Аччиқ бўлса-да, бу аниқ. Бу йилги мавсум мамлакат чемпионатида қатнашаётган профессионал футбол клубларимиз ва ҳатто уларнинг ўринбосарлари учун ҳам омадли келмади. Ўтган йили илк бор кумуш медалга, Осиё футбол конфедерацияси кубогига сазовор бўлган ва чемпионлик учун дадил кураш бошлаган "Насаф" лоақал учинчи ўринни ололмади. "Машъал"нинг эса биринчи лигага тушиб кетиш эҳтимоли катта...
Очиғи, чемпионат олдинги йиллардагидан кўра, мазмунлироқ ва қизиқарлироқ ўтди. "Пахтакор" 5 йилдан кейин чемпионлигини яна тантана қилди. Дастлабки уч ўрин эгаси номи сўнгги турга келиб маълум бўлди. "Локомотив" биринчи марта совриндорлар қаторидан ўрин олди ва ҳоказо.
Чемпионлик
Футболимизнинг 100 йиллиги нишонланаётган мавсумда чемпионлик пойтахтнинг "Пахтакор" жамоасига насиб қилди.
Мавсум бошиданоқ "Бунёдкор", "Насаф", "Шўртан", "Локомотив", "Нефтчи", "Олмалиқ" сингари бир қанча клублар ҳам турнир жадвалининг юқори поғоналарини эгаллашга ҳаракат қилдилар. "Насаф" 3 турда, "Шўртан" эса 1 турдагина чемпионат етакчисига айланишди, холос. Қолган турларда биринчи ўринни гоҳ "Пахтакор", гоҳ "Бунёдкор" эгаллаб келди.
Хуллас, шу кунгача ўтказилган 21 та чемпионатнинг 9 тасида "Пахтакор" ғолиб бўлди. Бу борада иккинчи натижа "Нефтчи"га тегишли – 5 чемпионлик. "Бунёдкор" 4, "Дўстлик" 2, "Навбаҳор" ва МҲСК жамоалари бир мартадан чемпион бўлишган.
Кумуш медаль
"Бунёдкор" футболчилари бу йилги мавсумни иккинчи ўрин билан якунлашди.
Миржалол Қосимов шогирдларининг ҳатто яна чемпион бўлишларига бир баҳя қолганди. Умуман, улар ёмон ўйин кўрсатишмади. Осиё чемпионлар лигасида ярим финалгача бўлган йўлни босиб ўтишди.
Бу "қалдирғочлар"нинг ўз фаолиятларидаги иккинчи кумуш медали. Унгача "Нефтчи" 9, "Пахтакор" 5, МҲСК, "Насаф", "Машъал", "Бухоро" жамоалари бир мартадан ушбу натижага эришишган.
Бронзанинг янги эгаси
Иккинчи даврани кўтаринки кайфиятда ўтказган "Локомотив" футболчилари бу ўринни эгаллашга ҳақли эдилар.
Сабаби темирйўлчилар кейинги 13 ўйиннинг бор-йўғи биттасида, "Пахтакор"гагина ютқазишди. 2 тасида дуранг қайд этилди. 10 та ўйин уларнинг ғалабаси билан якунланди. Шунинг учун ҳам улар биринчи давра охирида 8-ўринда бўлган бўлсалар, чемпионат якунида бронза медалга эришдилар.
Учинчи ўринни эгаллаш бўйича "Навбаҳор" рекордчи ҳисобланади – 8 марта. "Насаф"да 6, "Пахтакор", "Нефтчи", МҲСК, "Машъал", "Сўғдиёна", "Қизилқум" жамоалари ҳисобида биттадан бронза медаль бор.
Тўпурар
"Нефтчи" ҳужумчиси Анвар Бердиев 19 та гол билан 2012 йилги мавсум тўпурари бўлди.
Футболимиз тарихига назар ташласак, шу пайтга қадар вилоятимиз жамоаларидан ҳеч ким тўпурар бўлмаган. Бу клубларимизнинг жамоавий ўйин кўрсатишидан дарак берса-да, ҳужумчиларимиз орасида ўз маҳоратини якка ҳолда намойиш эта оладиганлари кам эканлигини кўрсатиб беради, чамамда.
"Дўстлик" жамоаси сафида тўп сурган ҳужумчи Жаъфар Ирисметовнинг 2000 йилги чемпионатда кўрсатган натижаси ҳамон энг юқори кўрсаткич бўлиб турибди. У ўша йили рақиблари дарвозасига 45 та тўп киритган эди.
Мағлубиятсиз "юриш"
21-чемпионатда бирйўла икки жамоа – "Пахтакор" ва "Бунёдкор" энг яхши натижага эга бўлишди. Улар бирин-кетин 14 та турни мағлубиятсиз ўтказишди.
Турдан-турга фақат ғалаба ёки дурангга эришиш осон кечмайди. Шу сабабли ушбу номинацияга алоҳида эътибор қаратилади. Бу йилги мавсумда, айниқса, "пахтакор"чилар шов-шувли натижа кўрсатдилар. Пойтахтликлар иккинчи даврада бирор марта ҳам мағлуб бўлишмади.
Энг йирик ҳисоб
Хайрият, шу номинациядагина вилоятимиз жамоаларига ўрин берилди. "Шўртан" 16-турда ўз майдонида "Андижон"ни 6:1 ҳисобида мағлуб этди.
Бу борада андижонликлар ҳам сермаҳсул бўлишди. Улар 17-турда "Қизилқум"ни 5:1 ҳисобида енгишди. Бундан ташқари 13-турда "Пахтакор" "Металлург"дан 5:0 ҳисобида устун келди.
Ёшлар лигаси
Олий лига ўйинлари билан параллел равишда ўтказилаётган ёшлар лигасида бу йил ёш "пахтакор"чилар чемпион бўлишди.
Иккинчи ва учинчи ўринлар "Нефтчи" ва "Андижон" жамоалари ўринбосарларига насиб қилди. Ўтган йили мазкур лигада ғолиб бўлган "насаф"чилар бу сафар 5-ўрин билан қаноатланишди. Агар улар сўнгги турда "Динамо" ёшларини енгганларида, учинчи ўринни эгаллашарди. Начора...
Умуман, Ёшлар лигасида "Пахтакор" ва "Нефтчи" ўринбосарлари энг кўп – 7 мартадан ғолиб бўлишган. "Бунёдкор" ва "Насаф" ёшлари ҳисобида биттадан чемпионлик бор.
Хуллас, якунланган чемпионатда клубларимиз кўплаб номинациялардан "қуруқ" қолдилар. Нима бўлганда ҳам ҳали умид бор. "Насаф" Ўзбекистон кубоги ярим финалида курашни давом эттираяпти. Ҳеч бўлмаса, бу мусобақада ғолиб ёки совриндор бўлармиз...
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
