34 ёшли Томас Мюллер ЕЧЛ ярим финалининг «Реал»га қарши жавоб учрашувида майдонга тушиб, нуфузли турнирдаги иштироки бўйича Хавининг рекордини такрорлади.
Яъни, германиялик ҳужумчи 151та учрашувда майдонга тушди. Афсонавий дарвозабон Икер Касильяснинг кўрсаткичи ҳам шундай. «Бавария» ҳужумчиси бу борада яққол пешқадамга айланиш имкониятига эга эди. Бироқ унинг жамоаси финал йўлланмасини қўлга кирита олмади.
Мюллер - ғаройиб ўйинчи. Томас Германиянинг энг совриндор футболчиси бўлсада, бутун фаолияти давомида муносиб эътирофга лойиқ кўрилмаган. У Бундеслигада 12 марта чемпионликни байрам қилган, мазкур «кумуш товоқлар»нинг нақ 11тасини қаторасига узлуксиз қўлга киритганди. Шунингдек, Мюллер миллий терма жамоа таркибида жаҳон чемпиони унвонига сазовор бўлган, 2 марта Европа чемпионатининг бронза медалларини қўлга киритган.
Шу пайтгача Мюллер «Бавария» либосида қарийб 800та учрашувда майдонга тушиб, 500дан ортиқ самарали ҳаракатларни амалга оширди. Табиийки, шундай мақомдаги футболчи юксак эътирофга муносиб.
Янги амплуа ўйлаб топган
Герд Мюллер, Руди Фёллер, Карл-Хайнц Румменигге, Юрген Клинсманн, Мирослав Клозе - немис футболи тарихида буюк ҳужумчилар етарли. Томас ҳам ҳақли равишда улар сафидан ўрин олган.
Бироқ бутун фаолияти давомида «Бавария» тарбияланувчисининг ўйинлари жиддий эътибордан четда қолгандек. Баҳс-мунозараларнинг асосий қисми Мюллернинг майдондаги позицияси мавҳумлиги туфайли юзага келарди. Томас соф марказий ҳужумчи ҳам, иккинчи ҳужумчи ҳам, ҳужумкор ярим ҳимоячи ёки вингер ихтисосидаги ўйинчи эмасди. У ана шу позицияларнинг ҳар биридан муайян жиҳатларни ўзи учун қурол қилиб олган, ҳатто ўзига хос услубни ихтиро қилгандек. «Рақиб жамоанинг ўрта чизиғи ортидаги бўшлиқда фаол ҳаракатланиш менга жуда ёқади. Айнан шу ҳудудда ўзимни эркин ҳис этаман ва кўпроқ манфаат келтиришим мумкин. Менинг ихтисосим , ҳужумчи ва ярим ҳимоячининг қоришмаси», - дейди Мюллер.
Раумдойтерни сохта «тўққизлик» ихтисоси билан чалкаштириб қўйиш мумкин. Функционал жиҳатдан, улар бир-бирига жуда яқин. Лекин муҳим тафовут шундаки, раумдойтер футболчининг тўпсиз қолган ҳолда ўзи учун қулай бўшлиқни излашини англатади. У марказий ҳужумчи билан ёнма-ён ҳаракатланиб, асосий вақтини ўйиндан четда қолгандек бўш ҳудудни излаш билан ўтказади. Бироқ керакли паллада хавфли ҳудудда тўп билан пайдо бўлганида, рақиб ҳимоячилари эсанкираб қолишади. Ана шу кутилмаган хавфни яратиш Мюллернинг юксак салоҳиятидан далолат беради.
Томас ўзининг камчиликларини аъло даражада яширади
Раумдойтер позициясига Мюллер ўзининг юксак маҳорати эвазига келган эмас, мазкур роль кўмагида футболчи майдондаги секин ҳаракатланиши ва бошқа техник камчиликлари жамоа манфаатига путур етказмаслигини таъминлайди.
Гол «ҳиди»ни ва қулай бўшлиқни яхши ҳис этиш - Томаснинг асосий устун жиҳати. Ана шу фазилатларидан самарали фойдаланиши Мюллерга «Бавария»да Мирослав Клозе, Марио Гомес, Марио Манжукич ва Роберт Левандовскиларнинг йўқлигини сездирмаяпти. Бундан ташқари, Томас ҳозир Харри Кейннинг сермаҳсуллигига сезиларли ҳисса қўшмоқда.
Қаҳрамонимиз ўйин услуби ўта оддий режага асосланган - тўпга имкон қадар камроқ тегиниш, ўз вақтида амалга ошириладиган тезкор узатмалар, идеал даражадаги рейдлар ва хавфли вазиятлардан унумли фойдаланиш. Томас «офсайд» чегарасида нафис ҳаракатлари эвазига рақибларини худди тажрибали шахматчилардек ортда қолдириб кетади. «Яширмайман, дриблинг бобида мақтана олмайман. Шунингдек, менга нисбатан яхшироқ тепадиган ва югурадиган ҳужумчилар ҳам йўқ эмас. Бироқ салбий жиҳатларим кўп бўлишига қарамасдан, муваффақиятга эришмоқдаман. Сабаби, мен фақат ўзим уддалай оладиган ишга қўл ураман», - дейди Томас.
Хўш, нима учун Мюллернинг имкониятларига етарлича баҳо берилмайди?
Жавоб жуда оддий: футболда Томаснинг жамоа ўйинига қўшган улушини 100 фоиз аниқлик билан белгилаб берадиган кўрсаткич мавжуд эмас. Бундан ташқари, Мюллер футбол мухлисларида кучли таассурот қолдирадиган ўйинчи эмас. У ўз ишини мукаммал адо этадиган меҳнатсевар йигит, холос. Унинг тоифасидаги ўйинчиларни камдан-кам ҳолларда миллионлаб мухлислар «кумири» сифатида спорт ОАВ муқоваларида кўриш мумкин. Ҳа, албатта, «Бавария»да Томас аллақачон афсона мақомида эътироф этилади. Лекин Германиядан ташқари жойларда, афсуски, назар-писанд қилишмайди. «Менинг асосий юмушим - рақиб ҳимоясидан заиф жиҳатларни топиш ва ўша ерда бўлиш. Техника ва тезлик бобида ўртача кўрсаткичлар билан жаҳон чемпиони бўлиш ва топ-клубда тўп суришни ўзим учун ғайритабиий ҳол, деб ҳисоблайман».
Йил сайин Мюллернинг сермаҳсуллиги пасайиб бормоқда. Бироқ бу унинг савиясига тааллуқли эмас. Томас ҳамон ўз ишининг устаси, «бўшлиқ босқинчиси». Ҳар қандай вазиятда ҳам, 7Қ10 кўрсаткичи 34 ёшли фахрий учун ёмон натижа эмас. Афсуски, «Бавария» ЕЧЛнинг финалига чиқа олмади, Мюллер эса ўз фаолиятидаги 3-«шалпангқулоқ»ни қўлга киритиш имкониятидан маҳрум бўлди. Ҳа, нуфузли совринга атиги икки қадам қолганда курашни тўхтатди.
Содиқ СОБИР тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
