Европадаги трансферларнинг сўнгги кунидан бериб бораётган хабарлар оқимининг иккинчи қисмини бошлаймиз. Нариги саҳифа анча тўлиб қолди. Кун охирига етгунча ушбу саҳифада анча-мунча футболчиларни бир клубдан иккинчисига ўтказиб юборамиз.
ДАВОМ ЭТАМИЗ.
«Монако» ўз сафига Мадриднинг «Атлетико»сидан яна бир футболчисини қўшиб олиши мумкин. Ҳужумчи Адриан Лопес Радамель Фалькао билан яна жамоадош бўлишга қарши эмас. AS нашрининг хабарига кўра, Мадрид клуби бунга қарши эмас, фақат битта шарт бор: унинг ўрнига бошқа футболчи топишга улгуришса! Аслида захира футболчиси ҳисобланган футболчининг ўрнини боса оладиган футболчини тезда топиш унчалик қийин иш бўлмаса керак а?!
Киевнинг "Динамо" клуби собиқ ҳужумчиси Артём Милевский трансфер ойнаси бекилгунга қадар Туркиянинг "Газиантеп" жамоаси аъзосига айланиши мумкин. Турк ОАВ тарқатган хабарларга кўра, украиналик футболчи Истанбулга ташриф буюрган ва "лочинлар" раҳбарияти билан учрашган. Томонларнинг ўзаро музокараси ижобий якунланишга яқин турибди.
Андреа Доссена "Сандерленд"га ўтгани ҳақида расмий хабарлар чиқди. Омадини берсин!
Эррера "Манчестер Юнайтед" билан 5 йиллик шартнома имзолаши ва ҳафтасига 64 минг фунт олиши кўзда тутилмоқда. Дарвоқе, "Сантьяго Бернабеу" стадионида ўтказилган Гарет Бэйлнинг тақдимот маросимига 20 минг мухлис ташриф буюрди. Дунёнинг энг қиммат футболчиси тақдимоти учун бу камдек, назаримизда...
Москванинг ЦСКА клуби эса Витиньо билан 5 йиллик шартнома имзолади. У 31-рақам остида ўйнайдиган бўлди. "Ҳарбийлар" скаутларига қойил қоласан киши, номи чиқмаган талантлар топиб келишади нуқул.
Бэйлнинг трансфер баҳоси эълон қилинмаяпти. Сумма 90 млн. атрофида бўлиши мумкин. Агар шундай бўлса, Криштиану Роналду бирам хурсанд бўларди:)
Хуан Мата ҳақида негадир жимлик эди-а? Ўзилни қўлга кирита олмаган ПСЖ ярим ҳимоячи учун қизиқишини эълон қилди. Олдинроқ "Челси" Мата учун "Ливерпуль"нинг 30 миллионлик таклифини рад этди.
Қайноқ хабар! Маруан Феллайнини қўлга кирита олмаётган Девид Мойес мухлислар олдида шарманда бўлмаслик йўлини топди. Клуб "Сарбон" клубига мурожаат қилиб, Феллайнини ўрнини босиб туриш учун Фарҳод Саидовни бирровга, йўғе, ижарага сўради. Хазил. Феллайни Манчестерга келаётгани ҳақида фотофакт бор:
Месут Ўзилнинг трансфери бир соат ичида расман эълон қилинади. Айтишларича, ярим ҳимоячи "Арсенал"да 11-рақам остида тўп суради.
"Вест Бромвич" ҳали ҳам бозорда. Клуб "КПР"нинг бразилиялик дарвозабони Жулио Сезарни ўз таркибига қўшиб олиш ҳаракатида.
"Суонси" "Хетафе"дан Алваро Васкесни ижарага олди. Умуман АПЛ жамоалари жуда фаоллар. Боя ушбу лига жамоалараи аллақачон трансферлар учун умумий 515 миллион сарфлаб бўлганликлари ҳақида хабар чиққанди. Бу рақам яна ошиши аниқ.
Бугунги кун қаҳрамонлари:
Юлиан Дракслер "Шальке"да қоладиган бўлди. Аввалроқ, лондонликлар ярим ҳимоячи учун 47 миллион таклиф қилаётгандилар. Аммо Ўзилнинг трансферидан кейин ушбу музокаралар тўхтади.
