Футбол миллионлар ўйини. Ушбу ўйин мухлисларни ўзига завқлилиги, жозибаси билан мафтун этади. Баъзан эса мағлубиятлардан куйинишингга тўғри келади. Кўпчилик футбол ихлосмандлари биргаликда ўйинларни таҳлил қилиш, хатоларни аниқлаш, ҳакамларнинг холислигини баҳолашни хуш кўришади. Энг муҳими, футболдан холислик, адолат излашади.
Олий лига тур ўйинлари якунлангач, биз мухлислар ўзаро ўйинларни таҳлил қиламиз, бирор баҳсли вазият юзасидан ўз фикрларимизнинг тўғри ёки нотўғри эканлигини охирига етишга қизиқамиз ва ниманидир исботлашга ҳаракат қиламиз. Охирига етмай қолган саволларимизга жавобни телевидениедан излаймиз. Олий лига доирасида барча учрашувларни тўлалигича “Спорт-ТВ”да томоша қилиш имкони йўқлиги сабабли, ҳар бир ўйиндан лавҳаларни кузатиш учун “Футбол шарҳи” кўрсатувини томоша қилишни интиқ бўлиб кутамиз.
“Футбол шарҳи” кўрсатуви журналист ва шарҳловчиларидан жуда адолатли ҳамда холис фикрларини кутиб турган мухлис уларда бундай профессионалликни кўра оладими? Ҳа, фақат Тошкент жамоалари иштирок этмаган ўйинларда, холос! Агар, Тошкент жамоалари, яъни Диёр Имомхўжаев таъбири билан айтганда “уч оға-ини ботирлар”га қарши кечадиган ўйинлар ҳақида лавҳа тайёрлаш керак бўлса, шарҳловчиларимизда ижодий нохолислик кузатилмоқда.
“Насаф”ни “аждарҳо” деб қабул қилган Диёрбек уни фақатгина Тошкент жамоаларининг рақиби деб аълоҳида урғулаган бўлса-да, бошқа вилоят жамоалари учун ҳам рақиб ҳисобланишини мажозий маънода инкор этди. Ўз ўрнида “Уч оға-ини ботирлар” (пойтахт жамоалари)нинг ҳам асосий эътибори “Насаф”га қаратилганини эртакнамо усулда тушунтириб берди. Гўёки “ака-укалар”нинг бошқа рақиби миллий чемпионатимизда йўқдек. Пойтахт жамоалари мақомига эга бўлмаган вилоят жамоалари совриндор бўлишини “ақлга сиғдира олмаган” журналистимиз хеч қандай тортинишсиз “катта ака”нинг ўтган турдаги рақиби “Қизилқум”га нисбатан камситиш оҳангида Зарафшонни “чўл” деб аташдан истиҳола қилмагани етмагандек, жамоани мақтанадиган нарсаси йўқлиги сабабли “Пахтакор”га ютқазганлигидан мантиқ излашга уриниб кўрди.
“Ўртанча ўғил” —“Локомотив”га қарши кечган ўйинда “Насаф”нинг иккинчи бўлимдаги ўйинига эътибор қаратаркан, Имомхўжаев иккинчи бўлимдаги меҳмонлар ўйинининг сусайишига, гўёки, бош мураббий айбдорлигига урғу бериб ўтди. Лекин учрашувни бевосита стадионда кўриб томоша қилганлар гувоҳ бўлдики, тошкентликлар “Насаф” футболчиларини тўхтатиб қолиш учун қўпол ҳаракатлардан ўзларини тия олишмади. Геворкян ҳамда Юнусовга нисбатан кескин ҳаракатлар, тажрибали футболчиларни жароҳатлаш учун ташланишлар биргина “ўртанча ўғил” билан ўйин натижаси учун эмас, қолган икки “ўғил”ни ўйлаб ҳам қилинган ишдек тасаввур уйғотди. Илҳом Шомуродовнинг жароҳати, Элдор Суюновга нисбатан носпортча ҳаракат ёинки Ҳамза Каримов жароҳатни янгиланишидан чўчиб алмаштиришларини сўрагани ҳақида шарҳловчи ҳеч нарса гапирмади.
Ахир журналист халқи жароҳатлар кўпайгани, инсонийлик юзасидан ҳам, спорт принциплари юзасидан ҳам бу тўғри эмаслигини, футболчилар ҳам инсон, уларда ҳам оила борлигини, футбол қўл жанги ёки бокс, каратэ каби спорт турларидан ажралиб туришини тарғиб қилиши керак эмасми?!
Тарғиб қилиш қўлингиздан келмас экан — буни тушунамиз! Қанотидан айирди, деб фахрланиб гапиришингизни қандай тушуниш мумкин! “Насаф” футболчиларининг жароҳатлари сизга шу қадар қувонч бағишласа, ҳиссиётларингизни профессионал сифатидан эфирдан яшириш қўлингиздан келмайдими?!
Сўнгги сўз ўрнида Абдулла Ориповнинг қуйидаги мисраларини эслаб ўтишни жоиз деб билдим:
Дейдилар, ит ҳурар, ўтади карвон,
Ранжу балолардан ёнмасин жонинг,
Лекин алам қилар, бир умр гирён,
Итлар орасидан ўтса карвонинг.
"Насаф" ПФК мухлислар клуби фаоли Зиёдулло Сафаров.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
