Хабар берганимиздек, «Андижон» клуби бугун Анталия йиғини давомидаги яна бир ўртоқлик учрашувини ўтказди.
Полшанинг “Вишиста Краков” жамоасига қарши беллашув кескин ва голларга бой тарзда ўтди. Ўйин эса кутилмаганда рақибнинг тезкор голлари билан бошланди. Беллашув бошида полшаликлар ҳисобни очишди ва 6-дақиқада иккинчи голни ҳам киритдилар. Албатта, учрашувнинг бундай бошланишини ҳеч ким кутмаганди. «Андижон» эса бундай ҳолатдан тушкунликка тушиб қолгани йўқ ва рақиб дарвозаси олдида бирин-кетин хавфли ҳужумларни уюштира бошлади.
Фақат бўлим охирларига яқин кескин ҳужумларимиздан бири гол билан якунланди. Рақиб жарима майдони ичидаги чиройли комбинациямиз чоғида Фарҳод Соҳибжоновни полшалик ҳимоячи йиқитди. Қирғизистонлик бош ҳакам иккиланмасдан 11 метрлик нуқтани кўрсатди. Буни ҳужумчи Рустам Турдимуродов муваффақиятли бажарган ҳолда ҳисобни қисқартирди.
Олдиндан режалаштирилганидек, танаффусдан кейин таркибимизда ўзгаришлар кузатилди ва бир қатор футболчилар ўйинга қўшилишди.
Иккинчи бўлимни тажовузкорлик билан бошлаган жамоамиз 53-дақиқада рақибнинг яна бир кутилмаган ҳужумидан кейин тўп ўтказиб юборди. Лекин футболчиларимиз бу ҳолатга тезда реакция кўрсатиб, ҳисобни қисқартиришди. Қанотдан Бектемир Абдуманноновнинг тезкор ҳужумидан сўнг у тўпни жарима майдони ичига узатган пайтда тўп рақиб футболчисининг қўлига тегди. Қирғизистонлик Алимардон Байназаров иккинчи маротаба “Вишиста Краков” дарвозаси томон пенальти белгилади. Абдуманнонов 11 метрлик нуқтадан зарба беришда адашмади.
Жамоамиз шиддат билан ўйинни давом эттираётган маҳалда бош ҳакам Ислом Маматказинни рақиб билан тўп учун курашда қўполлик ишлатди, дея унга сариқ ва сўнг қизил карточка кўрсатиб, майдондан четлатди. Ҳакам ўйин олдидан кимдир четлатилса, ўрнига бошқа футболчи тушишига рухсат йўқлигини айтди ва натижада жамоамиз қолган дақиқаларда майдонда бир футболчи кам ўтказишига тўғри келди. Қолаверса, ҳакам бир неча бор чўнтагидан сариқ карточкаларни чиқаришига тўғри келди.
Шунда ҳам «Бургутлар»да голли имкониятлар бўлди. Россиялик ҳужумчи Ислам Машуков 2-3 маротаба хавфли зарбалар йўллади. Гоҳида дарвозабон голлардан сақлаган бўлса, гоҳида омад юз ўгирди.
Ўйин давомида ёмғир ёғиб турди. Шунга қарамай, футболчиларимиз бўш келишгани йўқ ва кескин қаршилик кўрсатишди. Бир футболчи кам бўлиб қолганда ҳам йигитларнинг шиддати камаймади. Лекин рақиб ўйинчилари бир мунча қўпол ўйин намойиш қилишгани билан ҳам ёдда қолди. Нима бўлганда ҳам «Андижон» футболчилари майдонда мардонавор курашдилар.
«Андижон» навбатдаги учрашувини 20 февраль куни Чехиянинг “Зброёвка Брно” жамоасига қарши ўтказади.
«Андижон» – Вишиста Краков” (Полша) – 2:3 (1:2)
18 февраль. Анталия. «Кая» спорт мажмуаси.
Бош ҳакам: Алимардон Байназаров
Ёрдамчи ҳакамлар: Азамат Садибакасов, Барсбек Джуншбаев
Захира ҳаками: Бексултан Парпибаев
«Андижон»: Моҳир Комилов, Миомир Журичкович, Ислом Маматказин, Абдулвоҳид Ғуломов, Усмонали Исмоналиев, Фарҳод Соҳибжонов, Дониёр Абдуманнопов, Шохжаҳон Ёрқинбоев, Альтин Крезиу, Илҳом Абдуғаниев, Рустам Турдимуродов.
Иккинчи бўлимда майдонга тушганлар: Валижон Раҳимов, Абдураҳмон Комилов, Искандар Шойқулов, Олег Зотеев, Сардор Азимов, Муҳаммадкарим Тоиров, Абубакир Ашуров, Бектемир Абдуманнонов, Ислам Машуков.
“Вишиста Краков”: Антони Микулко, Бартоз Брзек, Даниел Миколаевски, Михал Паздан, Даниел Сандовал, Мануел Торрес, Томас Сведровски, Давид Пакулски, Роман Гоку, Лисандро Семедо, Чума.
Иккинчи бўлимда майдонга тушганлар: Оскар Миелкарс, Конрад Касолик, Давид Киедрович, Карол Даниелек, Михал Трабка, Якуб Волосик, Якуб Песек, Михал Феликс.
Голлар: Чума, 2 – 0:1. Семедо, 6 – 0:2. Рустам Турдимуродов, 36-пен. – 1:2. Роман Гоку, 53 – 1:3. Бектемир Абдуманнонов, 56-пен. – 2:3.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