"Юнайтед" Бейнсга бўлган қизиқишини сусайтирмаяпти. Энди клуб ҳимоячи учун 15 миллион фунт беришга тайёр эканини маълум қилган.
"Анжи" ўйинчи сотишда давом этяпти. Карсела-Гонсалеснинг трансфери борасида Бельгиянинг "Стандарт" клуби билан келишувга эришилган.
"Ливерпуль" ҳужумчиси Дани Пачеко Испанияга қайтмоқда ва ижара асосида "Алькоркон" шарафини ҳимоя қилади.
Барсалонада эса жамоага янги марказий ҳимоячи келишини кутмоқдалар. Аммо ҳозирча клубдан бу ҳақида садо чиқмаяпти. Эслатиб ўтамиз, аввалроқ, Хуммелс, Тиаго Сильва ва Давид Луиз вариантлари янграганди. Булар ичида Луиз варианти ҳақиқатга яқинроқ.
Зериктирмаслик учун битта бўлган воқеа айтиб бераман. Маълум бўлишича, Гарет Бэйл "Соутҳэмптон"дан "Тоттенҳэм"га ўтаётганда, шартномада бир банд бўлган экан. Ушбу бандга кўра, мабодо "Тоттенҳэм" Бэйлни сотадиган бўлишса, трансфер суммасининг 25 фоизи "Соутҳэмптон"га тегишли бўлиши керак эди. Лекин кейинчалик клубнинг молиявий аҳволи оғирлашади ва ўша бандни ўчириб ташлаш эвазига "Тоттенҳэм" дарвозабони Тонни Форкастни қўлга киритади. Шунақа. Агар ўша банд сақланиб турганда, клуб ҳозир 25 миллионга яқин пулга эга бўларди.
Дарвозабон Эмилиано Вивиано Лондонда тиббий кўрикдан яхши ўтди ва бир йиллик ижара шартномаси асосида "Арсенал" шарафини ҳимоя қиладиган бўлди. Лондонликлар уни бир йилдан сўнг 6 миллион эвазига бутунлай сотиб олишлари мумкин.
Арсен Венгернинг ростакамига жаҳли чиққан кўринади. "Арсенал" ПСЖ га Хавьер Пасторени сотасизларми ёки йўқми, деб сўради.
"Эвертон" "МЮ"нинг Лейтон Бейнс борасидаги 15 миллионлик таклифини рад этди.
“Кристал Пэлас” клуби “Хаддерсфилд” ҳимоячиси Жек Хантни ўз сафига қўшиб олганини эълон қилди. Шартнома тўрт йилга мўлжалланган.
"Арсенал" давом этмоқда. Агар ПСЖ "Челси"дан Матани сотиб оладиган бўлса, Пасторени олишга ҳаракат қилмоқчи. Агар Суарес Мадридга ўтса, Бензема ёки Ди Мария учун "Арсенал" курашга киришади. Қойил.
Касильяс ҳеч қаерга кетмайди! "Реал" учинчи дарвозабони Антонио Адан билан шартномани бекор қилди. Томонлар ўзаро келишувга биноан ушбу қарорга келдилар ва клбу Аданга омад тилади. Адан эркин агентга айланди.
"Галатасарай" клуби ҳужумчиси Бурак Йилмаз Римнинг "Лацио" клубига ўтади. Туркиянинг энг яхши тўпурари учун римликлар 15 миллион евро берадиган бўлишди.
"Динамо" (Киев) Андрей Ярмоленко борасидаги "Зенит"нинг 27 миллионлик таклифини рад этди.
"Металлист"нинг аргентиналик ҳужумчиси Жонатан Кристалдо фаолиятини "Болонья"да давом эттирадиган бўлди. Футболчи бир йилга ижарага берилди.
Бироздан кейин "Барселона" ҳақидаям хабар бўлади, кутиб туринг.
"Бенфика" марказий ҳимоячиси Лисандро Лопес ушбу мавсумни Мадридда ўтказади. "Хетафе" футболчини бир йилга ижарага олди.
