лойиқ. Биринчи даврада ҳам ушбу жамоаларнинг ўзаро ўйини шиддатли курашлар остидан кечган эди, ишонаманки, бу сафарги баҳсда ҳам жамоалар чиройли ўйин намойиш этишади ва стадионга ташриф буюрадиган мухлисларни хурсанд этишади.
Александр Клименко (“Навбаҳор” жамоаси бош мураббийи): 2009 йилги чемпионатда фақатгина “Бунёдкор” ва “Пахтакор” клублари бошқа жамоалардан ўзиб кетишарди, ҳозирги кунга келиб эса совринли ўринлар учун “Насаф”, “Шўртан” ва “Локомотив” жамоалари қўшилишди. Умуман эса қолган жамоаларнинг ҳам савияси ўсиб бормоқда, яққол пешқадам ёки аутсайдер жамоани ажратиб бўлмайди. Бу эса чемпионатнинг савияси кўтарилиб бораётганидан далолатдир. “Қашқадарё дербиси” ҳақида гапирадиган бўлсак, мен ҳар икки жамоанинг ҳам ўйинларини диққат билан кузатиб боряман. Айниқса, “Шўртан” жамоасининг иккинчи даврада кўрсатаётган ўйинлари мазмунли кўриниш олмоқда. “Насаф” ҳам кучли жамоалардан бири. Демак, эртанги “дерби” чин маънода ўз мақомида ўтади. Натижани башорат қилиш қийин, чунки, ҳар икки жамоа ҳам ғалаба лойиқ ва “Насаф”дан ҳам, “Шўртан”дан ҳам ютуқ кутишимиз мумкин.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
