«Бенфика» ўйинчиси Престианни Винисиусни ҳақорат қилгани учун дисквалификация қилинди
Лиссабоннинг «Бенфика» клуби вингери Жанлука Престианни Чемпионлар лигасида «Реал Мадрид» клубига қарши ўйинда дискриминацион хатти-ҳаракат қилгани учун жазоланди.
Ҳодиса 17 февраль куни Чемпионлар лигаси плей-офф босқичининг илк ўтиш ўйинида содир бўлган. Унда испан клуби 1:0 ҳисобида ғалаба қозонган эди. Хабар қилинишича, аргентиналик футболчи бразилиялик ҳужумчи Винисиус Жуниор шаънига ҳақоратли сўз айтган.
УЕФАнинг Назорат, этика ва интизом қўмитаси Престианнини «дискриминацион хулқ-атвор» учун олти ўйинга дисквалификация қилиш ҳақида қарор чиқарди.
Шундан учта ўйинни футболчи дарҳол ўтказиб юборади (бу муддатга аввал берилган вақтинчалик дисквалификация ҳам киритилган), яна учта ўйин эса шартли ҳисобланади ва икки йил ичида қоидабузарлик такрорланса, кучга киради.
Шунингдек, УЕФА ФИФАга ушбу жазони ўз тасарруфидаги барча мусобақаларга ҳам татбиқ этиш бўйича сўров юборган. Шу тариқа, Престианни нафақат Чемпионлар лигаси ўйинларини, балки ички ва халқаро даражадаги бошқа учрашувларни ҳам ўтказиб юбориши мумкин.
Манба: sports.kz
Киритилди: 18:21, 24.04.2026. Ўқилди: 334 марта. Фикрлар: 0 та.
Матнда хатолик топсангиз, ўша хатони белгилаб, бизга жўнатинг (Ctrl + Enter).