Бугун 30 январь куни Ўзбекистон футбол федерацияси мажлислар залида Ўзбекистоннинг иккита терма жамоаси — ёшлар ва пляж футболи жамоаларининг навбатдаги мусобақада иштирокига бағишланган матбуот анжумани бўлиб ўтди. Унда Терма жамоалар маркази раҳбари Асқар Толибжонов, мураббийлар — Аҳмаджон Мусаев ва Аҳаджон Юсупов иштирок этишди.
Асқар Толибжонов:
— Ушбу йилда 12та терма жамоамиз турли мусобақаларга тайёргарликни олиб боришади. Уларнинг айримлари Тошкентда ўқув-машғулот йиғинини ўтказишган бўлса, ёшлар ва пляж футболи терма жамоаларимиз йил бошидан халқаро мусобақада иштирок этиб қайтишди. Шунингдек, миллий терма жамоамиз Осиё кубоги-2015 саралаш баҳсига тайёргарлик борасида БААда йиғин ўтказмоқда. Улар 2 февраль куни Тошкентга қайтишади ва 3 февралдан бошлаб Гонконгга қарши тайёргарликни пойтахтимизда олиб боришади. Йил бошида терма жамоаларнинг тайёргарлик режаси амалга оширилиб келмоқда.
— Ёшлар терма жамоамиз ҲАмдўстлик кубогини жуда яхши бошлади. Аммо кейинчалик ўйинимизда пасайиш кузатилди. Бу нима билан боғлиқ?
— Аввало, Ҳамдўстлик кубогида иштирок этиш учун бизга имкон бергани учун катта раҳмат айтаман. Биз ушбу мусобақада маълум режа асосида иш олиб бордик. Бу мусобақа бизга катта фойда берди. Тошкентда 10 январдан бошлаб йиғилишни бошладик. Мавсум энди бошланаётгани учун бир ҳафта давомида футболчиларнинг тайёргарлигини юқори даражага олиб чиқиб бўлмайди. Агар биз уларнинг тайёргарлигини ҳозирдан юқорига олиб чиқадиган бўлсак, ЖЧга бориб, уларда пасайиш кузатилиши мумкин. Тошкентда 2та ўртоқлик ўйини ўтказдик. "Сўғдиёна" билан ўйинда барча футболчиларни синовдан ўтказдик ва йигитларнинг ҳолатини кўздан кечириб олдик. "Қизилқум" билан ўйинда эса ғалаба қозондик.
Олиб бораётган тайёргарлигимиз тўғри йўлдан кетаётганини мусобақа кўрсатиб берди. Январь ойи учун кўрсатган ўйинларимиз ёмон эмас. Ҳамдўстлик кубогидаги иштирокимиз бошқа мамлакат матбуоти томонидан яхши қабул қилинди. Ёшларимиз кетма-кет ўйинларда чарчашди. Бу баҳона эмас, аммо инсон физиологиясини алдаб бўлмайди.
Таҳлилларга кўра, фақат бизнинг терма жамоада бирорта ҳам оғир жароҳат бўлмади. Демак, жисмоний тайёргарлик бўйича мураббийларимиз ва шифокорларимиз яхши ўйин кўрсатишди.
Қирғизистон билан ўйин ҳақида тўхталадиган бўлсам, биз ҳар бир ўйинчига ўйнаш имконини беришимиз керак. Терма жамоада ҳар бир йигитнинг ўз ўрни бор.
— Мусобақа давомида иштирокчилар томонидан эътирозлар билдирилди...
— Тўғри, мусобақа регламенти юзасидан эътирозлар кўп бўлди. Россия яна қайта бизга тушганида, регламентни ўзгартирмоқчи бўлишди. Регламентни ўзгартиришмадию, аммо ўйин вақтига барибир ўзгартириш киритишди. Чорак финал жуфтликлари рейтинг асосида тузилгани мен учун катта аҳамиятга эга эмасди. Шахсан менга мусобақа чемпиони билан 2 марта ўйнаганимиз яхши бўлди. Яна қачон бундай имкониятга эга бўламиз?
