"Ливерпуль" хўжайини Жон Хенри жамоа ҳужумчиси Луис Суареснинг "Арсенал"га сотилмаслигини маълум қилмоқда.
"Суаресни сотиш ниятимиз йўқ. Бу йил биз Европага чиқмаймиз, Чемпионлар лигасида қатнашмаётганимизга ҳам бир қанча вақт бўлди. Суаресни асосий рақибимизга сотиш кулгули бўларди.
Мен фақат шуни айтишим мумкинки, биз "Арсенал" қандай таклиф билдиришидан қатьий назар Суаресни уларга сотмаймиз. Бу ҳақда Стэн Кронке ("Арсенал" бош акционери - манба) билан гаплашганим йўқ, лекин Иван Газидис ("Арсенал" ижрочи директори - ман.) билан шахсан суҳбатлашдим ва унга Луисни сотмаслигимизни айтдим.
Суарес бошқа клубларга ҳам сотилмайди, чунки уни алмаштириш учун бизга вақт йўқ.
Гап пулда эмас. Бу спортга оид иш. Суарес ўрнига айни пайтда номзод топа олмаймиз. Ҳозир ҳамма аллақачон қаергадир ўтиб бўлди ёки ўтмаслиги ҳам аниқ бўлиб улгурган. Шундай экан, айнан футбол сабабли Суаресни сота олмаймиз, айниқса "Арсенал"га.
Мураббий хафа. Бундай вазиятларда шундай бўлиши керак ҳам. Мухлисларнинг ҳам қовоғидан қор ёғяпти. Лекин бизга Суарес керак. Умид қиламанки, ҳаммаси ўтиб кетади", деди Хенри.
Матнда хатолик топсангиз, ўша хатони белгилаб, бизга жўнатинг (Ctrl + Enter).