Твиттерда бир мавзуни ўн қилиб твит ёзиш одат тусига кирмасдан эринчоқликни енгдим ва блог очиш ҳақида кўпдан бери ўйлаб юрган режамни амалга оширдим.
Аслида бунга 28 сентябрда Тошкентда ўтадиган футбол оламидаги катта тадбир сабаб бўлди.
Таксининг олд ўриндиғида ўтирганим ҳам, шом қоронғусида планшетда "лов-лов" ёнаётган твитлар ҳам, орқа ўриндиқда "Бунёдкор" стадионининг очилиши ҳақида Ғазалкентдан то Сирғали қадар ёйилган миш-мишлардан ясалган икки нотанишнинг янги ҳикоясидан ҳам чалғита олмади.
Яна ўша эски ашула: "Шакира келаркан. "Барселона" келаркан, фалончи келаркан, пистончи чиқаркан..."
Такрорлайман. Бу ҳаммаси миш-миш. Айниқса, бизнинг халқда у жуда тез тарқалиши баробарида шаклию маъноси ундан-да тез ўзгарадиган миш-миш бу. Ким келади тадбирга, "Реал"ми ё "Барселона", Шакирами ё Бейонсми каби саволларга : "Пахтакор" ва "Бунёдкор", Озод ва Гулсанам", деб жавоб қайтараяпман.
Тадбир 28 сентябр куни "Бунёдкор" стадионида 18:00да бошланади. Стадионнинг тантанали очилиш маросимига чипта чиқарилмаган. Кириш таклифнома асосида. Таклифномалар бериладиган рўйхатни Ташкилий қўмита мажлиси баённомасига кўра Тошкент шаҳар ҳокимияти аниқлайди.
Мен ҳам таклифнома олдим. Унда мен учун махсус рақам берилган бўлиб, сектор ва жой кўрсатилган. Паспортсиз таклифнома ўтмайди. Масалан, паспортим бўлмаса, таклифномам қанчалар чиройли бўлмасин, истарам не қадар иссиқ бўлмасин, стадионга киролмай қайтаман.
Таклифнома фақат ўша инсон ундан фойдалангандагина ҳақиқийдир. Мен уни сизга, ёки анави йўл ёқасида келаётган гўзал қизга берсам ҳам ҳеч ким бу таклифнома билан стадионга киролмайди.
Тадбирда 30 дақиқалик 2 таймни яхлитлаган "Бунёдкор" ва "Пахтакор" ўртасидаги ўртоқлик учрашуви ўтказилади. Уни ФИФА рефериси Равшан Эрматов бошқаради.
Концерт ҳам бўлади. Демак, рақс ҳам бўлади. Бир сўз билан байрам бўлади.
Яна бир гап. Қандайдир бой ватандошимиз шу ҳафтада пойтахтда тўй қилаётган экан. Шу сабабли бугун ишхонадагилар Тошкент аэропортида тўйга "бирровга келган" Филипп Киркоров ва яна эсимда қолмаган яна бошқа юлдузларни кўришибди. Улар орасида Шакирани ҳам бор дейишди. Фарзанд кутаётган Шакира, мабодо эртага "Бунёдкор" стадиони саҳнасида қўшиқ айтиб қолса, бунга ўзим ҳам ишонолмайман, айтиб қўяй - менданмас.
Санжар Ризаев
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
