«У аниқ бу сайёрадан эмас» — Лионель Месси ҳақида кўп бор айтилган бу ибора энди Аргентина терма жамоасидаги фаолиятини якунлаган футболчига берилган энг муносиб таърифлардан бири бўлиб қолади. Мамлакат ўз миллий жамоасининг етакчисига муносиб ҳурмат кўрсатиб, уни энг яхши футбол анъаналари асосида кузатди. «Евро-Футбол.Ру» нашри Лионель Мессининг Аргентина терма жамоаси сафидаги энг муҳим ютуқларини ёдга олди.
Дебютдаги 1 дақиқа
Лионель Месси миллий терма жамоа сафидаги илк расмий учрашувини 2005 йил 17 август куни 18 ёшида ўтказган. У Венгрияга қарши кечган бу баҳсни, эҳтимол, эслашни истамаса керак. Учрашувнинг 64-дақиқасида захирадан майдонга тушган ёш ҳужумчи рақиб футболчисидан халос бўлишга уриниб, унинг томоғига тирсаги билан зарба берди. Натижада Мессининг терма жамоа либосидаги дебюти атиги бир дақиқадан сўнг қизил карточка билан якунланди.
Ушбу эпизодни Лионелнинг терма жамоадаги тажрибали шериклари — Креспо, Хайнце, Макси Родригес, Сорин, Айала ҳамда Аргентина терма жамоасининг ҳозирги бош мураббийи Лионель Скалони кузатиб турган эди.
Мессининг миллий терма жамоадаги дебют голи ҳам бироз аламли хотира билан боғлиқ. Лионель чап оёғида узоқ бурчакка йўллаган зарбани Стипе Плетикоса қайтаришга улгурмади. Бироқ Хорватия учрашувнинг қўшиб берилган вақтида, 90+2-дақиқада ғалабани тортиб олди.
Барчасида ғолиб чиқди
Месси келажакда набираларига ҳар қандай омадсизликни ишга тўғри муносабат орқали енгиб ўтиш мумкинлигини бемалол айта олади. Омадсиз дебют, йирик турнирлар финалларидаги мағлубиятлар — буларнинг ҳеч бири Лионелни тўхтата олмади. Миллий терма жамоадаги фаолиятини якунлар экан, аргентиналик футболчи қўлга киритиш мумкин бўлган барча асосий совринларни ютиб бўлди.
Лионель Мессининг Аргентина терма жамоаси сафидаги барча совринлари:
- Жаҳон чемпионати — 2022;
- Америка кубоги — 2021, 2024;
- Финалиссима — 2022;
- Олимпия ўйинлари — 2008.
Шуни алоҳида таъкидлаш керакки, Лионель Месси энг муҳим совринларининг деярли барчасини 33 ёшга тўлганидан кейин қўлга киритди. Кўпчилик футболчилар фаолиятини якунлаш ҳақида ўйлай бошлайдиган ёшда аргентиналик футболчи ўзида янги куч топа олди.
Мессининг терма жамоадаги рекордлари
Аргентина миллий жамоаси сафидаги 21 йил давомида Лионель Месси 208 та учрашув ўтказиб, 126 та гол урди. Ҳар икки кўрсаткич ҳам миллий терма жамоа рекорди ҳисобланади.
Унинг 126 та голи аввалги рекордчи Габриэль Батистутанинг натижасидан (56 гол) қарийб икки баравар кўп. Шунингдек, Месси миллий терма жамоалар футболчилари орасида голлар сони бўйича иккинчи ўринда туради. Ундан юқори натижа фақат Криштиану Роналдуда — 146 та гол.
Бундан ташқари, Месси терма жамоа сафидаги учрашувларда энг кўп голли узатма амалга оширган футболчи — 68 та ассист. Аргентиналик футболчи жаҳон чемпионатларида 34 та учрашув ўтказган ва бу ҳам мутлақ рекорд ҳисобланади.
Жаҳон чемпионатларидаги кумуш ва олтин медаллар Мессининг буюклигини яна бир бор тасдиқлайди. У ўзи учун сўнгги мундиалда жаҳон чемпионатлари тарихидаги энг катта ёшдаги хет-трик муаллифига айланган — 38 ёш 359 кунлигида Жазоир дарвозасини уч бор ишғол қилган.
Энди Лионель Месси Аргентина терма жамоаси билан расман хайрлашганидан сўнг ишонч билан айтиш мумкин: майдонга тушганидан атиги бир дақиқа ўтиб қизил карточка билан бошланган давр футбол тарихида тенги йўқ триумф билан якунланди.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
