Сўнгги йиллар натижаларидан хулоса чиқарадиган бўлсак, қаторасига иккинчи марта чемпионликка эришиш мавсумни бирорта мағлубиятсиз якунлаган...
Ва 2016 йилдаги «Лестер», 2017 йилдаги «Монако» сингари тасодифий ғолиблар сафидан жой «Байер»га ҳам осон бўлмайдигандек кўринади. Муваффақиятни мустаҳкамлаш ҳаммага насиб этавермайди. Эҳтимол, «доришунослар» буни уддалашар, Хаби Алонсо жамоани тарк этмоқчи эмас. Биз эса сенсацион зафарлар ижодкорларининг кейинги мавсумдаги натижаларини ёдга оламиз.
«ВЕРДЕР»
Бундеслига-2003\2004 - 1-ўрин
Бундеслига-2004\2005 - 3-ўрин
Бақалоқ Аилтон ёдингиздами? Бразилиялик мерган 1980-йиллардаги Карл-Хайнц Руммениггедан кейин биринчи бўлиб Бундеслигада 28та гол урган ва «мусиқачилар»нинг 4-чемпионликлари ва Германия Кубогини қўлга киритишларига муносиб ҳисса қўшганди. Оливер Кан, Михаэль Баллак ва Рой Макай каби афсоналари бўлган «Бавария» нақ 6 очкога ортда қолганди. Аилтон ва сербиялик ҳимоячи Младен Крстаични илиб кетган «Шальке» кейинги мавсумда чемпиондан ўзиб кетди, «кумуш товоқ» эса Мюнхенга йўл олди. Бироқ бременликлар ҳам бўш келишмади ва 2008\2009 йиллар мавсумига қадар совриндор учликда юришди.
«ШТУТГАРТ»
Бундеслига-2006\2007 - 1-ўрин
Бундеслига-2007\2008 - 6-ўрин
Ўша йилнинг энг ажабтовур воқеаси «Штутгарт»нинг тасодифий чемпионлиги эмас, «Бавария»нинг етакчи учликда йўқлиги бўлди. Гранд ўйинидаги пасайишдан «Шальке» ва «Штутгарт» унумли фойдаланди.
Бироқ кейинги мавсумда амалдаги чемпион 6-ўринни банд этди. Боз устига, стартдаги 10та ўйиннинг 6тасида мағлубиятга учради ва октябрь ойидаёқ чемпионлик ваколатидан жудо бўлди. Қўшимчасига, ЕЧЛда «Барселона», «Лион» ва «Рейнжерс» бўлган гуруҳда 4-ўринда қолиб кетди.
«ВОЛЬФСБУРГ»
Бундеслига - 2008\2009 - 1-ўрин
Бундеслига - 2009\2010 - 8-ўрин
«Штутгарт»нинг зафаридан кейин совринни яна «Бавария» қайтариб олди, лекин узоқ муддатга эмас. Кейинги йилда «кумуш товоқ» илк марта «Вольфсбург»га насиб этди. Ваҳоланки, 26-тургача «бўрилар» жадвалнинг ўртасида эдилар. Бироқ кейин Эдин Жеко - Графите - Звездан Мисимович учлиги Бундеслигадаги энг яхши сермаҳсулликни намойиш этиб, жамоани шоҳсупага олиб чиқишди.
Кейинги мавсумда топлар таркибда қолган бўлсаларда, мўъжизакор сермаҳсуллик такрорланмади. Айниқса, ноябрь-феврал оралиғида жамоа 10та ўйинни ғалабаларсиз ўтказди. Қўшимчасига, ЕЧЛда ЦСКАдан енгилиб, плей-офф босқичи йўлланмасини «армиячилар»га ҳадя этди.
«ВАЛЕНСИЯ»
Ла Лига-2001\2002 - 1-ўрин
Ла Лига-2002\2003 - 5-ўрин
Ла Лига-2003\2004 - 1-ўрин
Ла Лига-2004\2005 - 7-ўрин
«Кўршапалаклар» аввалига ЕЧЛда қаторасига 2 марта финалга чиқиб, шов-шув кўтаришди. Кейин навбат ички чемпионатдаги рақибларини янчишга келди. Сантьяго Канисарес, Пабло Аймар, Роберто Айяла, Карлос Марчена каби афсоналар навқирон ва иззатталаб Рафа Бенитес раҳбарлигида ёрқин ўйинларни намойиш этишди. На Роналдунинг «Реали», на Мессининг «Барселонаси» уларга тўсиқ бўла олди. Диего Симеоненинг йигитлари эса бошқача фикрда эдилар: навқирон Куртуа, қоядек мустаҳкам Диего Годин, Коке - Габи - Рауль Гарсия - ярим ҳимоя учлиги Диего Коста - Давид Вилья ҳужумчилар дуэти билан ҳамкорликда совринни тортиб олишди.
Бироқ «матрасчилар» ҳам навбатдаги зафарга 7 йилдан кейин эришдилар. Лекин қаторасига 11 йил ичида фақат 1 марта совриндор учликдан четда қолдилар.
