Бугун бўлиб ўтадиган Олий лиганинг 26-тур ўйинлари мусобақа жадвали қуйидаги ўринларга аниқлик киритиб беради.
“Андижон”га ким шерик бўлади?
Олий лигани тарк этувчи 13-ўринга “Машъал” ва “Навбаҳор” клублари “даъвогарлик” қилишмоқда. Бугун Муборакликлар ўз майдонларида “Бунёдкор”ни мағлуб эта олишмаса, “Навбаҳор” Зарафшон қандай натижа қайд этишидан қатъи назар, Олий лигада қолади.
Очколар сони бўйича Олий лигани тарк этиши мумкиндек кўринган “Қизилқум” дивизионни тарк этмайди. Зарафшонликлар ўз майдонларида “Навбаҳор”га ютқазиб, “Машъал” “Бунёдкор”ни енгган тақдирда бу жамоаларнинг очколари тенглашади — 26 очкодан. Ўзаро ўйинларга кўра, “Қизилқум” вакиллари устунликка эга — Муборакда 0:2, Зарафшонда 1:1 ҳисоблари қайд этилган. Равшан Ҳайдаров шогирдлари сўнгги турда 3 очкони қўлга киритишса, мавсумни 9-ўринда якунлашлари ҳам мумкин.
“Нефтчи” олтинчими ёки саккизинчи?
Фарғоналиклар ҳозир мусобақа жадвалида 7-ўринни эгаллаб туришибди. Бироқ Саркисян шогирдлари чемпионатни 6-ўринда ҳам, 8-ўринда ҳам якунлашлари мумкин. “Нефтчи” бугун ўз майдонида “Олмалиқ”ни қабул қилади. Бу жамоалар орасидаги фарқ 3 очкони ташкил қилмоқда. Олмалиқдаги 1-тур ўйинида ҳисоб очилмаган. Демак, Игорь Шквирин шогирдлари бу ўйинда ғалаба қозонишса, мавсумни 6-ўринда якунлашлари мумкин. Бугун “Бухоро” “Пахтакор”га ютқазса, дуранг натижа ҳам фарғоналикларни 6-ўринга олиб чиқади.
“Бронза” кимники?
Ўтган турда Зайниддин Тожиев томонидан “Насаф” дарвозасига киритилган “Локо”нинг иккинчи голи тошкентликлар учун жуда катта аҳамиятга эга бўлди. Агар 25-турдаги “Насаф” – “Локомотив” ўйини 0:1 ҳисобида якунланганида:
- ўзаро ўйинлар тенг бўларди (2-тур, “Локомотив” – “Насаф” 0:1, 25-тур, “Насаф” – “Локомотив” 0:1);
- Жамоаларнинг тўплар нисбати ҳам тенг бўларди +17 (“Локомотив” 38-21, “Насаф” 35-18).
Натижада бугун бўлиб ўтадиган “Локомотив” – “Шўртан” ва “Насаф” – “Динамо” ўйинларида мезбонлар кўпроқ гол уришга ҳаракат қиларди. Аммо бугун ундай бўлмайди. Ҳар қандай ҳисобдаги ғалаба “Локомотив” бронза медалларини тақдим этади. Рўзиқул Бердиев шогирдлари эса ўз вилоятдошларидан ёрдам кутишади.
Чемпион — ким?
“Пахтакор” жамоаси бугун ўйиндан аввал концерт дастури ташкил қилмоқда. “Бухоро” устидан қозонилажак ғалаба пахтакорчиларга 4 йиллик танаффусдан кейин навбатдаги (тўққизинчи) чемпионликни тақдим этади. “Бунёдкор” эса ўзининг қисқа тарихида иккинчи кумуш медалларни расмийлаштиради.
Анвар Бердиев — энг яхши тўпурар?!
"Нефтчи" ҳужумчиси 16та гол билан тўпурарлар баҳсида пешқадам бўлиб турибди. Ундан кейинги ўринда турган Игорь Таран ҳисобида эса 14та, Владимиш Шишелов ҳисобида 13та гол мавжуд. Бирор бир мўъжиза рўй бермаса, Анвар Бердиев Ўзбекистон чемпионати энг яхши тўпурарига айланади.
Олий лига. 26-тур.
21 ноябрь (чоршанба). Барча ўйинлар 14:00да бошланади
ЛОКОМОТИВ – ШЎРТАН
ҚИЗИЛҚУМ – НАВБАҲОР
МАШЪАЛ – БУНЁДКОР
АНДИЖОН – МЕТАЛЛУРГ
ПАХТАКОР – БУХОРО
НЕФТЧИ – ОЛМАЛИҚ
НАСАФ - ДИНАМО
26-тур олдидан мусобақа жадвали
ТЎПУРАРЛАР: 16 - Анвар Бердиев ("Нефтчи"), 14 - Игорь Таран ("Шўртан"), 13 - Владимир Шишелов ("Андижон"/"Насаф")
Матнда хатолик топсангиз, ўша хатони белгилаб, бизга жўнатинг (Ctrl + Enter).