«Барселона» Деку клубнинг спорт директори лавозимига тайинланганидан буён трансфер бозорида 28,5 миллион евро миқдорида ижобий молиявий баланс қайд этди.
Бу ҳақда MARCA нашри маълумот бермоқда.
Нашр ҳисоботига кўра, Деку раҳбарлигидаги уч мавсум давомида Каталония клуби 20 нафар футболчини ўз сафига қўшиб олиш учун 289,5 миллион евро сарфлаган.
Шу даврда 31 нафар футболчининг жамоани тарк этиши эса клубга 318 миллион евро даромад келтирган.
Натижада «Барселона»нинг трансфер операциялари бўйича соф ижобий баланси 28,5 миллион еврони ташкил этган.
Европа грандлари билан солиштирганда қандай фарқ бор?
Мазкур кўрсаткич Европанинг бошқа етакчи клублари натижаларидан сезиларли даражада фарқ қилади.
Хусусан, худди шу даврда Мадриднинг «Реал» клуби трансферларга сотувлардан тушган даромадга нисбатан 408,5 миллион евро кўпроқ маблағ сарфлаган.
«Атлетико»нинг трансфер баланси эса манфий 175 миллион еврони ташкил этган.
Англия Премьер-лигаси клубларида бу тафовут янада катта.
«Ливерпуль»нинг соф трансфер харажатлари 635 миллион еврога етган бўлса, «Манчестер Сити»да бу кўрсаткич 618 миллион еврони ташкил этган.
«Арсенал» эса трансферлар учун тушумларидан 569 миллион евро кўпроқ маблағ сарфлаган.
Германиянинг «Бавария» клубида ҳам манфий баланс қайд этилган — 122,8 миллион евро.
Декунинг трансфер сиёсати
MARCA маълумотларига кўра, Деку жамоа таркибини кучайтиришдан воз кечмаган ҳолда даромад ва харажатлар ўртасидаги мувозанатни сақлашга муваффақ бўлган.
Бунда «Ла Масия» академияси тарбияланувчиларининг асосий жамоага жалб қилиниши муҳим аҳамият касб этган.
Ёш футболчиларнинг таркибга қўшилиши янги трансферларга бўлган эҳтиёжни камайтирган. Шу билан бирга, футболчиларнинг жамоани тарк этиши катта спорт муаммоларисиз амалга оширилган.
Спорт директори Антони Гордон ва Карим Адейеми каби футболчиларни ҳам ўз сафига қўшиб олишни маъқул кўрган. Улар Ханс-Дитер Фликнинг ҳужум чизиғидаги имкониятларини кенгайтирган.
Уч мавсумда бешта соврин
Деку «Барселона»га келганидан буён клуб икки марта Испания Ла Лигаси чемпионига айланган.
Шунингдек, каталонияликлар икки бор Испания Суперкубогини ва бир марта Испания кубогини қўлга киритган.
Шундай қилиб, Декунинг спорт директори сифатидаги фаолияти майдондаги муваффақиятлар билан бир қаторда трансфер бозоридаги ижобий молиявий баланс билан ҳам ажралиб турибди.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