— Футболчи майдонга тушишдан олдин ўйинга руҳан тайёргарлик кўради. Қирғизистон билан ўйин натижаси мухлисларни хафа қилди. Бу ўйинда терма жамоа олдига ғалаба қозониш вазифаси қўйилганмиди?
— Барча давлатларда футбол ривожланяпти. Ундан кейин жамоанинг ўйини унинг қай даражада тайёргарлик кўрганига боғлиқ. Мен ҳар доим футболчиларга бир гапни тайёргарлик таъкидлаб келаман: 17 ёшли футболчилар ЖЧда иштирок этиш учун 20 ёшли футболчилардек фикрлаш керак, 20 ёшли футболчилар ўртасидаги Жаҳон чемпионатида муносиб қатнашиш учун эса 25 ёшли футболчилардек фикрлаш керак, ана шундай ўйнаш керак. Қирғизистон билан ўйинда иккинчи таркибда туширганимда, мен уларга бизга ҳисобнинг фарқи йўқ деб айтмадим. Ўйинни ёмон бошламадик. Гол урдик. Кейин эса гол ўтказиб юбордик. БУ футболчиларда ҳаяжон юқори бўлди. Шунинг учун ўз имкониятларида ҳаракат қила олишмади.
Агар федерация бизнинг олдимизга қандай қилиб бўлмасин ғалаба қозониш вазифасини қўйганида, шунга яраша ҳаракат қилардик. Аммо бундай ҳолатда кўплаб футболчиларимиз жароҳат олишлари керак эди. Аслида ўсмирлар ва ёшлар тикланиши учун 48 соат, миллий терма жамоа ўйинчилари учун 72 соат вақт керак. Биз 20 январь куни Қозоғистон билан ўйнаган бўлсак, 23 январь куни Россия билан ўйиндан олдин айнан футболчиларга 48 соат дам олиш имконини бердик. Натижада Россияга қарши жуда яхши ўйнадик.
— ЖЧгача захира таркибини кучайтириш масаласини қандай ҳал қилмоқчисиз?
— Мана шундай мусобақаларда футболчиларни қўйиб, уларни синовдан ўтказишимиз мумкин. Бу масала устида ўзимиз ҳам кўп бош қотиряпмиз. Бунинг учун футболчиларни ўйинга кўпроқ қўйиш керак. Ғалаба қозонишни мақсад қилиб, фақат бир таркибни тушираверсак, ҳеч қачон захирадаги футболчиларнинг ўйини кучайиб қолмайди.
Бизга тақдим этилган ҳисоботга кўра, Ўзбекистон ёшлар терма жамоаси техник-тактик томонлама энг яхши терма жамоалардан бири бўлади. Футболчиларимизнинг фойдали иш коэффициенти юқори деб тан олинди. Футболчи майдонда кам ҳаракат қилса ҳам, майдонда тўғри ҳаракат қилиши лозим.
Кейинги режалар ҳақида тўхталадиган бўлсам, февраль ойида Туркияга борамиз. Аввало ЖЧ ўтадиган мезбон мамлакат об-ҳавосига мослашишимиз керак бўлса, шунингдек, у ерда назорат ўйинлари учун рақиблар кўп бўлади. ЖЧга чиққан бошқа терма жамоалар ҳам Туркияга келишга ҳаракат қилишади.
Асқар Толибжонов:
— Ёшларимиз Туркияда 2та ўйин ўтказиши режалаштирилган. Бири маҳаллий жамоа бўлса, 20 февралда Туркия ёшлар терма жамоаси билан ўртоқлик ўйинини ўтказиш борасида келишувга эришдик. Март-апрель ойларида Африка ва Европа терма жамоалари билан ўртоқлик ўйинини ўтказишади. Камида 2та Африка терма жамоаси билан ўйин ўтказишимиз керак. 23 ва 25 апрель кунлари Португалия ёшлар терма жамоаси билан 2та ўйин режалаштирганмиз. Ўйин Порту шаҳрида бўлиб ўтади. Португалия футбол федерациясидан бизга расмий хат келди. Май ойида Тошкентда йиғин ўтказилади ва шу билан июнь ойида терма жамоа Туркидаги ЖЧга йўл олади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
