Футбол оламига бир қатор жарангдор трансферларни тақдим этган Европа топ-лигаларидаги трансфер дарчаси ёпилди.
Унда кўпгина таниқли ва энди порлай бошлаган юлдузлар янги жамоаларига ўтишди. Шунингдек, улар орасида анчадан бери сояда юрган футболга чанқоқ афсоналар яна номдор жамоалар сафидан жой олдилар. Ҳикоямиз ана шу кутилмаган қаҳрамонлар ҳақида.
Хамес Родригес «Райо Вальекано»га
33 ёшли колумбиялик плеймейкер 4 йиллик танаффусдан кейин Испанияга қайтди. Фахрий футболчи ёзда Колумбия терма жамоаси билан Америка Кубогида финалга қадар етиб борди ва турнирнинг энг яхши ўйинчиси совринига сазовор бўлди. Шундан кейин Хамес «Райо»дан таклиф олгач, «Сан-Паулу»даги фаолиятини барвақт якунлади ва Ла,Лига клубидан эркин агент мақомида жой олди.
Родригес «Реал» билан 2 марта ЕЧЛда ва Ла Лигада ғолиб чиққан, «Порту» билан ЕЛда зафар қучган, Бундеслигада 2 марта «Бавария» сафида «Кумуш товоқ» соҳибига айланган, 2013|14 йиллар мавсумида «Монако» сафида Лига 1нинг энг яхши ассистенти, ЖЧ-2014нинг энг яхши тўпурари унвонларини қўлга киритган. Энди буюк футболчи ўз фаолиятини Испанияда давом эттиради.
Пепе Рейна «Комо»га
Андрей Аршавиннинг «Энфилд»даги покери - қандайдир ўзга дунё воқеасидек. У олис ўтмишда юз берган. Лекин 2009 йилда россиялик мергандан 4та гол қабул қилган посбон ҳамон яшил майдонда. 42 ёшли Рейна «Вильярреал»ни эркин агент мақомида тарк этиб, «А» серияси дебютанти билан шартнома имзолади.
Боз устига, Рейна - «Комо»нинг асосий дарвозабони. Стартдаги 4та баҳсда «Ювентус»га қарши (0:3), «Кальяри» (1:1), «Удинезе» (0:1) ва «Сампдория»га қарши (1:1, пен. сер. 3:4) ўйинларда айнан испаниялик фахрий дарвозани қўриқлади.
Испания терма жамоаси шарафини 36та учрашувда ҳимоя қилган Рейна Евро-2008, ЖЧ-2010 ва Евро-2012 турнирларида чемпионликка эришди. Клуб миқёсида эса, «Ливерпуль», «Наполи» ва «Бавария» билан бир неча совринларга сазовор бўлди.
Давид де Хеа «Фиорентина»га
33 ёшли дарвозабон «МЮ»дан кетиб бутун бир мавсумни ишсиз ўтказганида, фаолиятини якунлагандек туюлганди. Бироқ у янги клубини топишга муваффақ бўлди. Давид эркин агент сифатида «Фиорентина»га йўл олди ва кейинчалик муддатини узайтириш шарти билан бир йиллик келишувга имзо чекди.
«Бир йилни Манчестерда ўтказиб, кейин машқ қилиб туриш учун Мадридга йўл олдим. Мақсадим юксак савияни тиклаш эди. 12 йилни Манчестерда ўтказдим, у менинг уйим бўлиб қолганди. Шу боис, янги таклифларга баҳо бериш учун бир йиллик танаффус олишга қарор қилдим», - деганди де Хеа.
12 йил ичида Давид 9та совринни қўлга киритди, ЕЛда «МЮ» ва «Атлетико» билан ғолиб чиқди. «Фиорентина»да эса айнан еврокубок мусобақаси - ЕКЛда дебютини нишонлади. Ўз майдонида «Пушкаш академияси» қарши баҳсда (3:3) 3та гол ўтказиб юборган бўлсада, жавоб учрашувида (1:1) пенальтилар сериясида ғолиб чиқиб, жамоани кейинги босқичга олиб чиқди.