Демак "Барселона" ҳақида. Клуб ярим ҳимоячиси Жонатан дос Сантос ижара шартномаси асосида "Фиорентина"га ўтиши мумкин. Футболчи жамоа асосий таркибида ушбу мавсумда фақат бир марта захирадан майдонга тушди холос.
Феллайни Бельгия терма жамоаси йиғинларига бироз кечроқ бориш учун изн сўради. Футболчи "Манчестер Юнайтед" билан музокараларини ниҳоясига етказишга аҳд қилган кўринади.
«МЮ» таклиф қилиб, «Эвертон» рад этиб чарчамади эй. Лейтон Бэйнс учун навбатдаги таклиф ҳам ливерпулликлар томонидан рад этилди.
Моуриньо Касильясдан кучли деган Адан эсингиздами? Худди эски бошлиқ ўрнига келган янги бошлиқ "эскининг одамини" ҳайдаганидек Антонио Адан билан шартномани "Реал" бекор қилди.
"Лацио" Бурак Йилмазни сотиб олишга яқин турибди. Унинг трансфери 15 миллион еврога баҳоланган. Туркиялик "гол-одам" йилига 2,9 миллион маоши олиши кўзда тутилган.
"Ўзивузани Тошкандда котта бўган" Одемвингие энди Уэльс пойтахтига кетай деб турибди. "Кардифф" "тошкентлик футболчи"га 4 миллион фунт беришга тайёрлигини маълум қилган. Ҳамма гап "Вест Бромвич"да қолди.
«Лацио» ва Бурак Йилмаз келишуви амалга ошмаслиги мумкин деган хабар пайдо бўлди. Айтишларича «Лацио» ЕвроИттифоқ паспорти бўлмаган Брайан Переа билан қаноатланади.
Арсен Венгернинг трансфер режалари ҳақида карикатуралар эса йиллар давомида эскирмайди :)
«Парма» «Интер»дан Жоэ Обини ижарага олди. Демак унинг трансфер ҳуқуқини «сутчилар» сотиб олмайди. Ижара бир йилга мўлжалланган.
«Зенит»дан янги шов-шув: Африканинг бир қатор нашрлари томонидан ёзилишича, Эммануэл Адебайор питерликлар сафига бориб қўшилиши мумкин экан. Ишониш қийин-а?
Ўтган йили трансфер бозорининг сўнгги кунига ёппасига футболчилар сотиб олган «Сити» бу йил бу ишни олдинроқ қилганди. Бугун «шаҳар» тарафларда «миқ» этган товуш чиқмади.
«Катания» чехиялик ўз вақтида келажаги порлоқ деб қаралган Ярослав Плашилни ўз сафига қўшиб олмоқда. Плашилдан на Недвед ва на Поборски чиқди. Ундан қолгани кўчиб юришлар бўлмоқда.
Бозор ёпилишига уч соатдан ошиқроқ вақт қолган бир пайтда. ғалати сукунат пайдо бўлди. На бош нишон бўлиб турган Лондон ва на Манчестердан янги хабар келмаяпти.
Нико «Кранчар» премьершипга тушиб кетган «КПР» футболчисига айланиши мумкин. Ҳозирча Адриан Мариаппининг Лондонга келиши ҳақиқатга яқин бўлиб турибди.
«Тоттенҳэм» Халкни ижарага олиш фикридан қайтди. Лондонликларнинг фикрича бразил футболчиси учун бир йиллик ижарага 10миллион фунт кўп. Ҳатто «Зенит» унинг трансфер ҳуқуқини шартнома йилларига бўлиб ҳисоблаганда бунча пул тўламаган. Мантиқан тўғри қарор.
Фамилияси миллатини билдириб турадиган Стивен Айрлэнд «Сток Сити»га ўтиши мумкин. Ўз вақтида «Сити»да порлаган футболчи «Астон Вилла»дан кетиши кутилмоқда.
Эмилиано Вивианонинг «Арсенал»га ижарага берилгани расман тасдиқланди. Ўша гап. Ўша мавзу. Мавзу нима ҳақидагили Арсен Венгер ҳақида юқорида берилган карикатурада.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
