"Арсенал" 1992 йилдан бери (АПЛ даврида) голланд футболчиларидан кўплаб талантларга эга бўлган. Уларнинг баъзилари Лондонда зафар қучган, қолганлар эса йўқ. "Аякс" ҳимоячиси Юрриен Тимбер "Арсенал"нинг навбатдаги лолалар юртидан олган вакилига айланиши мумкин. Шу аснода биз бугун тарихга мурожаат қилиб, бу жамоанинг нидерланд футболчиларини баҳолаб кўрдик.
Гленн Элдер
1995 йилнинг февралида олиб келинган футболчи, жамоа устози Жорж Грэмнинг сўнгги хариди бўлади. Ҳужумчи "Арсенал"да асосан захирадан майдонга тушар ва фойдали ишларни амалга оширарди. Элдернинг энг эсда қоларли вазияти сифатида унинг Бергкампга узатган ажойиб кроссини эслаш кифоя. Афсуски, футболчи жамоани эрта тарк этади.
Жованни ван Бронкхорст
2001 йилнинг июнида 8 миллион фунт эвазига ярим ҳимоячи харид қилинади. Собиқ Нидерландия терма жамоаси аъзоси "Арсенал"даги даврида учта совринни қўлга киритади. Аввалига иккита Англия кубоги, кейин эса АПЛ ютиб олинган. Афсуски, ван Бронкхорст жароҳатлар сабабли асосий таркибдан тушиб қола бошлайди. Футболчи "Арсенал" сафида жами 64 та ўйин ўтказган. У 2003 йилда "Барселона"га сотиб юборилади.
Марк Овермарс
Англия Премьер-лигаси кўрган энг тезкор футболчилардан бири, рақибни даҳшатга соларди. У 1997-98 йилдаги лига ва кубокни ютишда Арсен Венгерга катта ёрдам беради. Мухлислар унинг Англияда ўтказган ғалабали йилларини ҳеч қачон унутмайди.
Робин ван Перси
Жамоа билан хайрлашиш балки яхши бўлмагандир. Аммо ван Перси ўзининг юқори спорт формасида фантастик даражага эга бўлган. У "Арсенал" учун 278 та ўйинда 132 та гол уришга эришади. Ван Перси 2011-12 йилги мавсумда жами 37 та голга муаллифлик қилади. Ажойиб ҳужумчи ашаддий рақиб жамоа бўлган "МЮ"га йўл олган эди.
Деннис Бергкамп
Биринчи ўринда яна кимнидир тасаввур қилганмидингиз? Албатта, ундай қила олмайсиз. Деннис АПЛ тарихидаги энг техникаси кучли футболчилардан бири бўлган. У ҳақида Арсен Венгер шундай деганди: "Агар сизнинг жамоангизда Бергкамп каби футболчи бўлса, унга қандай футбол ўйнашни ўргатишингиз шарт эмас. Шунчаки, сиз унга жамоадан шундай жой беришингиз керакки, у ўз маҳоратидан максимум фойдалана олсин".
ИСМАТОВ Ж.
Матнда хатолик топсангиз, ўша хатони белгилаб, бизга жўнатинг (Ctrl + Enter).