Яспер Силессен «Лас-Пальмас»га
«Барселона» ва «Валенсия»да фаолият юритган 35 ёшли нидерландиялик посбон 2 йилдан кейин Испанияга қайтди. У охирги икки мавсумни Эредивизиенинг ўртамиёна НЕК клубида ўтказди.
Кейин «Лас-Пальмас»дан таклиф олиб, 2 йиллик шартномани имзолади. Примеранинг дастлабки 3 турида 5та гол ўтказиб юборган бўлсада, «Реал»га қарши баҳсда (1:1) Яспер яхши таассурот қолдирди. Посбон Нидерландия терма жамоасининг 65та учрашувида иштирок этган. Клуб миқёсида эса, «Аякс» ва «Барселона» билан шоҳсупани забт этган.
Адам Лаллана «Саутгемптон»га
«Ливерпуль» ва Англия терма жамоасининг 36 ёшли собиқ ярим ҳимоячиси 10 йиллик танаффусдан кейин «Брайтон»дан қадрдон клубига қайтди ва 1 йиллик келишувга имзо чекди. АПЛдаги илк учрашувида «Брентфорд»га қарши майдонга тушган Адам ассистни амалга оширди. Бироқ бу гол 0:3 ҳисобида имкониятни бой бераётган «Авлиёлар»ни мағлубиятдан қутқара олмади.
«Саутгемптон»дан «Ливерпул»га кетиш билан мухлисларни ражитганимни биламан. Ўйлайманки, энди ўша жароҳатларни даволай оламан. Бу жамоа доимо мен учун қадрдон бўлиб қолади. Ўғлим «Саутгемптон» академиясида таҳсил олмоқда», - дейди Лаллана.
Адам Англия терма жамоаси учун 34 марта майдонга тушган, «Ливерпуль» билан АПЛ ва ЕЧЛда зафар қучган.
Николя Пепе «Вильярреал»га
5 йил аввал Пепени «Арсенал» 80 млн. еврога харид қилганди. Энди ҳужумкор ярим ҳимоячи текинга «Вильярреал» аъзосига айланди. Ивуарлик 29 ёшли футболчи сўнгги мавсумни «Трабзонспор»да ўтказган.
Николя ўзининг клуб миқёсидаги ягона соврини бўлган Англия Кубогини «Арсенал» билан қўлга киритган, 2020|21 йиллар мавсумида ЕЛнинг рамзий терма жамоасидан жой олган бўлсада, «тўпчилар» сафида тўла-тўкис очила олмади. Ваҳоланки, Лондонга кетиши арафасида «Лилль» уни йил ўйинчиси сифатида эътироф этганди.
Пепе Ивуар терма жамоаси шарафини 46та учрашувда ҳимоя қилган, АМКда ғолиб чиққан. Туркияга кетгач кўпчиликнинг хотирасидан кўтарилган футболчи энди «Вильярреал»даги ўйинлари билан ўзини эслатишга уриниб кўради. Лекин дастлабки 3та ўйинда самарали ҳаракатларни намойиш эта олмади.
Тома Менье «Лилл»га
«ПСЖ» ва «Боруссия Дортмунд»нинг собиқ ҳимоячиси ҳам охирги мавсумини «Трабзонспор»да ўтказиб, шу йилнинг ёзида топ,лига жамоаси таркибидан жой олди. Эркин агент мақомида Францияга йўл олган 32 ёшли Мёнье «доглар» билан 2 йиллик келишувни расмийлаштирди. Ҳозирга қадар Тома ўзининг янги жамоасида 6та учрашувда майдонга тушди: Франция чемпионатида 2та ва ЕЧЛ саралаш босқичида 4та. «Анже» дарвозасига гол уришга улгурди.
Менье Францияда нисбатан муваффақиятлироқ тўп сурган: 3та чемпионлик, ЕЧЛ финали ва кубок беллашувларидаги совринлар. «Боруссия Д.» билан фақат Германия Кубогини қўлга киритган. Бельгия терма жамоаси таркибида 66 марта майдонга тушган ҳимоячи 2018 йилдаги Россия мундиалидан бронза медали билан қайтганди.
А.АҲМЕДОВ тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Япония
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