«МОНПЕЛЬЕ»
Лига 1-2011\2012 - 1-ўрин
Лига 1-2012\2013 - 9-ўрин
Бу жамоа элитадаги иккинчи мавсумида чемпион бўлганди. Тасаввур қилинг-а, кейинги йилда «Балтика» РПЛда ғолиб чиқса, нима бўлади? Фантастика, тўғрими? Рене Жирар жамоаси шундай муваффақиятга эриша олди. Энг яхши тўпурар Оливье Жиру, Мапу Янга-Мбива, Юнус Беланда ва Реми Кабеллалар жамоаси «ПСЖ»дан кучлироқ эканлигини исботлади.
Жиру «Арсенал»га кўтарилди, Мапу «Ньюкасл»га. Шундан бери «Монпелье» - ўртамиёна жамоа.
«МОНАКО»
Лига 1-2016\2017 - 1-ўрин
Лига 1-2017\2018 - 2-ўрин
Бу ўта ишончли ғалаба эди. Монегасклар 95 очко билан тахтни эгалладилар - ҳатто «ПСЖ» ҳам бунчалик кўп очко жамғара олмаган. 18 ёшли Килиан Мбаппе, ҳамон юксак савиядаги Радамель Фалькао, Фабиньо, Жоау Моутинью, Бернарду Силва, Тьемуэ Бакайоколар...
«Монако» ЕЧЛда ҳам зўр ўйин кўрсатиб, ярим финалгача етиб борганди. Табиийки, клуб «босс»ларининг ови юриб қолди, ахир жамоа кўпроқ олди-сотдига ихтисослашган. Тўғри, кейинги мавсумни 2-ўринда якунлади. Лекин ундан кейингисида 17-ўринни эгаллаб, элитада аранг жон сақлаб қолганди.
«ЛИЛЛЬ»
Лига 1-2020\2021 - 1-ўрин
Лига 1-2021\2022 - 10-ўрин
Эден Азар ва Йоанн Кабай етакчилигида «доглар» 2010\2011 йиллар мавсумида ҳам ғолиб чиқишганди. Бироқ у пайтда «Лион» заифлашиб қолган, «ПСЖ» эса ҳозиргидек кучли эмасди. 10 йилдан кейин қўлга киритилган олтин - ўзгача.
«Лилль» Мик Меньян, Свен Ботман, Ренату Саншеш Рейнилду ва бошқа иқтидорлар билан чемпионликка эришди. Кейин жамоа ўйинчилар сотувидан 79 млн. евро ишлади ва ўртамиёна жамоага айланди. Лекин ЕЧЛда «Зальцбург», «Севилья» ва «Вольфсбург»га қарши баҳсларда 1-ўрин билан гуруҳдан чиқди. Бироқ 1\8 финалда «Челси»ни енга олмади.
«РУБИН»
РПЛ-2008 йил - 1-ўрин
РПЛ-2009 йил - 1-ўрин
Рўйхатимиздаги чемпионлик унвонини ҳимоя қила олган ягона жамоа! Қозон клубининг олтин медалларни олишига мухлислар мавсум якунида, Петербург ва Москвадаги фаворитлар «Рубин» билан тенглаша олмасликлари аён бўлганидан кейин ишонишди. Қурбон Бердиевнинг ҳимоя қўрғонини вайрон қила оладиган қурол ҳеч кимда топилмади. Қолаверса, Бердиев шогирдлари орасида анойи ўйинчилар деярли йўқ эди: Сергей Рижиков, Роман Шаронов, Сергей Семак, Сергей Ребров, Кристиан Нобоа ва бошқалар.
«Рубин» кейинги олтин медални ҳам ортиқча қийинчиликсиз, «Спартак»дан 8 очкога олислаб кетган ҳолда нишонлаганди. ЕЧЛда эса қозонликлар «Барселона»ни «Камп-Ноу»да таслим этиб, тарихий ғалабага эришдилар. Кейинги йилларда жамоа бунчалик ёрқин ўйинни кўрсата олмади.
«ЛЕСТЕР»
АПЛ-2015\2016 - 1-ўрин
АПЛ-2016\2017 - 12-ўрин
«Рубин», «Монако» ва «Валенсия» - ҳаммаси ажойиб, албатта. Бироқ, чинакам эртак - «Лестер»га тегишли. Тасаввурга сиғмайдиган рақобат туфайли. Барча топ-клублар инқирозга юз тутган, элита иккинчи мавсумини ўтказаётган «тулкилар» эса айни қирчиллама паллада. Каспер Шмейхель, Н~Голо Канте, Риёд Маҳрез, Жейми Варди - бу йигитлар нималарга қодир эканликларини кўпчилик ҳали билмасди. «Лестер» якунда чемпионликни қайтариб олиш учун яхши имкониятга эга бўлган «Арсенал»ни нақ 10 очкога ортда қолдирганди. Табиийки, сут ичиб оғзи куйган жамоалар янги мавсумда аутсайдер жамоага эркин беришмади, фақат Кантедан жудо бўлган «тулкилар» эса соврин тугул, етакчи учликка ҳам илина олмади. Февралда эса клуб мутасаддилари чемпион-мураббий Клаудио Раньерига чиқиш эшикларини кўрсатишди. Ҳа, ўшанда жамоа ЕЧЛда чорак финалгача кўтарилган бўлсада, ички чемпионатда ўртамиёналар сафига тушиб қолди ва ўтган йили Чемпионшипга тушиб кетди. Интиҳоси ғамгин эртак. Хўш, «Байер»нинг эртагининг давоми қандай бўлади? янги мавсумни интиқлик билан кутамиз.
А.АБДУВАЛИХЎЖАЕВ тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
