21 январь куни футзал бўйича 17-Ўзбекистон чемпионати 1-босқич 4-тур ўйинлари старт олди.
Биринчи ўйин куни футзал ихлосмандлари шиддатли курашларга бой бўлган бир қатор қизиқарли баҳслар гувоҳига айланишди. Фақатгина «Строитель-Зарафшон» - «Бунёдкор» ҳамда «Пахтакор» – «Когон» учрашувларида томонлардан бирининг яққол устунлиги сезилиб турди, холос. «Бунёдкор» ўйинчилари зарафшонликларни ортиқча қийинчиликларсиз, 9:2 ҳисобида мағлубиятга учратишган бўлса, Бухоро вилоятининг «Когон» жамоаси аъзолари «Пахтакор»ни 5:2 ҳисобида таслим этишди.
Куннинг қолган уч ўйинида ҳар бир жамоа охиригача кураша олишини намойиш этди. Тошкентнинг «Локомотив» ва Сирдарё вилоятининг «Гулистон» жамоалари ўртасидаги ўйин бунга ёрқин далил бўла олади. Ушбу мавсум энг юқори ўринлар учун даъвогарлик қилаётган «темирйўлчилар» ўйинда ғолиб чиқишди, бироқ «Гулистон» устидан ғалаба қозониш улар учун осон бўлгани йўқ. «Гулистон» дарвозасига 5та гол ургани билан, «Локомотив» ўз дарвозасидан 4та тўп ўтказиб юборди.
Андижоннинг «Турон-С» ва Самарқанднинг «Нафис» жамоалари ўртасидаги ўйин ҳам жуда томошабоп ўтди. Ўйин якунига етган вақтда жамоаларнинг урган голлари орасидаги фарқ атиги биттани ташкил этарди. Ўйин андижонликлар ғалабаси билан якунига етди – 4:3.
Куннинг марказий ўйини «Максам-Чирчиқ» ҳамда «Ардус» ўртасида бўлиб ўтди. Чемпионат етакчилари, ўйин давомида бор-йўғи 2та гол ура олишган бўлса-да, жуда юқори савиядаги ўйин кўрсатишга муваффақ бўлишди. Ушбу ўйин арафасида «Ардус»дан 8 очко ортда қолиб кетаётган чирчиқликлар, орадаги масофани қисқартириш мақсадида, бор кучлари билан ҳаракат қилишди. Ва улар бу вазифани деярли уддалай олишди. Учрашувнинг 4-дақиқасидаёқ Хуршид Тожибоев аниқ зарба билан «Максам»ни ҳисобда олдинга олиб чиқди. Шунга қарамай, Тошкент вилояти жамоаси ғалабали ҳисобни сақлаб қола олмади. Иккинчи бўлимнинг 9-дақиқасида Жамолиддин Шарипов ҳисобни тенглаштириб, «Ардус»ни мавсумдаги иккинчи мағлубиятдан қутқариб қолди.
Футзал бўйича 17-Ўзбекистон чемпионати
1-босқич, 4-тур, 1-кун ўйинлари
21 январь, душанба
Строитель-З – Бунёдкор 2:9
Голлар: Кенжамурод Турсунбоев (14), Шерзод Баҳритдинов (15) – Машраб Одилов (17, 19), Бахтиёр Умаров (19, 21), Жасур Содиқов (22), Улуғбек Абдуллаев (34), Суннат Куралов (35), Жавлон Искандаров (38), Абдулла Бўриев (39).
Локомотив – Гулистон 5:4
Голлар: Саидакбар Саидаҳмедов (1, 27), Нодир Элибоев (7), Ғулом Мамажонов (12), Константин Свиридов (25) – Дадахон Давлатов (4), Шерзод Алижонов (30), Иномжон Қодиров (33), Нодир Сайфуллаев (33).
Пахтакор – Когон 2:5
Голлар: Нодир Исроилов (31), Элбек Бақоев (39) – Сами Эгамбердиев (2), Жўрабек Аҳмедов (27), Соҳиб Нарзуллаев (30, 40), Соҳибжон Набиев (35).
Турон – Нафис 4:3
Голлар: Мухтор Абдукаримов (5, 26, 31), Хайрулло Ҳожимирзаев (31) – Хуршид Бобоқулов (14), Дилшод Ҳайдарқулов (26), Анвар Мамедов (34).
Максам-Чирчиқ – Ардус 1:1
Голлар: Хуршид Тожибоев (4) – Жамолиддин Шарипов (29).
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
